Mí Sọgan Gbọṣi Wiweji
“Mì klọ́ alọ mìtọn lẹ wé, . . . bosọ lẹ̀ ahun mìtọn lẹ wé. —JAK. 4:8.
1. Nukun tẹwẹ gbẹtọ lẹ nọ yí do pọ́n wiwejininọ to walọyizan-liho?
MẸSUSU ma nọ ylọ wiwejininọ to walọyizan-liho dọ nujọnu. Nugbo titengbe de wẹ ehe yin to ojlẹ mítọn mẹ. To otò susu mẹ, zanhẹmẹ to mẹhe tindo vijinu dopolọ lẹ ṣẹnṣẹn, podọ nado zanhẹ mẹhe ma yin alọwlemẹ mẹtọn nọ yin pinpọnhlan taidi nuhe sọgbe. Walọyizan ehelẹ nọ yin didohia to ajọjijla lẹ po ayidedai lẹ po mẹ taidi nuhe ma ylan. (Ps. 12:8) Lehe fẹnnuwiwa gbayipe do sọgan hẹn we nado kanse dọ, ‘Be e yọnbasi nugbonugbo nado gbọṣi wiweji to walọyizan-liho ya?’ Gblọndo ahundopo tọn mítọn wẹ yin mọwẹ, na po alọgọ Jehovah tọn po, Klistiani nugbo lẹ sọgan gbọṣi wiweji.—Hia 1 Tẹsalonikanu lẹ 4:3-5.
2, 3. (a) Naegbọn e do yin nujọnu nado nọ hoavùn sọta ojlo mawé lẹ? (b) Etẹwẹ mí na gbadopọnna to hosọ ehe mẹ?
2 Tintan whẹ́, mí dona mọnukunnujẹemẹ dọ eyin mí na penugo nado gbọṣi wiweji to gbẹzan mítọn mẹ, mí dona nọ gbẹ́ ojlo mawé lẹ dai. Kẹdẹdile núdùdù he yè yí do onù omlẹn de tọn nọ dọ̀n whèvi de do, mọ wẹ linlẹn mawé po ojlo fẹnnuwiwa tọn lẹ po sọgan yinuwado Klistiani de ji vudevude bo doyẹklọ ẹ do, eyin e ma nọ gbẹ́ yé dai to afọdopolọji. Yé sọgan yinuwado agbasa mape mítọn ji, bo hẹn mí nado doalọ to walọ mawé lẹ mẹ. To nukọn mẹ, ylando lọ nọ dọnmẹ to aliho sinsinyẹn mẹ sọmọ bọ ojlo mawé lọ nọ mọhò. To ojlẹ enẹ mẹ, devizọnwatọ Jehovah tọn de tlẹ sọgan yinuwa sọgbe hẹ ojlo etọn tlolo he dotẹnmẹ de wá hundote na ẹn. Na nugbo tọn, “ojlo . . . nọ ji ylando.”—Hia Jakọbu 1:14, 15.
3 Nuhe sọgbe wẹ e yin nado lẹnnupọndo lehe ojlo vude tintindo sọgan zindonukọn bo dekọtọn do ylando sinsinyẹn de mẹ do ji. Ṣigba, tulinamẹnu wẹ e yin nado yọnẹn dọ, eyin mí ma nọ dike ojlo mawé lẹ ni doadọ̀do to ahun mítọn mẹ, enẹ na gọalọna mí ma nado jai jẹ fẹnnuwiwa mẹ, bo jiya kọdetọn ylankan he e nọ hẹnwa lẹ tọn. (Gal. 5:16) Mì gbọ mí ni gbadopọnna onú atọ̀n he na gọalọna mí nado hoavùn sọta ojlo mawé lẹ: enẹ wẹ haṣinṣan mítọn hẹ Jehovah, ayinamẹ he tin to Ohó etọn mẹ lẹ, po alọgọ Klistiani hatọ he whèwhín lẹ tọn po.
“MÌ DỌNSẸPỌ JIWHEYẸWHE”
4. Naegbọn e do yin nujọnu dọ mí ni dọnsẹpọ Jehovah?
4 Biblu na anademẹ mẹhe jlo na “dọnsẹpọ Jiwheyẹwhe” lẹ dọmọ: “Mì klọ́ alọ mìtọn lẹ wé, . . . bosọ lẹ̀ ahun mìtọn lẹ wé.” (Jak. 4:8) To whenue mí ylọ haṣinṣan mítọn hẹ Jehovah dọ nujọnu, mí nọ dovivẹnu nado hẹn homẹ etọn hùn to adà gbẹzan mítọn tọn lẹpo mẹ, kakajẹ nuhe mí nọ lẹn lẹ ji. Mí nọ dohia dọ mí jlo na tindo ‘ahun wiwe de,’ gbọn ayiha mítọn zizedo nuhe yin wiwe, jijọ dagbe, po nuhe jẹna pipà lẹ po ji dali. (Ps. 24:3, 4; 51:6; Flp. 4:8) Na nugbo tọn, Jehovah nọ jona mí, na e yọnẹn dọ mapenọ wẹ mí yin wutu. E yọnẹn dọ ojlo he ma sọgbe lẹ sọgan fọ́n to ahun mítọn mẹ. Ṣigba, e họnwun na mí dọ homẹ etọn ma nọ hùn eyin mí natẹn linlẹn he ma sọgbe lẹ nado whẹ́n to ahun mítọn mẹ, kakati nado wà nuhe go mí pé lẹpo bo gbẹ́ yé dai. (Gẹn. 6:5, 6) Nulinlẹnpọn do ehe ji nọ gọalọna mí nado magbe hugan gbede pọ́n nado hẹn linlẹn mítọn lẹ do wiweji.
5, 6. Nawẹ dẹ̀hiho sọgan gọalọna mí nado hoavùn sọta ojlo mawé lẹ gbọn?
5 Aliho titengbe dopo he mẹ mí sọgan do jidide mlẹnmlẹn mítọn to Jehovah mẹ hia te wẹ nado nọ hodẹ̀ whẹwhẹ gando avùn he mí to hihò sọta linlẹn mawé lẹ go. To whenue mí dọnsẹpọ Jehovah to odẹ̀ mẹ, ewọ lọsu nọ dọnsẹpọ mí. E nọ gbọn alọtútlú dali na mí gbigbọ wiwe etọn, bọ ehe nọ gọalọna mí nado hẹn gbemima mítọn lodo nado nọavùnte sọta linlẹn mawé lẹ bo gbọṣi wiweji. Enẹwutu, mì gbọ mí ni hẹn zun yinyọnẹn na Jiwheyẹwhe dọ ojlo ahundopo tọn mítọn wẹ yindọ, nuhe ji mí nọ lẹnayihamẹpọn do lẹ ni nọ hẹn homẹ etọn hùn. (Ps. 19:14) Be mí nọ gbọn whiwhẹ dali biọ to e si nado gbeje mí pọ́n nado yọnẹn eyin “aliho ylankan,” yèdọ ojlo kavi linlẹn depope he ma sọgbe tin to ahun mítọn mẹ, ehe sọgan sisẹ́ mí nado waylando ya? (Ps. 139:23, 24) Be mí nọ vẹvẹna ẹn to gbesisọ mẹ dọ ni gọalọna mí nado hẹn tenọgligo to whenue mí pehẹ whlepọn de ya?—Mat. 6:13.
6 Lehe mí yin pinplọn whẹ́n do kavi walọ he mí zan wayi lẹ sọgan zọ́n bọ mí na nọ jlo nado doalọ to walọ he Jehovah gbẹwanna lẹ mẹ. Etlẹ yin to ninọmẹ enẹ mẹ, ewọ sọgan gọalọna mí nado basi diọdo he jẹ lẹ, na mí nido sọgan to sinsẹ̀n ẹn zọnmii to aliho he e kẹalọyi mẹ. Ahọlu Davidi yọ́n nugbo ehe. To whenue Davidi deayọ hẹ Bati-ṣeba godo, e vẹ̀ Jehovah dọmọ: “Dá ayiha yọyọ de na mi, . . . bosọ hẹn ayiha nugbo tọn jẹ yọyọ to ohò ṣie mẹ.” (Ps. 51:10, 12) Na mí yin mapenọ wutu, mí sọgan nọ tindo ojlo to walọ ylankan lẹ mẹ, ṣigba Jehovah sọgan gọalọna mí nado tindo ojlo dagbe, yèdọ ojlo lọ nado setonuna ẹn. Eyin ojlo he ma sọgbe lẹ tlẹ doadọ̀do to ahun mítọn mẹ bo nọ glọnalina mí nado lẹnnupọndo nuhe yin wiwe lẹ ji, Jehovah sọgan deanana afọdide mítọn, na mí nido penugo nado setonuna gbedide etọn lẹ bo nọgbẹ̀ sọgbe hẹ yé po kọdetọn dagbe po. Ewọ sọgan basi hihọ́na mí na onú ylankan depope nikaa dohuhlọn do mí ji.—Ps. 119:133.
Eyin ojlo he ma sọgbe de fọ́n bo jẹ adọ̀ do ji to ahun mítọn mẹ, mí dona de e sẹ̀ (Pọ́n hukan 6)
“MÌ LẸZUN BASITỌ OHÓ LỌ TỌN LẸ”
7. Nawẹ Ohó Jiwheyẹwhe tọn sọgan gọalọna mí nado dapana linlẹn mawé lẹ gbọn?
7 Jehovah sọgan na gblọndo na odẹ̀ he mí nọ hò nado biọ alọgọ lẹ gbọn Ohó etọn Biblu gblamẹ. Nuyọnẹn he tin Ohó Jiwheyẹwhe tọn mẹ “wé.” (Jak. 3:17) Eyin mí nọ hia Biblu egbesọegbesọ bo nọ lẹnayihamẹpọn do nuhe mí hia lẹ ji, enẹ sọgan gọalọna mí nado basi hihọ́na ayiha mítọn sọta linlẹn mawé lẹ. (Ps. 19:7, 11; 119:9, 11) Humọ, Biblu bẹ apajlẹ po ayinamẹ tangan delẹ po hẹn, ehe sọgan gọalọna mí ma nado joawuna ojlo mawé lẹ.
8, 9. (a) Etẹwẹ hẹn dẹpẹ de nado dukosọ hẹ yọnnu fẹnnuwatọ de? (b) Ninọmẹ egbezangbe tọn tẹlẹ mẹ wẹ mí sọgan yí apajlẹ avase tọn he tin to Howhinwhẹn lẹ weta 7 mẹ do yizan mẹ te?
8 Howhinwhẹn lẹ 5:8 dọmọ: “De aliho towe do olá sọn [yọnnu fẹnnuwatọ] dè, a sọ sẹpọ họntonu owhé etọn tọn blo.” Owù he tin to nukunpẹvi yíyí do pọ́n ayinamẹ ehe mẹ yin didohia to Howhinwhẹn lẹ weta 7 mẹ, he dọho gando dẹpẹ de go he disa gbọn fie sẹpọ owhé yọnnu fẹnnuwatọ de tọn gbè. Ozán ko to kúkú. Yọnnu lọ he nusisọ́ etọn na ko do omẹ́ hia dukosọna dẹpẹ lọ to aliklan de ji. E gbò dẹpẹ lọ fán bo donùnùgo na ẹn. Hodidọ yẹdoklọmẹ tọn etọn fọnjlodotena dẹpẹ lọ, bọ e ma penugo nado duto ojlo lọ ji. Podọ, yé doalọ to fẹnnuwiwa zanhẹmẹ tọn mẹ. E yọnbasi dọ dẹpẹ lọ ma tindo linlẹn nado doalọ to fẹnnuwiwa mẹ. Dẹpẹ lọ ma tindo numimọ podọ zinzin whèdo e. Etomọṣo, e dona jiya kọdetọn ylankan he nuyiwa etọn hẹnwa lẹ tọn. Eyin e ko yọnẹn wẹ, e na ko dapana yọnnu lọ!—Howh. 7:6-27.
9 Be mílọsu sọgan yinuwa taidi mẹhe zinzin whèdo to whedelẹnu bo hẹn míde biọ ninọmẹ ylankan he sọgan fọ́n ojlo he ma sọgbe lẹ dote to ahun mítọn mẹ ya? Di apajlẹ, azọ́nwatẹn televiziọn tọn lẹ sọgan nọ do nuhe ma sọgbe lẹ hia to zánmẹ. Etẹwẹ lo eyin mí nọ to tintọ́n sọn nọtẹn televiziọn tọn de ji yì devo ji? Kavi mí nọ yì nọtẹn Intẹnẹt tọn voovo lẹ ji matin yanwle depope kavi nọ yì nọtẹn hodọdopọ Intẹnẹt ji tọn he nọ do yẹdide fẹnnuwiwa tọn lẹ kavi fie yè sọgan mọ yé te lẹ hia. To ninọmẹ mọnkọtọn lẹ mẹ, be e yọnbasi dọ mí ni mọ nudepope he sọgan fọ́n ojlo agọ̀ dote to ahun mítọn mẹ, he na de huhlọn pò na gbemima mítọn nado gbọṣi wiweji ya?
10. Naegbọn aihun gblewa tọn didà do yin owùnu? (Pọ́n yẹdide he tin to bẹjẹeji hosọ ehe tọn.)
10 Aliho devo he mẹ Biblu nọ gọalọna mí te wẹ yindọ, e nọ na mí ayinamẹ gando lehe mí na yinuwa hẹ omẹ vijinu awetọnọ lẹ do go. (Hia 1 Timoti 5:2.) Ayinamẹ mọnkọtọn lẹ jẹagọdo aihun gblewa tọn didà. Mẹdelẹ sọgan nọ pọ́n agbasa yido dọho, po nukun bibayi namẹ to aliho owanyi didohia tọn mẹ po hlan taidi nuhe ma ylan, na onú enẹlẹ ma bẹ alọdomẹgo hẹn wutu. Ṣigba, aihun gblewa tọn didà hẹ mẹde kavi alọkikẹyi aihun mọnkọtọn, sọgan fọ́n linlẹn mawé lẹ dote, ehe na dekọtọn do ylando sinsinyẹn mẹ. Enẹ ko jọ pọ́n, podọ e sọgan gbẹ́ jọ.
11. Apajlẹ dagbe tẹwẹ Josẹfu zedai na mí?
11 Josẹfu yinuwa po nuyọnẹn po to whẹho ehe mẹ. To whenue asi Pọtifali tọn, yèdọ asi ogán etọn tọn tẹnpọn nado dọ̀n Josẹfu biọ fẹnnuwiwa mẹ, e nọ gbẹ́ nuzedonukọnnamẹ yọnnu lọ tọn lẹ dai. Ṣigba, yọnnu lọ gbẹ́ zindonukọn. Egbesọegbesọ wẹ e nọ to oylọ-basina Josẹfu nado nọpọ́ hẹ emi. (Gẹn. 39:7, 8, 10) Sọgbe hẹ weyọnẹntọ he nọ basi zẹẹmẹdo Biblu ji de, nuhe asi Pọtifali tọn jlo na dọ wẹ yindọ: “‘Gbọ mí omẹ awe lẹ kẹdẹ ni nọpọ́ na ojlẹ vude,’ po todido lọ po dọ [Josẹfu] na ze afọdide tintan lọ.” Ṣigba, Josẹfu magbe ma nado kẹalọyi yẹdoklọmẹ etọn, kavi tlẹ na ẹn dotẹnmẹ nado zindonukọn. E gbẹ́ aihun gblewa tọn yọnnu lọ tọn lẹ dai, podọ e ma nọ daihun mọnkọtọn hẹ ẹ, ehe zọ́n bọ ojlo ylankan depope ma doadọ̀do to ahun etọn mẹ. To whenue e tẹnpọn nado hẹn Josẹfu po huhlọn po nado zanhẹ ẹ, Josẹfu yinuwa po adọgbigbo po. “Ewọ sọ jo avọ̀ etọn do alọ [yọnnu lọ tọn] mẹ, bo họ̀n bo jẹgbonu.”—Gẹn. 39:12.
12. Nawẹ mí wagbọn do yọnẹn dọ nuhe mí nọ pọ́n lẹ nọ yinuwado ahun mítọn ji?
12 Biblu sọ na mí avase gando owù he mẹ mí sọgan jai jẹ go, eyin mí nọ dike nukun mítọn ni yinuwado ahun mítọn ji to aliho agọ̀ mẹ. Nukun he nọ to nulẹpo pọ́n sọgan fọ́n ojlo fẹnnuwiwa tọn dote kavi hẹn ojlo mọnkọtọn sinyẹn deji. Jesu na avase dọ “mẹdepope he zindonukọn nado to yọnnu de pọ́n kaka bo tindo ojlo zogbe de na ẹn ko deayọ hẹ ẹ dote to ahun etọn mẹ.” (Mat. 5:28) Flin nuhe jọ do Ahọlu Davidi go. “Sọn aga ohọ̀ [etọn tọn, Davidi] mọ nawe de to awulẹ.” (2 Sam. 11:2) E gboawupo nado de nukun etọn sẹ̀ podọ nado ze ayiha etọn do nudevo ji. Ehe zọ́n bọ e tindo ojlo na asi mẹdevo tọn bo ze afọdide lẹ nado lọga hẹ yọnnu lọ.
13. Naegbọn mí dona ‘basi alẹnu hẹ nukun mítọn lẹ,’ podọ etẹwẹ enẹ bẹhẹn?
13 Nado nọavùnte sọta odlọ kléwhète tọn kúkú do fẹnnuwiwa ji, mí dona ‘basi alẹnu hẹ nukun mítọn lẹ,’ dile Job nugbonọ lọ wà do. (Job 31:1, 7, 9) Mí dona magbe sinsinyẹn nado nọ deanana nukun mítọn lẹ, bo ma na nọ dike yé ni pọ́n mẹdevo lẹ po ojlo fẹnnuwiwa tọn po. Ehe biọ dọ mí ni nọ deanana nukun mítọn ma nado nọ pọ́n yẹdide fẹnnuwiwa tọn lẹ vlavo to Intẹnẹt ji, to owhlẹ daho ajọjijla tọn ji, to wepa tintan linlinwe de tọn ji, kavi to fidevo depope.
14. Ale tẹwẹ ayinamẹ lọ nado gbọṣi wiweji sọgan hẹnwa na mí?
14 To nuhe ji mí dọhodo kakajẹ din lẹ mẹ, eyin a doayi adà he mẹ a dona wazọ́n dogọ te nado duto avùnhiho towe sọta ojlo he ma sọgbe lẹ ji go, yawu yinuwa. Eyin a nọ kẹalọyi ayinamẹ Ohó Jiwheyẹwhe tọn sọn ojlo mẹ wá, ehe na gọalọna we nado dapana ylanwiwa bo gbọnmọ dali gbọṣi wiweji.—Hia Jakọbu 1:21-25.
“YLỌ SUNNU MẸHO AGUN TỌN LẸ”
15. Eyin mí to ahidi hẹ ojlo fẹnnuwiwa tọn he ma sọgbe lẹ, naegbọn e do yin nujọnu dọ mí ni dín alọgọ?
15 Eyin mí to ahidi hẹ ojlo fẹnnuwiwa tọn he ma sọgbe lẹ, mẹdevo he sọgan gọalọna mí wẹ Klistiani hatọ lẹ. Nugbo wẹ dọ e ma nọ bọawu nado dọhodo nuhahun mẹdetiti tọn mọnkọtọn lẹ ji hẹ mẹdevo lẹ. Ṣigba, eyin mí yí adọgbigbo do biọ to Klistiani he whèwhín lẹ si nado gọalọna mí nado gbeje míde pọ́n, enẹ na zọ́n bọ mí ma na nọ suwhẹna ojlo he ma sọgbe lẹ. (Howh. 18:1; Heb. 3:12, 13) Hodidọ hẹ Klistiani he whèwhín to gbigbọ-liho de do madogán mítọn lẹ ji sọgan gọalọna mí nado doayi awugbopo mítọn he whlá lẹ go. Ehe sọgan gọalọna mí nado basi vọjlado he jẹ lẹ bo gbọṣi owanyi Jehovah tọn mẹ.
16, 17. (a) Nawẹ mẹho lẹ sọgan gọalọna mẹhe to ahidi hẹ ojlo mawé lẹ gbọn? Na apajlẹ. (b) Naegbọn e do sọgbe dọ mẹhe nọ pọ́n yẹdide fẹnnuwiwa tọn lẹ ni yawu dín alọgọ?
16 Mẹho agun tọn lẹ tin to otẹn dagbe mẹ hugan nado gọalọna mí. (Hia Jakọbu 5:13-15.) Jọja sunnu de to Brésil diahi hẹ ojlo he ma sọgbe lẹ na owhe susu. E dọmọ: “N’yọnẹn dọ linlẹn he nọ wá ayiha mẹ na mi lẹ ma nọ hẹn homẹ Jehovah tọn hùn, amọ́ winyan nọ hù mi taun nado dọ numọtolanmẹ ṣie na mẹdevo lẹ.” Ṣigba gbọn kosọ dali, mẹho mẹtọnhopọntọ de to agun etọn mẹ ze afọdide nado dọnsẹpọ ẹ, bo na ẹn tuli nado biọ alọgọ. Jọja lọ flin dọmọ: “Lehe mẹho lẹ do homẹdagbe hia mi do paṣa mi taun, yé do homẹdagbe hia mi bosọ mọnukunnujẹ numọtolanmẹ ṣie lẹ mẹ zẹ̀ nuhe n’lẹn go. Yé yí sọwhiwhe do dotoaina mi to whenue n’to nuhahun ṣie lẹ dọ. Yé yí Biblu zan do vọ́ jide na mi dọ Jehovah yiwanna mi podọ yé hodẹ̀ hẹ mi. Enẹ zọ́n bọ e bọawuna mi nado kẹalọyi ayinamẹ Biblu tọn he yé na mi lẹ.” To owhe susu godo he jọja lọ ko yinukọn to gbigbọ-liho, e dọmọ: “Todin, n’wá yọ́n lehe e yin nujọnu sọ nado nọ dín alọgọ, kakati nado nọ tẹnpọn nado hẹn agbàn mítọn lẹ míde ṣo.”
17 Nujọnu taun wẹ e yin nado biọ alọgọ, titengbe eyin yẹdide fẹnnuwiwa tọn pinpọn he yin aṣa mawé de wẹ nọ fọ́n ojlo fẹnnuwiwa tọn dote na mí. Eyin yè to gbàndọn nado biọ alọgọ, owù lọ nọ sinyẹn dogọ, bọ ojlo mawé lẹ na wá ‘mọhò, bo ji ylando’ podọ ehe na hẹn awugblena mẹdevo lẹ bosọ kọnmasin do yinkọ Jehovah tọn go. Ojlo lọ nado hẹn homẹ Jehovah tọn hùn podọ nado gbọṣi agun Klistiani tọn mẹ ko whàn susu to devizọnwatọ etọn lẹ mẹ nado kẹalọyi alọgọ owanyinọ he yé mọyi lẹ.—Jak. 1:15; Ps. 141:5; Heb. 12:5, 6.
MAGBE NADO GBỌṢI WIWEJI!
18. Etẹwẹ yin gbemima towe?
18 Dile walọ dagbe to didepo zọnmii to aihọn Satani tọn mẹ, homẹ Jehovah tọn na ko hùn nado mọdọ devizọnwatọ nugbonọ emitọn lẹ zindonukọn bo to vivẹnudo vẹkuvẹku nado hẹn linlẹn yetọn lẹ do wiweji, podọ nado tẹdo nujinọtedo walọ dagbe tọn emitọn lẹ go! Enẹwutu, dopodopo mítọn sọgan magbe nado gbọṣi Jehovah dè bo kẹalọyi anademẹ he e nọ na mí gbọn Ohó etọn po agun Klistiani tọn po gblamẹ. Eyin mí gbọṣi wiweji, enẹ na zọ́n bọ mí na tindo ayajẹ po jijọho ahun mẹ tọn po todin. (Ps. 119:5, 6) To sọgodo, to whenue Satani na yin didesẹ, mí na tindo lẹblanulọkẹyi nado nọgbẹ̀ kakadoi to aihọn he yin kiklọ́we de mẹ, fie nuyiwadomẹji mẹhẹnflu tọn etọn ma na tin te ba.
