Kanbiọ Wehiatọ Mítọn lẹ Tọn
Kanbiọ Wehiatọ Mítọn lẹ Tọn
Naegbọn Kunnudetọ Jehovah Tọn lẹ Ma Nọ Yí Yẹdide lẹ Zan to Sinsẹ̀n-bibasi Yetọn Mẹ?
Lẹdo aihọn pé, Hindu, Bouddha-sẹ̀ntọ, Katoliki, po hagbẹ Ṣọṣi Orthodoxe tọn lẹ po nọ pọ́n boṣiọ kavi yẹdide lẹ yiyizan taidi adà tangan sinsẹ̀n-bibasi yetọn tọn. To fidelẹ to Aflika, gbẹtọ lẹ nọ sẹ̀n atin kavi zannu pipà, ehe mẹ yé lẹndọ yẹwhe kavi gbigbọ yẹwhe de tọn nọ nọ̀.
To vogbingbọn mẹ, Kunnudetọ Jehovah tọn lẹ ma nọ yí boṣiọ kavi yẹdide wunmẹ depope zan to sinsẹ̀n-bibasi yetọn mẹ. Eyin a dla fie yé nọ pli te lẹ pọ́n, he nọ yin yiylọdọ Plitẹnhọ Ahọluduta tọn lẹ, a ma na mọ yẹdide “mẹwiwe lẹ” tọn kavi boṣiọ Jesu po Malia po tọn. a Etẹwutu? Pọ́n nuhe Biblu dọ do whẹho ehe ji.
Etẹwẹ Jiwheyẹwhe Biọ to Islaelivi lẹ Si?
To whenue Jehovah Jiwheyẹwhe tún Islaelivi lẹ dote sọn Egipti, e na yé anademẹ he họnwun gando lehe e jlo dọ yé ni sẹ̀n ẹn do go. Osẹ́n awetọ to nuhe mẹsusu nọ ylọdọ Gbedide Ao lẹ mẹ dọmọ: “Hiẹ ma na basi boṣiọ pipà de hlan dewe, kavi apajlẹ ojlẹmọ depope tọn he tin to olọn mẹ aga, kavi he tin to aigba mẹ to odò, kavi he tin to otọ̀ mẹ to aigba glọ: hiẹ ma na dẹ́ dewe do odò hlan yé, kavi sẹ̀n yé gba: na yẹn OKLUNỌ Jiwheyẹwhe towe Jiwheyẹwhe awuwhàntọ de wẹ [kavi he nọ biọ mẹdezejo mlẹnmlẹn].”—Eksọdusi 20:4, 5.
To ojlẹ he mẹ Jiwheyẹwhe to gbedide ehelẹ na Mose, Islaelivi lẹ to awuwlena oyìnvu sika tọn de, vlavo nado hodo apajlẹ Egiptinu he nọ sẹ̀n kanlin lẹ tọn. Yé ma do yinkọ yẹwhe Egipti tọn de na boṣiọ lọ gba. Kakatimọ, yé dọ dọ Jehovah wẹ emi yí i do to sinsẹ̀n. (Eksọdusi 32:5, 6) Nawẹ Jiwheyẹwhe yinuwa gbọn? E gblehomẹ taun do mẹhe to boṣiọ lọ sẹ̀n lẹ go bọ Mose và boṣiọ lọ sudo.—Eksọdusi 32:9, 10, 19, 20.
To godo mẹ, Jehovah Jiwheyẹwhe yí nudọnamẹ gigọ́ delẹ dogọ gbedide awetọ lọ. Gbọn Mose gblamẹ, e flinnu Islaelivi lẹ dọ yé ma dona basi “boṣiọ pipà de to ojlẹmọ ohiamọ depope tọn mẹ, apajlẹ asu tọn kavi asi, apajlẹ kanlin depope tọn he tin to aigba lọ go, apajlẹ ohẹ̀ awànọ depope tọn he to zinzlọn to olọn lọ mẹ, apajlẹ onú depope tọn he tin aigba lọ go, apajlẹ whèvi depope tọn he tin to osin mẹ to aigba lọ glọ.” (Deutelonomi 4:15-18) E họnwun dọ Islaelivi lẹ ma dona yí boṣiọ wunmẹ depope zan dile yé to Jiwheyẹwhe sẹ̀n.
Etomọṣo, Islaelivi lẹ wá jai jẹ boṣiọ-sinsẹ̀n mẹ to godo mẹ. Nado gọ̀ yé do aliji, Jehovah do yẹwhegán lẹ hlan he na yé avase dọ Jiwheyẹwhe na sayana yé na boṣiọ-sinsẹ̀n yetọn wutu. (Jẹlemia 19:3-5; Amọsi 2:8) To pọmẹ, akọta Islaeli tọn gbẹkọ avase Jiwheyẹwhe tọn lẹ go. Enẹwutu, to 607 J.W.M., Jehovah na dotẹnmẹ Babilọninu lẹ nado và Jelusalẹm sudo bo bẹ tòmẹnu etọn lẹ yì kanlinmọgbenu.—2 Otannugbo lẹ 36:20, 21; Jẹlemia 25:11, 12.
Etẹwẹ Klistiani Owhe Kanweko Tintan Tọn lẹ Yise?
To whenue mẹhe ma yin Ju lẹ lẹzun Klistiani to owhe kanweko tintan whenu, yé doalọtena boṣiọ lẹ yiyizan to sinsẹ̀n-bibasi yetọn hlan Jiwheyẹwhe mẹ. Pọ́n nuhe Demetliu, fataka-yawàtọ he nọ basi boṣiọ lẹ to Efesu dọ gando yẹwhehodidọ apọsteli Paulu tọn go dọmọ: “Mẹho emi, mì yọnẹn dọ gbọn anà he dali wẹ mí tindo [adọkun] mítọn. Humọ mì mọ bosọ sè, dọ e ma yin Efesu kẹdẹ, ṣigba diblayin Asia lẹpo lẹdo, wẹ Paulu he to alọtundo bosọ to mẹsusu diọ, bo to didọmọ onú he yè yí alọ do basi lẹ ma yin yẹwhe de gba.”—Owalọ lẹ 19:25, 26.
Nuhe Paulu lọsu dọ lẹ suwhẹna homọdọdomẹgo Demetliu tọn. To whenue Paulu to hodọna Glẹki lẹ to Atẹni, e dọmọ: “Míwlẹ masọ jẹ nado lẹndọ, enẹ he yin Yẹwhe tin jijlẹ hlan sika, kavi fataka, kavi zannu, he yè kọ̀n gbọn anà po linlẹn gbẹtọ tọn po dali gba. Enẹwutu ojlẹ wunvi tọn lẹ go wẹ Jiwheyẹwhe de nukun sẹ̀ sọn; ṣigba to dinvie e degbè na gbẹtọ lẹ to ofi popo dọ yé do lẹnvọjọ.” (Owalọ lẹ 17:29, 30) Gando whẹho ehe dopolọ go, Paulu wlanwe hlan Tẹsalonikanu lẹ bo pà yé dọmọ: “Mì [ko] lẹ́ sọn boṣiọ kọ̀n do Jiwheyẹwhe dè.”—1 Tẹsalonikanu lẹ 1:9.
Gbọnvona Paulu, apọsteli Johanu lọsu na avase Klistiani lẹ sọta yẹdide lẹ yiyizan to sinsẹ̀n-bibasi yetọn mẹ. To vivọnu owhe kanweko tintan tọn, Johanu zinnudeji na yé dọmọ: “Mì joagọ sọn boṣiọ lẹ kọ̀n.”—1 Johanu 5:21.
Kunnudetọ Jehovah tọn lẹ nọ setonuna gbedide he Jiwheyẹwhe na madoadúdẹji lọ ma nado yí yẹdide wunmẹ depope zan dile yé to sinsẹ̀n ẹn. Yé yí nuhe Jehovah Jiwheyẹwhe dọ sè dọmọ: ‘Yẹn wẹ Jehovah; ehe wẹ oyín ṣie: gigo ṣie wẹ yẹn ma na jo na mẹdevo, mọ yẹn ma na jo pipà ṣie na boṣiọ-pipà lẹ.’—Isaia 42:8.
[Nudọnamẹ odò tọn]
a Nugbo wẹ dọ yẹdide mẹhe go Biblu donù delẹ tọn sọgan yin mimọ to Plitẹnhọ Ahọluduta tọn delẹ mẹ. Ṣigba, yẹdide ehelẹ ma nọ yin sinsẹ̀n, kakatimọ yé nọ yin yiyizan taidi aṣọ́donu poun. Kunnudetọ Jehovah tọn lẹ ma nọ hodẹ̀ hlan yẹdide ehelẹ, mọjanwẹ yé masọ nọ litaina yé do niyẹn.
[Blurb on page 27]
‘Yẹn wẹ Jehovah; ehe wẹ oyín ṣie: gigo ṣie wẹ yẹn ma na jo na mẹdevo, mọ yẹn ma na jo pipà ṣie na boṣiọ-pipà lẹ.’—Isaia 42:8