Isaia 61:1-11
61 Gbigbọ Oklunọ Nupojipetọ Jehovah tọn tin to ji e,+Na Jehovah ko yiamisisadode mi nado lá wẹndagbe na homẹmimiọnnọ lẹ.+
Ewọ ko do mi hlan nado blá apà na mẹhe ahun yetọn jẹflumẹ lẹ,Nado lá tundote hlan kanlinmọ lẹPodọ nukunnumimọ hezeheze hlan gàntọ lẹ,+
2 Nado lá owhe ojlo dagbe* Jehovah tọnGọna azán ahọsuyi Jiwheyẹwhe mítọn tọn,+Nado miọnhomẹna mẹhe to aluẹmẹ lẹpo,+
3 Nado wleawudaina mẹhe to aluẹmẹ na Ziọni wutu lẹ,Nado na yé tabla ayajẹ tọn do afín tẹnmẹ,Amì aglinjijẹ tọn do aluẹmẹninọ tẹnmẹ,Awù pipà tọn do gbigbọ flumẹjijẹ tọn tẹnmẹ.
Yé nasọ nọ yin yiylọdọ atin daho dodowiwa tọn lẹ,Yèdọ atin dido Jehovah tọn lẹ, nado nọ pagigona ẹn.*+
4 Yé na vọ́ gbakija hohowhenu tọn lẹ gbá;Yé na vọ́ fihe ko jẹvọ́ dai lẹ gbá,+Bo nasọ hẹn tòdaho he ko yin gbigbakija lẹ gọwá,+Yèdọ lẹdo he ko tin to vọjijẹ mẹ sọn whẹndo de mẹ jẹ devo mẹ lẹ.+
5 “Jonọ lẹ na wá bo na nọ yìn lẹngbọpa mìtọn lẹ,Podọ jonọ lẹ+ wẹ na yin glesi po vẹngle-zọ́nwatọ mìtọn lẹ po.+
6 Na mìwlẹ tọn, yẹwhenọ Jehovah tọn lẹ wẹ mì na nọ yin yiylọdọ;+Mì na nọ yin yiylọdọ lizọnyizọnwatọ Jiwheyẹwhe mítọn tọn lẹ.
Mì na nọ dù sọn nutindo akọta lẹ tọn mẹ,+Bo nasọ nọ doawagun gando gigo* yetọn go.
7 Mimá awe wẹ na yin nina omẹ ṣie lẹ do winyan tẹnmẹ,Podọ yé na yí ayajẹ do dawhá na mimá yetọn wutu, kakati winyan nido hù yé.
Mọwẹ, yé na mọ mimá awe yí to aigba yetọn ji.+
Yé nasọ to ayajẹ kakadoi.+
8 Na yẹn, Jehovah, yiwanna whẹdida dodo;+N’gbẹwanna ajo po mawadodo po.+
Yẹn na sú azọ́nkuẹ yetọn yé po nugbonọ-yinyin po,Bo na basi alẹnu madopodo de hẹ yé.+
9 Kúnkan* yetọn na yin yinyọnẹn to akọta lẹ ṣẹnṣẹn+Podọ ovi yetọn lẹ to gbẹtọ lẹ ṣẹnṣẹn.
Mẹhe mọ yé lẹpo wẹ na yọ́n yé,Dọ yewlẹ wẹ kúnkan* he Jehovah ko dona lọ.”+
10 Yẹn na jẹaglin tlala to Jehovah mẹ.
Yẹn na yí alindọn ṣie lẹpo do jaya to Jiwheyẹwhe ṣie mẹ.+
Na ewọ ko do awù whlẹngán tọn lẹ na mi;+E ko ze tewu* dodowiwa tọn do na mi,Kẹdẹdi asisunọ yọyọ de he ṣinyọ́n tabla he taidi yẹwhenọ de tọn nkọ,+Podọ kẹdẹdi asiyọyọ de he yí aṣọ́donu etọn lẹ do doaṣọ́na ede.
11 Na kẹdẹdile aigba nọ hẹn jinukun tọ́nkun doPodọ kẹdẹdile jipa nọ hẹn nuhe yin dido do e mẹ tọ́nkun do,Mọ wẹ Oklunọ Nupojipetọ JehovahNa hẹn dodowiwa+ po pipà po tọ́nkun+ to akọta lẹpo nukọn do.
Nudọnamẹ Odò Tọn
^ Kavi “nukundagbe.”
^ Kavi “nọ hẹn ẹn yọnwhanpẹ.”
^ Kavi “adọkun.”
^ To paa mẹ, “okún.”
^ To paa mẹ, “Okún.”
^ Kavi “awù he ma tindo awà.”
