Otọ́ Tọṣiọvi lẹ Tọn
Dọnsẹpọ Jiwheyẹwhe
Otọ́ Tọṣiọvi lẹ Tọn
“O TỌ́ tọṣiọvi [lẹ] tọn, . . . wẹ Jiwheyẹwhe to fininọ etọn wiwe mẹ.” (Psalm 68:5) Hogbe gbọdo enẹlẹ plọn mí onú titengbe de gando Jehovah Jiwheyẹwhe go—enẹ wẹ yindọ, e nọ doayi nuhudo mẹhe to alọgọ dín lẹ tọn go. Lehe onú ovi he mẹjitọ etọn de kú tọn nọ duahunmẹna ẹn sọ yin mimọ gblegede to Osẹ́n he e na Islaelivi lẹ mẹ. Mì gbọ mí ni lẹnnupọndo alọdlẹndonu tintan he Biblu basi gando “tọṣiọvi” lẹ go to Eksọdusi 22:22-24 mẹ ji.
Jiwheyẹwhe na avase dọmọ: ‘Mìwlẹ ma na bianukunna tọṣiọvi depope.’ (Wefọ 22) Ehe ma yin ovẹvivẹ de poun na gbẹtọ lẹ nido wàlẹblanuna tọṣiọvi lẹ gba, ṣigba gbedide Jiwheyẹwhe tọn de wẹ. Ovi he otọ́ etọn kú—yèdọ mẹhe na na ẹn núdùdù bo penukundego—tindo nuhudo alọgọ tọn. Mẹdepope ma dona “bianukunna” ovi mọnkọtọn to aliho depope mẹ. To lẹdogbedevomẹ Biblu tọn devo lẹ mẹ, hogbe lọ “bianukunna” yin lilẹdo “danuwadomẹ,” “hùnyinylan,” podọ “mẹtitafu.” Nuhe ma sọgbe wiwà do tọṣiọvi lẹ go ylan to nukun Jiwheyẹwhe tọn mẹ taun. Nawẹ e ylan sọ?
Osẹ́n lọ zindonukọn dọmọ: “Eyin hiẹ bianukunna yé to nudepope mẹ, bọ yé gbẹ́ dawhá hlan mi, yẹn na sè awhá yetọn dandan.” (Wefọ 23) Doayi e go dọ kandai lọ yí hogbe mẹsusu tọn “mìwlẹ” zan to wefọ 22tọ mẹ, ṣigba bo yí “hiẹ” zan to wefọ 23tọ mẹ. Dopodopo Islaelivi lẹ tọn gọna akọta lọ blebu wẹ dona setonuna osẹ́n Jiwheyẹwhe tọn ehe. Nukun Jehovah tọn lẹ to pinpọn; e hùn otó etọn hlan tọṣiọvi lẹ, bo tin to gbesisọ mẹ nado siọ awhágbe yetọn lẹ na alọgọ.—Psalm 10:14; Howhinwhẹn lẹ 23:10, 11.
Etẹwẹ na jọ lo, eyin mẹde wà nuhe ma sọgbe he na zọ́n bọ tọṣiọvi de na dawhá ylọ Jiwheyẹwhe? “Homẹgble ṣie na hẹ̀zò,” wẹ Jehovah dọ, “yẹn bo nasọ yí ohí do hù mì.” (Wefọ 24) Owe he basi zẹẹmẹ do Biblu ji de dọ dọ hogbe ehe “to paa mẹ zẹẹmẹdo ‘awọntin ṣie na hẹ̀,’ ehe yin oló de nado do homẹgble sinsinyẹn hia.” Doayi e go dọ Jehovah ma jo whẹho lọ do alọmẹ na whẹdatọ Islaeli tọn lẹ nado dawhẹna mẹhe na gbà osẹ́n lọ gba. Jiwheyẹwhe lọsu wẹ na dawhẹna mẹdepope he tafu ovi he ma tindo alọgọtọ lẹ.—Deutelonomi 10:17, 18.
Jehovah ma ko diọ. (Malaki 3:6) E nọ wàlẹblanuna ovi he mẹjitọ dopo kavi awe lẹpo kúdo lẹ. (Jakobu 1:27) Eyin mẹde tafu tọṣiọvi homẹvọnọ lẹ, enẹ nọ gblehomẹna Jehovah, Otọ́ tọṣiọvi lẹ tọn. Mẹdepope he na tẹnpọn nado tafu ovi he ma tindo alọgọtọ lẹ, ma na họ̀ngán sọn “adi zogbe OKLUNỌ tọn” si gba. (Zẹfania 2:2) Mẹylankan mọnkọtọn lẹ na yọnẹn dọ “onú dobu wẹ nado jai jẹ alọ Jiwheyẹwhe ogbẹ̀nọ tọn mẹ.”—Heblu lẹ 10:31.