“Yẹn Yọ́n Awufiẹsa Yetọn Lẹ”
Dọnsẹpọ Jiwheyẹwhe
“Yẹn Yọ́n Awufiẹsa Yetọn Lẹ”
“WIWE, wiwe, wiwe wẹ OKLUNỌ.” (Isaia 6:3) Hogbe gbọdo enẹlẹ dohia dọ Jehovah Jiwheyẹwhe wẹ wé hugan bo masọ tindo oblọ depope. Hiẹ sọgan kanse dọ, ‘Be wiwe-yinyin Jiwheyẹwhe tọn zọ́n bọ e ma nọ hò mẹtọn pọ́n kavi ma yọ́n dọnsẹpọ wẹ ya? Be Jiwheyẹwhe wiwe mọnkọtọn nọ hò yẹn, ylandonọ, mapenọ ehe tọn pọ́n nugbonugbo ya?’ Gbọ mí ni lẹnnupọndo hogbe jidevọnamẹ tọn he Jiwheyẹwhe yizan na Mose to Eksọdusi 3:1-10 mẹ lẹ ji.
To whenue Mose to nukunpedo lẹngbọ lẹ go to gbèdopo, e mọ nude he dabla do e—yèdọ nukàn he to jiji ṣigba bo ma “fiọ” de. (Wefọ 2) Ehe fọ́n tlintlindo dindin etọn dote bọ e dọnsẹpọ nado pọ́n nuhe to jijọ. Gbọn angẹli de gblamẹ, Jehovah dọhona Mose to ṣẹnṣẹn miyọ́n lọ tọn dọmọ: “A sẹpọ fi dali blo: de afọpa towe sọn afọ towe, na otẹn fie tọn ji hiẹ ṣite te aigba wiwe wẹ.” (Wefọ 5) Lẹnnupọndo ehe ji—na nukàn he to miyọ́n ji lọ nọtena tintin to finẹ Jiwheyẹwhe wiwe lọ tọn wutu, aigba lọ lọsu lẹzun wiwe!
Jiwheyẹwhe wiwe lọ tindo whẹwhinwhẹ́n de nado dọho hẹ Mose. Jiwheyẹwhe dọmọ: “Nugbonugbo yẹn ko mọ nukunbibia omẹ ṣie he tin to Egipti lẹ tọn, bo ko sọ sè awhá yetọn gbọn azọ́ngán yetọn lẹ tọn dali; na yẹn yọ́n awufiẹsa yetọn lẹ.” (Wefọ 7) Nukun Jiwheyẹwhe tọn ma tọ́n nado nọma mọ yajiji omẹ etọn lẹ tọn; mọjanwẹ otó etọn ma kú nado nọma sè awhágbe yetọn lẹ na alọgọ do niyẹn. Kakatimọ, e sè vivẹ́ yetọn. Doayi nuhe Jiwheyẹwhe dọ go: “Yẹn yọ́n awufiẹsa yetọn lẹ.” Gando hogbe lọ “yẹn yọ́n” go, owe de dọmọ: “Hogbe lọ bẹ numọtolanmẹ mẹdetiti tọn, mẹtọnhopọn, po awuvẹmẹ po hẹn.” Nuhe Jehovah dọna Mose dohia dọ Jiwheyẹwhe he nọ hò mẹtọn pọ́n sisosiso de wẹ e yin.
Etẹwẹ Jiwheyẹwhe na wà todin? Onú yetọn ma blawuna ẹn poun gba. Kakatimọ, e yí nude wà. E magbe nado de omẹ etọn lẹ sọn Egipti bo hẹn yé wá “aigba he yí anọ́sin po owín po do to sisà de ji.” (Wefọ 8) Enẹwutu, Jehovah deazọ́nna Mose dọmọ: “Hẹn omẹ ṣie lẹ . . . tọ́n sọn Egipti.” (Wefọ 10) Mose hẹn azọ́ndenamẹ enẹ di to whenuena e plan Islaelivi lẹ sọn Egipti to 1513 J.W.M.
Jehovah ma ko diọ. Devizọnwatọ etọn egbezangbe tọn lẹ sọgan deji dọ e nọ mọ oyà he yé to jiji lẹ bosọ nọ sè awhágbe yetọn lẹ na alọgọ. E nọ yọ́n awufiẹsa yetọn lẹ ganji. Ṣigba Jehovah ma nọ tindo numọtolanmẹ awuvẹmẹ tọn na devizọnwatọ nugbonọ etọn lẹ poun gba. Kakatimọ, mẹtọnhopọn nọ whàn Jiwheyẹwhe nado yinuwa do ota yetọn mẹ “na ewọ to tukla [yetọn] jẹ wutu.”—1 Pita 5:7.
Awuvẹmẹ Jiwheyẹwhe tọn nọ na mí todido. Po alọgọ Jiwheyẹwhe tọn po, míwu gbẹtọvi mapenọ lẹ sọgan yin wiwe jẹ obá de mẹ bo mọ nukundagbe etọn. (1 Pita 1:15, 16) Yọnnu Klistiani he ko jiya apọṣimẹ sinsinyẹn po flumẹjijẹ po tọn de mọ homẹmiọn sọn otàn Mose tọn gando nukàn he to jiji lọ go mẹ. E dọmọ: “Eyin Jehovah sọgan hẹn onú mawé de zùn wiwe, be yẹnlọsu sọgan tindo todido vude. Linlẹn ehe ko gọalọna mi taun.”
Be hiẹ na jlo nado plọnnu dogọ gando Jehovah, Jiwheyẹwhe wiwe lọ go ya? Hiẹ sọgan wleawuna haṣinṣan pẹkipẹki de hẹ ẹ, na “ewọ yọ́n didá mítọn; e sọ flindọ kọ́gudu wẹ mí.”—Psalm 103:14.