Dọnsẹpọ Jiwheyẹwhe

Whẹdatọ de He Nọ Dawhẹ to Aliho He Sọgbe Mẹ

Osọha lẹ 20:2-13

GBẸTỌVI lẹ sọgan dawhẹ to aliho agọ̀ mẹ kavi po kanyinylan po, ṣigba e ma yinmọ na Jehovah Jiwheyẹwhe, mẹhe “yiwanna whẹdida” dodo gba. (Psalm 37:28) Dile etlẹ yindọ ewọ nọ fahomẹ, e ma nọ joalọdokọjinamẹ gba. E nọ dawhẹ to aliho he sọgbe mẹ. Gbọ mí ni lẹnnupọndo lehe e yinuwa do to whẹho he gando wiwọ́ po atẹṣiṣi po go de mẹ dile e yin kinkàndai to Osọha lẹ weta 20 mẹ do ji.

Whenue Islaelivi lẹ sẹpọ vivọnu gbejizọnlin zungbo mẹ tọn yetọn, yé ma mọ osin nù. a Akọta lọ jẹ wiwọ́ hẹ Mose po Aalọn po ji dọmọ: “Etẹwutu wẹ mìwlẹ hẹn agun pipli OKLUNỌ lọ tọn wá zungbo he mẹ, na mí nido kú to finẹ, míwlẹ po kanlin-yìnyìn mítọn lẹ po?” (Wefọ 4) Yé wule dọ zungbo lọ yin “otẹn ylankan” de he ma tindo ‘votin lẹ, ovẹn-sinsẹ́n lẹ, kavi pomeglanate lẹ’—yèdọ atin sinsẹ́n he amẹ́ Islaeli tọn lẹ hẹnwa sọn Aigba Pagbe tọn ji to owhe delẹ die jẹnukọn—podọ “osin depope masọ tin nado nù.” (Wefọ 5; Osọha lẹ 13:23) Na taun tọn, yé to whẹgbledo Mose po Aalọn po na zungbo he mẹ yé te ma taidi aigba he nọ de sinsẹ́n tọ́n, ehe otọ́ yetọn he hlunnudọ lẹ gbẹ́ nado biọ!

Jehovah ma gbẹkọ nuhlundọtọ lọ lẹ go gba. Kakatimọ, e degbena Mose nado wà onú atọ̀n: enẹ wẹ, nado yí opò etọn, pli akọta lọ dopọ, bo “dọho hlan osé lọ to nukun yetọn lẹ nukọn, na e nido na osin etọn jẹgbonu.” (Wefọ 8) Mose hodo anademẹ awe tintan lọ lẹ, ṣigba e gboawupo nado setonuna atọ̀ntọ lọ. Kakati nado dọhona osé lọ po yise po, e dọhona akọta lọ po adi po dọmọ: “Mì sè dinvie, mì atẹ̀nọ lẹ; míwlẹ ni hẹn osin jẹgbonu wá na mì sọn osé he mẹ wẹ?” (Wefọ 10; Psalm 106:32, 33) Enẹgodo, Mose yí opò etọn do linú osé lọ whla awe, bọ “osin sọ jẹgbonu wá gege.”—Wefọ 11.

Gbọnmọ dali, Mose po Aalọn po waylando sinsinyẹn. Jiwheyẹwhe dọna yé dọmọ: “Mì ṣiatẹ do ohó ṣie go.” (Osọha lẹ 20:24) Na Mose po Aalọn po ma yinuwa sọgbe hẹ gbedide Jiwheyẹwhe tọn to nujijọ enẹ mẹ wutu, yé lẹzun nuhe yé ylọ akọta lọ dọ—enẹ wẹ, atẹṣitọ. Whẹdida Jiwheyẹwhe tọn họnwun: Mose po Aalọn po ma na deanana Islaelivi lẹ biọ Aigba Pagbe tọn ji gba. Be whẹdida enẹ sinyẹn hugan wẹ ya? Lala, na whẹwhinwhẹ́n susu wutu.

Tintan, Jiwheyẹwhe ma degbena Mose nado ylangbè na akọta lọ, whẹpo yè ni dọ dọ e ni ylọ yé dọ atẹṣitọ. Awetọ, Mose po Aalọn po gboawupo nado pagigona Jiwheyẹwhe. “Mìwlẹ . . . ma klan mi do wiwe,” wẹ Jiwheyẹwhe dọ. (Wefọ 12) Whenue Mose po Aalọn po dọ dọ ‘míwlẹ ni hẹn osin jẹgbonu wá,’ yé dọho taidi dọ yé omẹ awe lẹ wẹ wleawuna osin lọ to azọ́njiawu-liho—e ma yin Jiwheyẹwhe gba. Atọ̀ntọ, whẹdida lọ tin to kọndopọ mẹ hẹ owhẹ̀ he Jiwheyẹwhe dá wayi lẹ. Jiwheyẹwhe ko gbẹ́ dọ whẹndo atẹṣitọ he go mí donù wayi lọ ma na biọ otò Kenani tọn mẹ, nudopolọ wẹ e wà na Mose po Aalọn po. (Osọha lẹ 14:22, 23) Ẹnẹtọ, Mose po Aalọn po yin nukọntọ Islaelivi lẹ tọn. Enẹwutu, mẹhe tindo azọngban susu lẹ na dogbè nususu tọn na Jiwheyẹwhe.—Luku 12:48.

Jehovah nọ dawhẹ to aliho he sọgbe mẹ. Na e yiwanna whẹdida dodo wutu, e dẹn do e nado dawhẹ to aliho agọ̀ mẹ kavi po kanyinylan po. Na nugbo tọn, e jẹ dọ mí ni dejido Whẹdatọ mọnkọtọn go bo na ẹn sisi.

[Nudọnamẹ odò tọn]