Nuhe Jesu Plọn Mí

Gando Odẹ̀ He Jiwheyẹwhe Nọ Sè lẹ Go

Jesu nọ saba dín nọtẹn nuglọ tọn de nado hodẹ̀, podọ e na ayinamẹ dọ hodotọ etọn lẹ ni wà nudopolọ. Biblu dọmọ: “Le e to dẹ̀ho to ofi de, wẹ whenuena e nabọẹ, dopo to nuplọntọ etọn lẹ mẹ dọhlan ẹn, dọ, Oklunọ, plọn mí nado nọ hodẹ̀ . . . E sọ dọhlan yé, dọmọ, Whenuena mìwlẹ to dẹ̀ho, mì nọ dọmọ, Otọ́ mítọn he tin to olọn mẹ, Oyín towe ni yin hihiọ.” (Luku 5:16; 11:1, 2) Gbọnmọ dali, Jesu dohia mí dọ Otọ́ emitọn Jehovah kẹdẹ wẹ mí dona nọ hodẹ̀ hlan. Ewọ kẹdẹ wẹ Mẹdatọ mítọn po ‘Sisètọ odẹ̀ tọn’ po.—Psalm 65:2.

Be odẹ̀ lẹpo wẹ nọ hẹn homẹ Jiwheyẹwhe tọn hùn ya?

Dọvọdọ odẹ̀ he yin pinplọn do tamẹ lẹ tọn ma nọ hẹn homẹ Jiwheyẹwhe tọn hùn. Jesu dọmọ: “Whenuena mì to dẹ̀ho, mì zan dọvọdọ vọ́tọ . . . lẹ blo.” (Matiu 6:7) Mí dona nọ dọhona Otọ́ olọn mẹ tọn mítọn sọn ahun mẹ wá. To gbèdopo, Jesu zinnudeji na hodotọ etọn lẹ dọ Jiwheyẹwhe nọ sè odẹ̀ ylandonọ he jlo nugbonugbo nado lẹnvọjọ de tọn hugan odẹ̀ goyitọ he nọ hodo nuyiwa sinsẹ̀n tọn lẹ ganji de tọn. (Luku 18:10-14) Enẹwutu, eyin mí jlo dọ Jiwheyẹwhe ni sè odẹ̀ mítọn lẹ, mí dona gbọn whiwhẹ dali tẹnpọn nado nọ wà nuhe e biọ to mí si lẹ. Jesu lọsu tlẹ dọmọ: “Le Otọ́ ṣie plọn mi do, wẹ yẹn to onú helẹ dọ . . . Yẹn to nuhe yin homẹhun hlan ẹn lẹ wà to whepoponu.” (Johanu 8:28, 29) Jesu dọ to odẹ̀ mẹ dọmọ: “Ojlo ṣie ma wẹ gba, adavo towe, yin wiwà.”—Luku 22:42.

 Etẹlẹ wẹ mí dona biọ to odẹ̀ mẹ?

Na masin ko yin kinkọ̀n do oyín Jiwheyẹwhe tọn go wutu, Jesu dọmọ: ‘Le wẹ mì ni nọ hodẹ̀ do: Otọ́ mítọn he tin to olọn mẹ, hihiọ wẹ oyín towe. Ahọludu towe ni wá. Ojlo towe ni yin wiwà to aigba go, dile e te to olọn mẹ.’ (Matiu 6:9, 10) Mí dona hodẹ̀ dọ Ahọluduta Jiwheyẹwhe tọn ni wá, na gandudu ahọluduta enẹ tọn wẹ Jiwheyẹwhe na yizan nado hẹn ojlo etọn di to olọn mẹ podọ to aigba ji. Jesu dọ dọ mí sọgan hodẹ̀ na “núdùdù egbesọ tọn” mítọn. Mí sọ sọgan biọ to Jehovah si nado gọalọna mí nado mọ azọ́n, adọtẹn, nuhe mí na dó, podọ nado tindo agbasalilo po ahunmẹdunamẹnu devo lẹ po. Jesu sọ yidogọ dọ mí dona hodẹ̀ na jona ylando mítọn lẹ tọn.—Luku 11:3, 4.

Be mí dona hodẹ̀ do mẹdevo lẹ tamẹ wẹ?

Jesu hodẹ̀ do mẹdevo lẹ tamẹ. Biblu dọna mí dọmọ: “Yè hẹn yọpọvu lẹ wá e dè to finẹ na e nido yí alọ etọn do yé ji, bo hodẹ̀.” (Matiu 19:13) Jesu dọna apọsteli Pita dọmọ: “Yẹn basi ovẹvivẹ na we, dọ yise towe fẹ́ blo.” (Luku 22:32) Jesu na tuli hodotọ etọn lẹ nado nọ hodẹ̀ do mẹdevo lẹ tamẹ, etlẹ yin mẹhe to homẹkẹndo yé po mẹhe nọ dọ danú do yé go lẹ po.—Matiu 5:44; Luku 6:28.

Naegbọn mí dona gbọṣi odẹ̀ mẹ?

Jesu nọ dín whenu nado hodẹ̀ podọ e na tuli hodotọ etọn lẹ nado nọ ‘hodẹ̀ to whepoponu, ma gbọjẹ.’ (Luku 18:1) Jehovah na tuli mí nado nọ dọ ahunmẹdunamẹnu mítọn lẹ na ẹn gbọzangbọzan, podọ mọwiwà na dohia dọ mí dejidego. Jesu dọmọ: “Mì [nọ] biọ, yè nasọ yí na mì.” Ṣigba ehe ma dohia dọ Jehovah nọ whleawu nado sè odẹ̀ mẹhe yiwanna ẹn bo nọ na sisi i taidi Otọ́ lẹ tọn gba. Kakatimọ, Jesu dọmọ: “Eyin mìwlẹ he yin mẹylankan yọ́n le yè nọ na nunina dagbe hlan ovi mìtọn lẹ do, nẹmunẹmu wẹ Otọ́ mìtọn olọn tọn na na [gbigbọ wiwe] hlan yé he biọ to e dè lẹ!”—Luku 11:5-13.

Na nudọnamẹ dogọ, pọ́n weta 17tọ owe lọ Etẹwẹ Biblu Plọn Mí Taun? a tọn.

[Nudọnamẹ Odò tọn]