Kanbiọ lẹ Sọn Wehiatọ lẹ Dè

Be Islaelivi lẹ nọ hù sẹ́nhẹngbatọ lẹ gbọn pipla yé do pòtin go dali wẹ ya?

▪ To hohowhenu, akọta susu wẹ nọ hù sẹ́nhẹngbatọ delẹ gbọn whiwhè yé do pòtin de kavi dòtin de go dali. Di apajlẹ, Lomunu lẹ nọ blá kavi whè omẹ mọnkọtọn de do pòtin go to gbangba, bọ e sọgan nọ finẹ na azán susu bo wá kú na nugbla, huvẹ po awufiẹsa po. Lomunu lẹ nọ pọ́n mẹhe yin whiwhè do núgo hlan taidi mẹhe mọ yasanamẹ he jẹna sẹ́nhẹngbatọ he ma yin gbẹtọ nukundeji lẹ yí.

Etẹwẹ dogbọn akọta Islaeli hohowhenu tọn dali? Be Islaelivi lẹ nọ hù sẹ́nhẹngbatọ lẹ gbọn pipla yé do pòtin go dali wẹ ya? Osẹ́n Mose tọn dọmọ: “Eyin sunnusi de ko wà ylando de he jẹna okú, bọ ewọ sọ yin hùhù, bọ hiẹ ze e plá atin de go; agbasa etọn ma na nọ atin lọ ji to ozán lẹpo mẹ gba, ṣigba hiẹ na di i to gbèdopo nẹ dandan.” (Deut. 21:22, 23) Enẹwutu, e họnwun dọ to ojlẹ he mẹ Owe-Wiwe Heblu tọn lẹ yin kinkan te, mẹhe jẹna okú de nọ yin hùhù whẹpo do nọ yin zizepla do pòtin kavi atin de go.

Enẹwutu, Levitiku 20:2 dọmọ: “Mẹdepope ewọ yin sọn ovi Islaeli tọn lẹ mẹ, kavi sọn jonọ lẹ lọ mẹ he wáwáṣi to Islaeli mẹ, he na sọn okún etọn mẹ hlan Moleki: e na yin hùhù dandan: omẹ aigba lọ tọn lẹ na yí zannu lẹ do dlan zannu do e.” Mẹhe tindo “gbigbọ aovi tọn, kavi he yin azétọ de” dona yin hùhù ga. Gbọnna? ‘Yé na dlan zannu lẹ do yé.’—Lev. 20:27.

Mí hia to Deutelonomi 22:23, 24 mẹ dọmọ: “Eyin yọnnuvu de tin he yin awhli de yin didà hlan asu de, bọ sunnusi de mọ ẹn to tòdaho lọ mẹ, bo kọndopọ hẹ ẹ; whenẹnu mì na hẹn yé awe lẹ jẹgbonu jẹ họngbo tòdaho nẹ tọn lọ kọ̀n, mì bo na yí zannu lẹ do dlan zannu do yé, na yé ni kú; yọnnuvu lọ, na e ma dawhá wutu, tintin to tòdaho lọ mẹ podọ sunnu lọ, na e ko hòhuwhẹ asi kọmẹnu etọn tọn wutu: mọ wẹ hiẹ na de oylan lọ sẹ̀ sọn gblagbla towe mẹ do.” Enẹwutu, aliho tangan he mẹ Islaelivi dowhenu tọn lẹ nọ hù sẹ́nhẹngbatọ de te wẹ gbọn zannu dindlan do e dali. a

Deutelonomi 21:23 dọ dọ, “ewọ he yè ze plá yin mẹhodẹ̀do sọn Jiwheyẹwhe dè.” Ayihaawe ma tin dọ oṣiọ mẹylankan he yin “mẹhodẹ̀do sọn Jiwheyẹwhe dè” lọ tọn didohia to gbangba na ko nọ yinuwa do Islaelivi lẹ ji. Na nugbo tọn, oṣiọ mẹhe yin hùhù lọ tọn zizepla do pòtin kavi atin de go nọ yin avase de na mẹdevo lẹ.

[Nudọnamẹ odò tọn]

[Nudọnamẹ tangan lẹ to weda 13]

E họnwun dọ to ojlẹ he mẹ Owe-Wiwe Heblu tọn lẹ yin kinkan te, mẹhe jẹna okú de nọ yin hùhù whẹpo do nọ yin zizepla do pòtin kavi atin de go