1. Alọwle

Pọndohlan voovo lẹ wẹ mẹlẹ nọ do gando alọwle go podọ gando nuhe e nọ biọ nado do ayajẹ to alọwle mẹ go.

NUHE E ZẸẸMẸDO: Alọwle yin tito de he Jiwheyẹwhe zedai, enẹwutu ewọ yọ́n nuhe asu po asi po de do hudo etọn nado do ayajẹ. (Malku 10:6-9) Ayajẹ nọ tin eyin alọwlemẹ lẹ ze ayidonugo do nuhe dopodopo yetọn gán wà nado hẹn alọwle yetọn lodo ji, e ma yin do nuhe dopodopo yetọn gán mọyi ji. Asu de he yiwanna asi ẹ na nọ do ehe hia to aliho he mẹ e nọ yinuwa hẹ ẹ bosọ nọ penukundego te mẹ. Podọ, asi de he nọ do sisi hia asu etọn na nọ wàmọ to aliho he mẹ e nọ dọhona ẹn bosọ nọ yinuwa hẹ ẹ te.

ANADEMẸ BIBLU TỌN NỌ WAZỌ́N: Quang po Thi po he wá sọn Vietnam, lẹndọ yé ma gán do ayajẹ gbede to alọwle yetọn mẹ. Quang ma nọ saba jọmẹ. E dọmọ: “N’ma nọ hò numọtolanmẹ Thi tọn lẹ pọ́n, bosọ nọ saba de e pò.” Thi jlo na basi gbẹdai. Yọnnu lọ dọmọ: “N’lẹndọ n’ma gán sọ dejido asu e go kavi na ẹn sisi gbede ba.”

To godo mẹ, Quang po Thi po plọn nuhe Biblu dọ gọna lehe yé gán yí Efesunu lẹ 5:33 do yizan mẹ to alọwle yetọn mẹ do. Quang dọmọ: “Wefọ ehe gọalọna mi nado mọdọ nujọnu wẹ e yin nado nọ jọmẹ bo nọ yinuwa hẹ Thi to aliho he mẹ e na mọ te dọ n’yiwanna emi bosọ nọ penukundo nuhudo emitọn lẹ go to agbasa-liho podọ to numọtolanmẹ-liho. Whenue n’wàmọ, asi ṣie yiwanna mi bosọ nọ do sisi hia mi.” Podọ Thi dọmọ: “Lehe n’to Efesunu lẹ 5:33 yí do yizan mẹ bosọ nọ do sisi hia asu ṣie do sọ, mọ wẹ ewọ lọsu nọ dohia dọ emi yiwanna mi bo nọ basi hihọ́na mi bọ n’sọ nọ do numọtolanmẹ dọ n’vò dogọ do niyẹn.”

 2. Lehe Mí Dona Nọ Yinuwa hẹ Mẹdevo lẹ Do

Mẹlẹ nọ saba yinuwa hẹ mẹdevo lẹ to aliho agọ̀ mẹ sọgbe hẹ akọ̀, otò, awusọhia, sinsẹ̀n kavi pọndohlan mẹlọ tọn do zanhẹmẹ wunmẹ he sọgbe ji.

NUHE E ZẸẸMẸDO: Biblu ma kẹalọyi akọ̀ ṣinṣinyan, wangbẹna tintindo na mẹhe nọ doalọ to zanhẹmẹ mẹhe tindo vijinu dopolọ lẹ ṣẹnṣẹn tọn mẹ lẹ, kavi budidi na mẹhe wá sọn otò devo mẹ lẹ. Kakatimọ, e na mí tuli nado nọ na sisi gbẹtọ wunmẹ lẹpo mahopọnna akọ̀, otò, kavi vlavo yé yin adọkunnọ kavi wamọnọ. (Owalọ lẹ 10:34) Eyin mí ma tlẹ kọngbedopọ hẹ nuhe mẹdevo lẹ yise kavi lehe yé nọ yinuwa do, mí gán gbẹ́ nọ do homẹdagbe po sisi po hia yé.—Matiu 7:12.

ANADEMẸ BIBLU TỌN NỌ WAZỌ́N: Oplọn he Daniel mọyi zọ́n bọ e nọ pọ́n mẹhe wá sọn Asie lẹ taidi owùnu na otò etọn. E wá gbẹwanna mẹhe wá sọn Asie lẹpo bo tlẹ nọ saba zun yé to mẹmẹ. Daniel dọmọ: “N’dín whẹjijọ na nuyiwa ṣie bo nọ dọ dọ ‘nugbonọ-yinyin na otò ṣie’ wẹ zọ́n bọ n’nọ yinuwa do mọ. N’ma tlẹ nọ mọdọ lehe n’nọ lẹnnupọn kavi nọ yinuwa do ma sọgbe.”

To nukọn mẹ, Daniel wá plọn nuhe Biblu dọ. Daniel dọmọ: “N’dona diọ pọndohlan ṣie petepete. N’dona nọ pọ́n mẹlẹ hlan dile Jehovah nọ wà do, enẹ wẹ yindọ mímẹpo wẹ yin nudopolọ mahopọnna fie mí wá sọn.” Daniel dọ lehe e nọ ṣí na ẹn todin eyin e dukosọna gbẹtọ lẹ. E dọmọ: “To paa mẹ, n’ma tlẹ nọ lẹnnupọndo fie yé wá sọn ji. N’yiwanna gbẹtọ wunmẹ lẹpo todin bosọ tindo họntọn alọmayiemẹ lẹ sọn awà voovo aihọn lọ tọn lẹpo ji.”

 3. Akuẹ

Mẹsusu wẹ nọ doafọna adọkunnu lẹ nado do ayajẹ podọ na sọgodo yetọn nido pọnte.

NUHE E ZẸẸMẸDO: Mí do hudo akuẹ tọn, amọ́ mí ma dona ganjẹ e go nado tindo ayajẹ kavi sọgodo dagbe de. (Howhinwhẹn lẹ 18:11; 23:4, 5) Kakatimọ, ayajẹ nujọnu tọn po sọgodo he tindo hihọ́ de po nọ sinai do lehe mí nọ yí nuyọnẹn Jiwheyẹwhe tọn he to Biblu mẹ do yizan mẹ do ji.—1 Timoti 6:17-19.

ANADEMẸ BIBLU TỌN NỌ WAZỌ́N: Cardo he yin dawe de to Indonésie ze ayiha do adọkunnu lẹ tintindo ji. E dọmọ: “N’duvivi nuhe mẹsusu nọ kudlọ yetọn lẹ tọn. N’nọ zingbejizọnlin, bosọ nọ họ̀ onú akuẹgegenu tọn lẹ, mọto po owhé lẹ po.” Amọ́, adọkun enẹ ma dẹn-to-aimẹ. Cardo dọmọ: “Yé jẹajo do mi, bọ akuẹ he n’jẹtukla sinsinyẹn na owhe lẹ do dín wá yì do mi to nukunwhiwhe dopo mẹ. N’ko yí gbẹzan ṣie do doafọna agbasanu lẹ, amọ́ wagbọ-wagbọ etọn, numọtolanmẹ tuklajijẹ do ovọ́ mẹ, nuvọ́nọ-yinyin po flumẹjijẹ po tọn wẹ wá yin kọdetọn lọ.”

Cardo jẹ ayinamẹ Biblu tọn gando akuẹ go yido yizan mẹ ji. E masọ nọ yí huhlọn etọn lẹpo zan nado nọ bẹ adọkunnu lẹ pli ba, amọ́ e de nado zan gbẹzan he to jlẹkaji de. E dọmọ: “Adọkunnu nujọnu tọn he nọ dẹn-to-aimẹ lẹ wẹ onú gbigbọ tọn lẹ. Todin, n’gán nọ damlọn yìkànmẹ to ozán lẹpo mẹ, podọ n’do ayajẹ nujọnu tọn.”

 4. Zanhẹmẹ

Pọndohlan voovo wẹ mẹlẹ nọ tindo gando nuhe yin alọkẹyi to zanhẹmẹ-liho ji go.

NUHE E ZẸẸMẸDO: Biblu ze dogbó lẹ dai na nuhe dù lehe mí na nọ hẹn pekọ wá na ojlo zanhẹmẹ tọn mítọn lẹ do. Hogbe lọ he yin lilẹdo “fẹnnuwiwa zanhẹmẹ tọn” nọ bẹ ayọdide, galilọ, kọndopọ zanhẹmẹ tọn to mẹhe ma ko wlealọ lẹ ṣẹnṣẹn po zanhẹmẹ to vijinu dopolọ lẹ ṣẹnṣẹn po hẹn gọna zanhẹmẹ gbẹtọ po kanlin po tọn. (1 Kọlintinu lẹ 6:9, 10) Nunina de wẹ kọndopọ zanhẹmẹ tọn yin sọn Jiwheyẹwhe dè, podọ linlẹn Jehovah tọn wẹ yindọ e ni wá aimẹ to sunnu po yọnnu po he wlealọ lẹ kẹdẹ ṣẹnṣẹn.—Howhinwhẹn lẹ 5:18, 19.

ANADEMẸ BIBLU TỌN NỌ WAZỌ́N: Nawe de to Australie he nọ yin Kylie dọmọ: “Whenue n’to tlẹnmẹ n’nọ lẹndọ eyin n’do kọndopọ zanhẹmẹ tọn, n’na mọdọ yè yiwanna mi bọ n’sọ to hihọ́ glọ. Amọ́ lalo pete wẹ. N’do numọtolanmẹ dọ n’to owù mẹ, bosọ jẹflumẹ.”

To nukọn mẹ, Kylie plọn nuhe Biblu dọ gando zanhẹmẹ go bosọ yí i do yizan mẹ. E dọmọ: “N’gán dọ dọ nujinọtedo Jiwheyẹwhe tọn lẹ tin to finẹ nado basi hihọ́na mí sọn awufiẹsa po nuhe nọ gbleawunamẹ lẹ po si. Todin, n’nọ mọdọ n’to hihọ́ glọ bọ yè sọ yiwanna mi na n’to nulẹ wà dile Jehovah jlo do wutu. Anademẹ Biblu tọn lẹ yíyí do yizan mẹ ko whlẹn mi sọn nuhahun susu lẹ si!”