Lẹdo aihọn pé, gbẹtọ lẹ to oyà yozò sinsinyẹn he ma ko wá aimẹ pọ́n de tọn ji gọna ninọmẹ aimẹ tọn he nọ diọ to ajiji mẹ bo nọ hẹnnugble tọn. Pọ́n linlin he bọdego lẹ:

•   “Sọn whenue gbọ́n gbẹtọ lẹ ko jẹ ninọmẹ aimẹ tọn gbeje pọ́n ji sọn owhe 174 die, yozò osun juin owhe ehe tọn wẹ sinyẹn hugan.”—Agence américaine d’observation océanique et atmosphérique, États-Unis, département du Commerce, 13 juillet 2023.

•   “Otò Italie, Espagne, France, Allemagne po Polande po tọn lẹpo wẹ to oyà yozò sinsinyẹn tangan de tọn ji, podọ e yọnbasi dọ jẹhọn ni hunmiọnyọnawu jẹ 48°C to lopo Sicile po Sardaigne po tọn lẹ ji—yèdọ jẹhọn he hunmiyọnawu hugan to whenuho Europe tọn mẹ.”—Agence spatiale européenne, 13 juillet 2023.

•   “Dile yozò lọ na fọ́n bo na to sinsinyẹn deji to planẹti mítọn ji, jikun wududu sinsinyẹn na fọ́n bo to jija, podọ ehe na zọ́n bọ osin na gbà fisusu lẹ.”—Nuhe Stefan Uhlenbrook dọ niyẹn, yèdọ ogán he nọ penukundo whẹho osin po osin agọ́ tọn lẹ po go to Azọ́nwhe He Nọ Na Nudọnamẹ lẹ Gando Ninọmẹ Aimẹ tọn Go to 17 juillet 2023.

 Be linlin ninọmẹ aimẹ tọn he nọ diọ to ajiji mẹ bosọ nọ hẹnnugble he fọ́n bo to jijideji nọ gbàhundona we wẹ ya? Pọ́n nuhe Biblu dọ gando whẹho titengbe ehe go.

 Mọwẹ. Yozò sinsinyẹn he tin lẹdo aihọn pé gọna ninọmẹ aimẹ tọn he nọ diọ bo nọ hẹnnugble lẹ sọgbe hẹ dọdai he Biblu dọ gando ojlẹ mítọn go. Di apajlẹ, Jesu ko dọ jẹnukọn dọ mí na mọ “nujijọ dobu lẹ,” kavi “ohia daho lẹ.” (Luku 21:11) Yozò sinsinyẹn he fọ́n bo to gbigbayipe lẹdo aihọn pé ko zọ́n bọ mẹsusu jẹ budi ji dọ gbẹtọvi lẹ na hù aigba sudo.

 Paali. Jiwheyẹwhe dá aigba na mí nido nọ e ji kakadoi; e ma na dike gbẹtọvi lẹ ni hù i sudo. (Salmu lẹ 115:16; Yẹwhehodọtọ 1:4) Na nugbo tọn, ewọ ko dopà dọ emi na “husudo mẹhe to aigba husudo lẹ.”—Osọhia 11:18.

 Biblu dohia dọ Jiwheyẹwhe penugo nado basi hihọ́na aigba sọn nuhe nọ hẹn nugbajẹmẹji wá lẹ si podọ ewọ nasọ wàmọ.

•   “[Jiwheyẹwhe] nọ whiwhẹ yujẹhọn . . . agbówhẹn ohù tọn lẹ nọ nabọẹ whii.” (Salmu lẹ 107:29) Jiwheyẹwhe dohuhlọn nado deanana ninọmẹ aimẹ tọn he nọ hẹnnugble lẹ. Ewọ penugo nado jla nuhewutu ninọmẹ aimẹ tọn do nọ diọ to ajiji mẹ bo nọ hẹnnugble lẹ do, ehe zọ́n bọ gbẹtọ lẹ to oyà yozò sinsinyẹn tọn ji to alọnu.

•   “Hiẹ nọ penukundo aigba go, bo nọ hẹn ẹn dojó taun bọ e nọ de sinsẹ́n susugege tọ́n.” (Salmu lẹ 65:9) Jiwheyẹwhe na dona aigba lọ bọ e na lẹzun paladisi de.

 Nado plọnnu dogọ do opagbe Biblu tọn he dohia dọ ninọmẹ aimẹ tọn na wá yin vivọjlado lọ ji, pọ́n hosọ lọ “Mẹnu Wẹ Na Jla Aigba Do?”