To Whẹndo mẹ Podọ to Họntọnjiji Mẹ
E nọ vẹawu na mẹsusu nado hẹn haṣinṣan dagbe de go hẹ mẹdevo lẹ. Pọ́n ayinamẹ Biblu tọn delẹ he gán gọalọna we nado hẹn haṣinṣan towe hẹ mẹdevo lẹ pọnte.
MA YIN ṢEJANNABINỌ BLO
AYINAMẸ BIBLU TỌN: “Ma nọ ze ayidonugo do ale mẹdetiti tọn [towe] lẹ kẹdẹ ji, ṣigba do ale mẹdevo lẹ tọn ji ga.”—Filipinu lẹ 2:4.
NUHE E ZẸẸMẸDO: Eyin mí na do haṣinṣan dagbe hẹ mẹlẹ, mí dona nọ wà dagbe na yé bo ma na nọ donukun nude sọn yé si. Eyin a yin ṣejannabinọ, a gán hẹn haṣinṣan towe hẹ mẹdevo lẹ gble. Di apajlẹ, ṣejannabi gán zọ́n bọ asu kavi asi de na deayọ. Humọ, eyin mẹde nọ yigo, e na vẹawu dọ ni do họntọn. Abajọ owe de dọ dọ, “mẹhe yin ṣejannabinọ lẹ nọ to nuhahun do mapote.”—The Road to Character.
NUHE A GÁN WÀ:
-
Nọ gọalọna mẹdevo lẹ. Eyin họntọn-họntọn lẹ na vẹ́ ganji, yé dona nọ dejido ode awetọ go bosọ nọ gọalọna yede. Sọgbe hẹ dodinnanu delẹ, mẹhe nọ gọalọna mẹdevo lẹ nọ do ayajẹ taun bo ma nọ yawu tlọ biọ flumẹjijẹ sinsinyẹn mẹ.
-
Nọ do awuvẹmẹ hia. Awuvẹmẹ zẹẹmẹdo nado sè vivẹ́ hẹ mẹhe to yaji. Eyin a nọ do awuvẹmẹ hia, e na vẹawu dọ a ni nọ yìn aslan mẹdèpo tọn lẹ gando mẹdevo lẹ go.
Awuvẹmẹ didohia sọ nọ zọ́n bọ mí nọ há po mẹdevo lẹ po. Gbọnmọ dali, awuvẹmẹ gán gọalọna we ma nado ṣinyan akọ̀, bọ a nasọ jihọntọn hẹ mẹhe ma to ninọmẹ dopolọ mẹ hẹ we lẹ.
-
Nọ yí whenu zan hẹ mẹdevo lẹ. Whenu zinzan dopọ hẹ mẹdevo lẹ na gọalọna we nado jẹakọ hẹ yé. Hodọdopọ dagbe hẹ mẹdevo lẹ yin nujọnu nado vẹ́ po yé po. Enẹwutu, nọ yin todoaitọ dagbe. Nọ do ojlo hia to nuhe yin nujọnu na họntọn towe lẹ mẹ. To agọe, dodinnanu de dohia dọ “e tlẹ yọnbasi dọ mẹhe nọ tindo hodọdopọ dagbe hẹ mẹdevo lẹ ni do ayajẹ taun.”
NỌ YÍ NUYỌNẸN DO DE HỌNTỌN TOWE LẸ
AYINAMẸ BIBLU TỌN: “Gbẹdido ylankan lẹ nọ hẹn walọ dagbe lẹ gble.”—1 Kọlintinu lẹ 15:33.
NUHE E ZẸẸMẸDO: Mẹhe a nọ dogbẹ́ hẹ lẹ na yinuwado walọ towe ji dandan, vlavo to aliho dagbe kavi ylankan mẹ. Weyọnẹntọ lẹ dohia dọ mẹhe mí nọ dogbẹ́ hẹ lẹ gán yinuwado gbẹzan mítọn ji. Di apajlẹ, yé dọ dọ eyin mí nọ dogbẹ́ hẹ mẹhe nọ nù azọ̀ kavi mẹhe nọ yawu gbẹ́ mẹhe yé dà dai lẹ, e yọnbasi dọ mílọsu ni wá jẹ azọ̀ nù ji kavi kàn ayiha nado gbẹ́ mẹhe mí dà dai.
NUHE A GÁN WÀ: Nọ dogbẹ́ hẹ mẹhe tindo walọ he a yiwanna bọ hiẹ lọsu na jlo nado tindo lẹ. Di apajlẹ, nọ dogbẹ́ hẹ mẹhe nọ do zinzin hia, nọ sí mẹdevo lẹ, nọ nanúmẹ bosọ nọ hẹjómẹ lẹ.
AYINAMẸ BIBLU TỌN DEVO LẸ
Pọ́n video sinai do Biblu ji lẹ he ko gọalọna asu po asi po lẹ, jọja lẹ po yọpọvu lẹ po nado mọ ayajẹ to whẹndo yetọn mẹ
NỌ DAPANA HOGBE HE GÁN HẸN HOMẸGBLE MẸDEVO LẸ.
“Ohó he yè ma lẹnnupọn whẹpo do dọ nọ taidi ohísọmẹ.”—HOWHINWHẸN LẸ 12:18.
NỌ NANÚMẸ.
“Alọtlútọ na tindo kọdetọn dagbe.”—HOWHINWHẸN LẸ 11:25.
NỌ YINUWA HẸ MẸDEVO LẸ DILE A JLO DỌ YÉ NI YINUWA HẸ WE DO.
“Nudepope he mìwlẹ jlo dọ gbẹtọ lẹ ni nọ wà na mì, mọ wẹ mìlọsu dona nọ wà na yé do.”—MATIU 7:12.
