Azọ́nwiwa Dopọ hẹ Jiwheyẹwhe Nọ Hẹn Ayajẹ Wá
“Dile mí to azọ́nwa dopọ hẹ ẹ, mí sọ to mìwlẹ vẹ̀ ma nado kẹalọyi nukundagbe majẹhẹ Jiwheyẹwhe tọn bo gbọ lẹndai etọn go.”—2 KỌL. 6:1.
1. Dile etlẹ yindọ Jehovah wẹ Ganhunupotọ, etẹwẹ e nọ basi oylọna mẹdevo lẹ nado wà?
JEHOVAH wẹ Ganhunupotọ, Didatọ nulẹpo tọn, Mẹlọ he nuyọnẹn po huhlọn etọn po ma tindo dogbó. Job wá mọnukunnujẹ nugbo enẹ mẹ. To whenue Jehovah kanhose Job gando azọ́n nudida tọn Etọn lẹ go, Job gblọn dọmọ: “Yẹn yọnẹn dọ hiẹ sọgan wà onú lẹpo, [podọ nuhe hiẹ tindo to ayiha mẹ nado wà depope ma nọ glo we].” (Job 42:2) Dile etlẹ yindọ Jehovah sọgan wà nudepope he jlo e matin alọgọ mẹde tọn, sọn bẹjẹeji gbọ́n wẹ ewọ ko nọ basi oylọna mẹdevo lẹ nado wazọ́n dopọ hẹ ẹ nado hẹn lẹndai etọn di.
2. Azọ́n titengbe tẹwẹ Jehovah basi oylọna Jesu nado wà?
2 Nudida tintan Jiwheyẹwhe tọn wẹ Visunnu gbigbọmẹ tọn detọ́n dopo akàn etọn. Jehovah dike Visunnu etọn ni tindo mahẹ to azọ́n nudida tọn he pò lẹpo mẹ, yèdọ nudida mayinukundomọ po yinukundomọ lẹ po. (Joh. 1:1-3, 18) Apọsteli Paulu kanwe gando Jesu go dọmọ: “Gbọn ewọ gblamẹ wẹ onú devo lẹpo yin didá te to olọn mẹ podọ to aigba ji, yèdọ onú yinukundomọ lẹ po onú mayinukundomọ lẹ po, vlavo ofìn lẹ wẹo kavi oklunọ-yinyin lẹ kavi gandudu lẹ kavi aṣẹpipa lẹ. Onú devo lẹpo wẹ yin didá gbọn ewọ dali podọ na ewọ.” (Kọl. 1:15-17) Jehovah biọ to Visunnu etọn si nado tindo mahẹ to azọ́n nudida tọn mẹ bosọ hẹn adà titengbe he Visunnu etọn yiwà zun yinyọnẹn na mẹdevo lẹ. Na nugbo tọn, Jehovah gbògbéna Visunnu etọn taun!
3. Etẹwẹ Jehovah biọ to Adam si nado wà, podọ etẹwutu?
3 Jehovah sọ basi oylọna gbẹtọvi lẹ nado wazọ́n dopọ hẹ ẹ. Di apajlẹ, e dọna Adam nado do yinkọ na kanlin lẹ. (Gẹn. 2:19, 20) Pọ́n ayajẹ he Adam na ko tindo dile e to kanlin lẹ pọ́n tlintlin, nado yọ́n lehe yé nọ yinuwa do, nado de yinkọ he sọgbe na dopodopo yetọn! Jehovah sọgan ko do yinkọ na kanlin lẹ, na ewọ wẹ dá yé. Etomọṣo, e gbọn owanyi dali na dotẹnmẹ Adam nado do yinkọ na yé. Jiwheyẹwhe sọ na dotẹnmẹ Adam nado gbloada na Paladisi lọ zẹ̀ Edẹni go. (Gẹn. 1:27, 28) E blawu dọ Adam wá de ma nado wazọ́n dopọ hẹ Jiwheyẹwhe, bo hẹn nugbajẹmẹji wá ede po kúnkan etọn po ji.—Gẹn. 3:17-19, 23.
4. Nawẹ mẹdevo lẹ wazọ́n dopọ hẹ Jiwheyẹwhe nado hẹn ojlo etọn di gbọn?
4 To nukọn mẹ, Jiwheyẹwhe basi oylọna gbẹtọvi devo lẹ nado tindo mahẹ to lẹndai etọn hinhẹndi mẹ. Noa basi aki de he whlẹn ogbẹ̀ etọn po whẹndo etọn po tọn to Singigọ lẹdo aihọn pé lọ whenu. Mose whlẹn akọta Islaeli tọn sọn Egipti. Jọṣua plan akọta enẹ yì Aigba Pagbe tọn ji. Sọlomọni gbá tẹmpli lọ to Jelusalẹm. Malia lẹzun onọ̀ Jesu tọn. Omẹ nugbonọ ehe lẹpo gọna mẹsusu devo lẹ wazọ́n dopọ hẹ Jehovah nado hẹn ojlo etọn di.
5. Azọ́n tẹ mẹ wẹ mí sọgan tindo mahẹ te, podọ be Jehovah to dandannu glọ nado basi oylọna mí nado wà azọ́n ehe wẹ ya? (Pọ́n yẹdide he tin to bẹjẹeji hosọ ehe tọn.)
5 To egbehe, Jehovah basi oylọna mí nado nọgodona Ahọluduta Mẹsia tọn to gigọ́ mẹ. Lẹblanulọkẹyi sinsẹ̀nzọn wiwe tọn susu wẹ hundote na mí. Delẹ sọgan nọma yọnbasi na Klistiani lẹpo, ṣigba mímẹpo wẹ sọgan tindo mahẹ to azọ́n yẹwheho wẹndagbe Ahọluduta lọ tọn didọ mẹ. Na nugbo tọn, Jehovah ma to dandannu glọ nado basi oylọna mí nado tindo mahẹ to azọ́n ehe mẹ. Ewọ sọgan ko de nado dọhona gbẹtọ lẹ tlọlọ sọn olọn mẹ. Jesu dọ dọ Jehovah tlẹ sọgan biọ to zannu lẹ si nado dọhona gbẹtọ lẹ gando Ahọluduta Mẹsia tọn go. (Luku 19:37-40) Etomọṣo, Jehovah biọ to mí si nado yin “azọ́nwatọ hatọ” etọn lẹ. (1 Kọl. 3:9) Apọsteli Paulu wlan dọmọ: “Dile mí to azọ́nwa dopọ hẹ ẹ, mí sọ to mìwlẹ vẹ̀ ma nado kẹalọyi nukundagbe majẹhẹ Jiwheyẹwhe tọn bo gbọ lẹndai etọn go.” (2 Kọl. 6:1) Gbégbò majẹhẹ wẹ e yin nado wazọ́n dopọ hẹ Jiwheyẹwhe, podọ ehe nọ hẹn ayajẹ wá na mí. Mì gbọ mí ni gbadopọnna delẹ to whẹwhinwhẹ́n he wutu mí do dọ mọ lẹ mẹ.
AZỌ́NWIWA DOPỌ HẸ JIWHEYẸWHE NỌ HẸN AYAJẸ WÁ NA MÍ
6. Numọtolanmẹ tẹwẹ Visunnu plọnji Jiwheyẹwhe tọn tindo gando azọ́nwiwa dopọ hẹ Otọ́ etọn go?
6 Sọn bẹjẹeji gbọ́n wẹ devizọnwatọ Jehovah tọn lẹ nọ mọ ayajẹ to azọ́nwiwa dopọ hẹ Jiwheyẹwhe mẹ. Visunnu plọnji gbigbọmẹ tọn Jiwheyẹwhe tọn yin didohia taidi nuyọnẹn he to hodọ dọmọ: “OKLUNỌ ko tindo mi di to whẹwhẹwhenu aliho etọn tọn . . . Yẹn tin to e dè di azọ́nwatọgan de: yẹn sọ yin homẹhun etọn egbesọegbesọ, yẹn to ayajẹ whepoponu to nukọn etọn.” (Howh. 8:22, 30) Jesu nọ yí ayajẹ do wazọ́n dopọ hẹ Otọ́ etọn bosọ nọ jaya to nuhe e wà lẹ po oyọnẹn po mẹ sọmọ bọ homẹ Jehovah tọn nọ hùn do e go. Bọ míwlẹ lo?
Etẹwẹ sọgan hẹn pekọ wá na mí sọ nugbo lọ pinplọn mẹdevo? (Pọ́n hukan 7)
7. Naegbọn azọ́n yẹwhehodidọ tọn do nọ hẹn ayajẹ wá na mí?
7 Jesu dọ dọ ayajẹ tin to nunamẹ mẹ podọ to mimọyi mẹ. (Owalọ 20:35) Mí jaya to whenue mí mọ nugbo lọ, podọ mí sọ nọ mọ ayajẹ dile mí to nugbo lọ plọn mẹdevo lẹ. Dile mí to nugbo Biblu tọn lẹ plọn mẹdevo lẹ, mí nọ mọ lehe mẹhe huvẹ gbigbọmẹ tọn to hùhù lẹ nọ jaya do dile yé to nukunnumọjẹ nugbo họakuẹ Biblu tọn lẹ mẹ bo jẹ awuwlena haṣinṣan de hẹ Jiwheyẹwhe ji. Awú nọ ji mí nado mọ lehe yé to diọdo basi do to nulẹnpọn po aliho gbẹninọ tọn yetọn po mẹ. Mí yọnẹn dọ nujọnu taun wẹ e yin nado tindo mahẹ to azọ́n wẹndagbe lọ lilá na mẹdevo lẹ tọn mẹ. Azọ́n ehe na zọ́n bọ mẹhe gbọwhẹ hẹ Jiwheyẹwhe lẹ na mọ ogbẹ̀ madopodo. (2 Kọl. 5:20) Azọ́n devo tẹwẹ sọgan hẹn ayajẹ po pekọ po wá na mí sọ̀ alọgigọna gbẹtọ lẹ nado de aliho lọ he na plan yé yì ogbẹ̀ madopodo mẹ?
8. Etẹwẹ mẹdelẹ dọ gando ayajẹ he azọ́nwiwa dopọ hẹ Jehovah nọ hẹnwa go?
8 Dile etlẹ yindọ mí nọ jaya to whenue gbẹtọ lẹ kẹalọyi owẹ̀n he lá mí te, mí sọ nọ gọ́ na ayajẹ, na mí yọnẹn dọ mí to homẹ Jehovah tọn hẹn hùn podọ ewọ yọ́n pinpẹn vivẹnu he mí to dido nado sẹ̀n ẹn tọn. (Hia 1 Kọlintinu lẹ 15:58.) Marco he nọ nọ̀ Italie dọmọ: “Homẹ ṣie hùn tlala nado yọnẹn dọ Jehovah wẹ n’nọ na nudagbe hugan he n’tindo lẹ, bọ e ma yin mẹdevo he na wọn nuhe n’wà na ẹn.” Mọdopolọ, Franco he to sinsẹ̀n to Italie dọmọ: “Vivẹnudido mítọn lẹ sọgan nọ taidi numadinu na mí, ṣigba Jehovah nọ flinnu mí egbesọegbesọ gbọn Ohó etọn po awuwledainanu gbigbọmẹ tọn etọn lẹ po gblamẹ dọ emi yiwanna mí bọ nuhe mí to wiwà na emi lẹpo wẹ yin nujọnu. Enẹwutu wẹ azọ́nwiwa dopọ hẹ Jiwheyẹwhe nọ hẹn ayajẹ wá na mi bosọ nọ hẹn gbẹzan ṣie tindo lẹndai.”
AZỌ́NWIWA DOPỌ HẸ JIWHEYẸWHE NỌ DỌ̀N MÍ SẸPỌ EWỌ PO MẸDEVO LẸ PO
9. Haṣinṣan nankọ wẹ Jehovah po Jesu po tindo, podọ etẹwutu?
9 To whenue mí to azọ́nwa dopọ hẹ mẹhe mí yiwanna lẹ, mí nọ dọnsẹpọ yé bo nọ wá yọ́n gbẹtọ-yinyin yetọn po jẹhẹnu yetọn lẹ po. Gbọnvona dọ mí nọ yọ́n yanwle yetọn lẹ, mí sọ nọ yọ́n lehe yé to vivẹnudo nado jẹ yanwle enẹlẹ kọ̀n do. Jesu wazọ́n dopọ hẹ Jehovah, vlavo na owhe liva susu lẹ, podọ owanyi he yé tindo na ode awetọ sinyẹn taun, bọ nudepope ma sọgan hẹn haṣinṣan yetọn gble. Jesu dọho gando lehe yé vẹ́ do sọ go dọmọ: “Dopo wẹ yẹn po Otọ́ lọ po.” (Joh. 10:30) Yé duvivi pọninọ jiawu de tọn, bo nọ kọngbedopọ mlẹnmlẹn to whelẹponu he yé to azọ́nwa dopọ.
10. Naegbọn yẹwhehodidọ nọ dọ̀n mí sẹpọ Jiwheyẹwhe po mẹdevo lẹ po?
10 Jesu hodẹ̀ bo biọ Jehovah dọ ni họ́ devi emitọn lẹ. Etẹwutu? E hodẹ̀ dọmọ: “Na yé nido sọgan yin dopo kẹdẹdile míwlẹ te do.” (Joh. 17:11) Dile mí to nuyiwa sọgbe hẹ nujinọtedo Jiwheyẹwhe tọn lẹ bo to mahẹ tindo to azọ́n yẹwhehodidọ tọn mẹ, mí nọ wá mọnukunnujẹ jẹhẹnu he dọnmẹdogo etọn lẹ mẹ. Mí nọ mọ nuhewutu e do yin nuyọnẹnnu nado dejido ewọ go bo hodo anademẹ etọn lẹ. Dile mí to dindọnsẹpọ Jiwheyẹwhe, ewọ nọ dọnsẹpọ mí. (Hia Jakọbu 4:8.) Mí sọ nọ dọnsẹpọ mẹmẹsunnu po mẹmẹyọnnu mítọn lẹ po, na nuhahun dopolọ lẹ wẹ mí nọ pehẹ, ayajẹ dopolọ wẹ mí nọ tindo bosọ nọ tindo yanwle dopolọ lẹ wutu. Mọwẹ, mí nọ wazọ́n dopọ, nọ jaya dopọ, bo nọ doakọnnanu dopọ. Octavia he nọ nọ̀ Grande-Bretagne dọmọ: “Azọ́nwiwa dopọ hẹ Jehovah zọ́n bọ n’dọnsẹpọ mẹdevo lẹ. Todin, họntọn ṣie lẹ po mẹhe n’nọ dogbẹ́ hẹ lẹ po yin mẹhe nọ ze ayiha do Jehovah sinsẹ̀n ji lẹ, mí tindo yanwle dopolọ bosọ to zọnlinzin to aliho dopolọ ji.” Be e ma yin numọtolanmẹ dopolọ wẹ hiẹ lọsu nọ tindo ya? To whenue a mọ vivẹnu he mẹdevo lẹ to dido nado hẹn homẹ Jehovah tọn hùn, be enẹ ma nọ zọ́n bọ a sọ nọ yiwanna yé dogọ ya?
11. Naegbọn owanyi mítọn na Jehovah po mẹmẹsunnu mítọn lẹ po na sinyẹn hugan gbede pọ́n to aihọn yọyọ lọ mẹ?
11 Todin owanyi mítọn na Jiwheyẹwhe po mẹmẹsunnu mítọn lẹ po sinyẹn, ṣigba e na tlẹ sọ sinyẹn humọ to aihọn yọyọ lọ mẹ. Lẹnnupọndo azọ́n he mí na wà lẹ ji! Mí na dokuavọna mẹhe na yin finfọnsọnku lẹ bo na plọn yé aliho Jehovah tọn lẹ. Aigba dona yin didiọ zun paladisi. Azọ́n ehelẹ ma yin azọ́n pẹvi, ṣigba pọ́n ayajẹ he mí na tindo dile mí na to azọ́nwa dopọ bo na lẹzun mẹpipe vudevude to Ahọluduta Mẹsia tọn glọ! Hugan gbede pọ́n, gbẹtọvi lẹ na dọnsẹpọ ode awetọ po Jiwheyẹwhe yetọn po, yèdọ mẹhe na ‘hẹn pekọ wá na ojlo nutogbẹ̀ lẹpo tọn’ dandan.—Ps. 145:16.
AZỌ́NWIWA DOPỌ HẸ JIWHEYẸWHE NỌ BASI HIHỌ́NA MÍ
12. Nawẹ azọ́n yẹwhehodidọ tọn nọ basi hihọ́na mí gbọn?
12 Mí dona basi hihọ́na haṣinṣan mítọn hẹ Jiwheyẹwhe. Na aihọn he mẹ mí tin te to anademẹ Satani Lẹgba tọn glọ bọ mí sọ yin mapenọ wutu, e bọawu dọ mí ni joawuna nulẹnpọn po nuyiwa aihọn tọn lẹ po. Gbigbọ aihọn tọn sọgan yin yiyijlẹdo tọ̀sisa he dohuhlọn taun de go he jlo na dọ̀n mí yì fie mí ma jlo. Eyin mí ma na yin dindọn yì fie otọ̀ lọ to sisà yì, mí dona yí huhlọn do lìnsin pannukọn tọ̀sisa lọ. Mọdopolọ, mí dona dovivẹnu susu ma nado yin dindọn yì gbọn gbigbọ aihọn Satani tọn dali. To whenue mí to yẹwhehodọ na mẹdevo lẹ, mí nọ ze ayiha do whẹho gbigbọmẹ tọn he yin nujọnu bo nọ hẹn ale wá namẹ lẹ ji, kakati nido yin linlẹn he na dekanpona yise mítọn. (Flp. 4:8) Yẹwhehodidọ nọ hẹn yise mítọn lodo dogọ bo nọ gọalọna mí nado hẹn opagbe po nujinọtedo owanyinọ Jiwheyẹwhe tọn lẹ po do ayiha mẹ. E sọ nọ gọalọna mí ma nado dike nudepope ni jẹdò to gbaja gbigbọmẹ tọn mítọn go.—Hia Efesunu lẹ 6:14-17.
13. Etẹwẹ Kunnudetọ de to Australie nọ lẹn gando yẹwhehodidọ go?
13 Eyin mí hẹn alọnu ján to azọ́n yẹwhehodidọ tọn po nuwiwa gbigbọmẹ tọn devo lẹ po mẹ, mí ma nọ tindo whenu nado to nuhà zẹjlẹgo gando nuhahun mítọn lẹ go, podọ enẹ nọ basi hihọ́na mí. Joel he nọ nọ̀ Australie dọmọ: “Azọ́n yẹwhehodidọ tọn nọ gọalọna mi nado hẹn pọndohlan dagbe go. E nọ flin mi nuhahun he gbẹtọ lẹ to pipehẹ podọ ale he n’ko mọyi na n’to nunọwhinnusẹ́n Biblu tọn lẹ yí do yizan mẹ wutu. Azọ́n yẹwhehodidọ tọn nọ gọalọna mi nado to vivẹnudo bo to whiwhẹnọ yin zọnmii; e nọ hùn dotẹnmẹ dote na mi nado nọ dejido Jehovah go, podọ do mẹmẹsunnu po mẹmẹyọnnu ṣie lẹ po go.”
14. Naegbọn linsinsinyẹn mítọn to azọ́n yẹwhehodidọ tọn mẹ nọ dohia dọ gbigbọ Jiwheyẹwhe tọn to nuyiwa do mí ji?
14 Humọ, yẹwhehodidọ nọ na mí nujikudo dogọ dọ gbigbọ Jiwheyẹwhe tọn tin hẹ mí. Lẹnnupọndo apajlẹ ehe ji: Mí ni dọ dọ mẹde biọ to asi we nado nọ má blẹdi na gbẹtọ he to lẹdo towe mẹ lẹ. Mẹlọ ma na suahọ we na azọ́n lọ, mọ e ma na gọ̀ akuẹ he a zan lẹ jo na we. Nuhe sọ ylan wẹ yindọ, to ojlẹ de godo a wá doayi e go dọ gbẹtọ susu wẹ ma jlo blẹdi lọ podọ mẹdevo lẹ tlẹ gbẹwanna we na azọ́n enẹ he wà a te wutu. Ojlẹ nẹmu wẹ a nado wazọ́n enẹ? Nuyiwa agọ̀ omẹ ehelẹ tọn sọgan zọ́n bọ a na jẹflumẹ bo ma na wazọ́n lọ na ojlẹ dindẹn. Etomọṣo, susu to mí mẹ ko sinyẹnlin to lizọnyizọn lọ mẹ na owhe susu bo nọ yí akuẹ mítọn titi zan do azọ́n lọ tamẹ mahopọnna dọ mẹhe ma yọ́n pinpẹn-nutọn lẹ nọ vlẹ mí kò bo nọ ṣàn mí kò. Be enẹ ma dohia dọ gbigbọ Jiwheyẹwhe tọn to nuyiwa do mí ji ya?
AZỌ́NWIWA HẸ JIWHEYẸWHE NỌ DOHIA DỌ MÍ YIWANNA EWỌ PO MẸDEVO LẸ PO
15. Nawẹ azọ́n yẹwhehodidọ tọn tindo kanṣiṣa hẹ lẹndai Jiwheyẹwhe tọn na gbẹtọvi lẹ gbọn?
15 Lẹnnupọndo lehe yẹwhehodidọ tindo kanṣiṣa hẹ lẹndai owanyinọ Jehovah tọn na gbẹtọvi lẹ do ji. Lẹndai etọn wẹ yindọ gbẹtọvi lẹ ni nọgbẹ̀ to aigba ji bo ma na kú gbede; ṣigba dile etlẹ yindọ Adam waylando, Jehovah ma diọ linlẹn Etọn. (Isa. 55:11) Kakatimọ, e basi tito na gbẹtọvi lẹ nido yin whinwhlẹn sọn whẹgbledomẹ ylando po okú po tọn si. Jesu yinuwa sọgbe hẹ lẹndai enẹ to whenue e wá aigba ji nado yí ogbẹ̀ etọn do sanvọ́ na gbẹtọvi tonusetọ lẹ. Ṣigba, eyin gbẹtọvi lẹ na penugo bo setonu, yé dona mọnukunnujẹ nuhe Jiwheyẹwhe biọ to yé si lẹ mẹ. Enẹwutu, Jesu sọ plọn nubiọtomẹsi Jiwheyẹwhe tọn lẹ gbẹtọvi lẹ, podọ e degbena devi etọn lẹ nado nọ wà nudopolọ. Gbọn alọgigọna mẹdevo lẹ nado gbọwhẹ hẹ Jiwheyẹwhe dali, mí nọ tindo mahẹ tlọlọ to tito owanyinọ etọn nado whlẹn gbẹtọvi lẹ sọn ylando po okú po si mẹ.
16. Nawẹ yẹwhehodidọ mítọn tindo kanṣiṣa hẹ gbedide daho hugan Jiwheyẹwhe tọn lẹ gbọn?
16 Alọgigọna mẹdevo lẹ nado mọ aliho ogbẹ̀ tọn lọ nọ dohia dọ mí yiwanna gbẹtọvi hatọ mítọn lẹ po Jehovah po, “mẹhe ojlo etọn wẹ yindọ gbẹtọ wunmẹ lẹpo ni yin whinwhlẹngán bo wá oyọnẹn he pegan nugbo tọn kọ̀n.” (1 Tim. 2:4) To whenue mẹde kanhose Jesu gando osẹ́n he klo hugan to osẹ́n he yin nina akọta Islaeli tọn lẹpo mẹ go, e gblọn dọmọ: “‘Hiẹ dona yí ahun towe lẹpo, alindọn towe lẹpo, podọ ayiha towe lẹpo do yiwanna Jehovah Jiwheyẹwhe towe.’ Ehe wẹ gbedide lọ he klohugan bosọ yin tintan. Awetọ lọ die, he sọ taidi tintan lọ, ‘Hiẹ dona yiwanna kọmẹnu towe di dewe.’” (Mat. 22:37-39) Mí nọ dohia dọ mí to tonusena gbedide ehelẹ gbọn mahẹ tintindo to azọ́n yẹwhehodidọ tọn mẹ dali.—Hia Owalọ lẹ 10:42.
17. Numọtolanmẹ tẹwẹ a nọ tindo gando gbégbò lọ nado dọyẹwheho go?
17 Dona nankọ die mí tindo! Jehovah ko na mí azọ́n de he nọ hẹn ayajẹ wá na mí, he nọ dọ̀n mí sẹpọ ewọ po mẹdevo lẹ po, bosọ nọ basi hihọ́na haṣinṣan mítọn hẹ ewọ. Azọ́n lọ sọ nọ hùn dotẹnmẹ dote na mí nado do owanyi mítọn hia Jiwheyẹwhe po gbẹtọvi hatọ mítọn lẹ po. Ninọmẹ voovo mẹ wẹ devizọnwatọ Jiwheyẹwhe tọn livi susu lẹ tin te lẹdo aihọn pé, ṣigba vlavo mí yin jọja kavi mẹho, adọkunnọ kavi wamọnọ, tindo huhlọn kavi yin madogánnọ, mímẹpo wẹ to vivẹnudo bo to dotẹnmẹ hundote lẹ dín nado má nuyise mítọn hẹ mẹdevo lẹ. Vlavo hiẹ sọgan kọngbedopọ hẹ mẹmẹyọnnu Chantel he nọ nọ̀ France. E dọmọ: “Mẹhe tindo huhlọn hugan to wẹkẹ lọ mẹ, Didatọ nulẹpo tọn, Jiwheyẹwhe ayajẹnọ lọ wẹ dọna mi dọ: ‘Yì! Dọho! Dọhodo otẹn ṣie mẹ, dọho sọn ahun towe mẹ. N’ko na we huhlọn ṣie, Ohó ṣie Biblu, godonọnamẹ angẹli lẹ tọn, azọ́nwatọgbẹ́ lẹ to aigba ji, azọ́nplọnmẹ sọn ojlẹ de mẹ jẹ devo mẹ, gọna nudọnamẹ he họnwun bo nọ wá do gànmẹ lẹ.’ Lẹblanulọkẹyi nankọ die mí tindo nado wà nuhe Jehovah biọ to mí si lẹ podọ nado wazọ́n dopọ hẹ Jiwheyẹwhe mítọn!”
