Hodo Apajlẹ Yise Yetọn Tọn

E Hoavùn Nado Duto Obu po Ayihaawe po Ji

PITA to nukọn pọ́n tlintlin dile e to tọjihun kùn po huhlọn po to zánmẹ. E to nude mọ hlan. Be hinhọ́n afọnnu tọn mọ hlan wẹ e te to whèzẹtẹn ya? Nẹgbé po abọ́ po to vivẹ ẹ na e ko to azẹ̀ yìn na gànhiho susu. Jẹhọn sinsinyẹn he to oda etọn fú lọ ko wlu Ohù Galili tọn bọ e to adán ji. Osin he agbówhẹn he to hihò do tọjihun whèhuhu tọn lọ go nọ fúnfún lẹ to yìnyọ̀n ẹn. Ganṣo e gbẹ́ pò to tọjihun lọ kùn janwẹ.

Jẹnukọnna nujijọ enẹ, Pita po hagbẹ etọn lẹ po jo Jesu do agé ji fide. To azán enẹ gbè, yé mọ bọ Jesu yí akla po whèvi vude po do na núdùdù gbẹtọ fọtọ́n susu he huvẹ to hùhù lẹ. Gbẹtọ lọ lẹ jlo na yí Jesu do basi ahọlu, ṣigba ewọ ma jlo na doalọ to tonudidọ mẹ. E masọ jlo dọ devi etọn lẹ ni wleawuna ojlo mọnkọtọn. Nado họ̀n bu do gbẹtọgun lọ, e dọna devi etọn lẹ nado biọ tọjihun mẹ bo dedo awà awetọ ji bọ ewọ dedo osó ji edeṣo nado hodẹ̀.—Malku 6:35-45; Johanu 6:14, 15.

To whenuena devi lẹ dedo, osun dì to agahomẹ; ṣigba todin e ko to họyì dẹẹdẹ to whèyihọ-waji. Ṣogan, yé ma tlẹ ko jẹ fide. Huhlọn he dó yé te gọna nudidọ mapote jẹhọn po agbówhẹn lẹ tọn po zọ́n bọ yé ma sọgan dọhona yedelẹ. Vlavo, Pita na ko to nulẹnpọn edeṣo.

Nuhe ji e sọgan lẹnnupọndo lẹ ma whè! E ko to Jesu Nazalẹti tọn hodo na nuhe hugan owhe awe. Nususu wẹ jọ to ojlẹ enẹ gblamẹ. E ko plọn nususu, ṣigba nususu gbẹ́ pò bọ e dona plọn. Ojlo he e tindo nado wàmọ—yèdọ nado dovivẹnu bo duto aliglọnnamẹnu delẹ ji taidi ayihaawe po obu po—hẹn ẹn zun apajlẹ ayidego tọn de na mí nado hodo. Mì gbọ mí ni pọ́n nuhewutu mí do dọ mọ.

“Mí Ko Mọ Mẹssia Lọ”!

Pita ma sọgan wọn whla tintan he e mọ Jesu Nazalẹti tọn pọ́n gbede. Nọvisunnu etọn, Andle wẹ hẹn owẹ̀n vonọtaun lọ wá na ẹn dọmọ: “Mí ko mọ Mẹssia lọ.” Hogbe enẹlẹ diọ gbẹzan Pita tọn bẹsọn gbenẹgbe.—Johanu 1:41, NW.

Pita nọ nọ̀ Kapẹlnaumi, yèdọ tòdaho de to otọ̀ he nọ yin yiylọdọ Ohù Galili tọn tó. Ewọ po Andle po nọ wazọ́n whèhuhu tọn dopọ hẹ Jakobu po Johanu po he yin visunnu Zebede tọn lẹ. Gbọnvona asi Pita tọn, asi-nọ̀ etọn po nọvisunnu etọn Andle po sọ nọ nọ̀ owhé etọn gbè. Matin ayihaawe, e na biọ azọ́n sinsinyẹn wiwà, huhlọn po nuyọnẹn po nado penukundo whédo mọnkọtọn go taidi whèhutọ de. Mí sọgan yí nukun homẹ tọn do pọ́n ozán susu he whèhutọ lọ lẹ na ko nọ yizan to azọ́n sinsinyẹn kọ̀n dile yé nọ dlan odọ̀ yetọn bo nọ nọ̀ tọjihun voovo awe mẹ nado dọ̀n ẹn bo bẹ whèvi depope he odọ̀ lọ wle. Mí sọgan sọ lẹnnupọndo azọ́n sinsinyẹn he yé nọ wà to okle ji nado didẹ whèvi lẹ bo sà yé, podọ nado vọ́ odọ̀ lẹ tọ̀ bo klọ́ yé.

Biblu dọna mí dọ Andle yin dopo to devi Johanu Baptizitọ tọn lẹ mẹ. Matin ayihaawe, Pita na ko nọ yí sọwhiwhe do dotoaina linlin he nọvisunnu etọn nọ na gando owẹ̀n Johanu tọn go. To gbèdopo, Andle mọ bọ Johanu dlẹnalọdo Jesu Nazalẹti tọn bo dọmọ: “Mì pọ́n, Lẹngbọvu Jiwheyẹwhe tọn lọ!” To afọdopolọji, Andle lẹzun hodotọ Jesu tọn bo yí jejejininọ do hẹn owẹ̀n ojlofọndotenamẹ tọn lọ wá na Pita dọmọ: Mẹssia lọ ko wá! (Johanu 1:35-40, NW) To atẹṣiṣi Edẹni mẹ tọn godo to nudi owhe 4000 jẹnukọn, Jehovah Jiwheyẹwhe ko dopagbe dọ omẹ vonọtaun de na wá  nado na todido nujọnu tọn gbẹtọvi lẹ. (Gẹnẹsisi 3:15) Andle ko mọ Whlẹngántọ ehe, yèdọ Mẹssia lọ! Pita lọsu dowezun nado yì pé Jesu.

Kakajẹ azán enẹ gbè, yinkọ he yè yí do yọ́n Pita wẹ Simọni, kavi Simeọni. Ṣigba Jesu pọ́n ẹn bo dọmọ: “‘Hiẹ wẹ Simọni visunnu Johanu tọn; hiẹ na nọ yin yiylọdọ Kefa’ (he lẹdogbedevomẹ etọn zẹẹmẹdo Pita).” (Johanu 1:42, NW) “Kefa” yin yinkọ paa de he zẹẹmẹdo “zannu” kavi “osé.” E họnwun dọ, dọdai wẹ ohó Jesu tọn lẹ yin. E mọ hlan nukọn dọ Pita na wá taidi osé de—enẹ wẹ yindọ e na tindo nuyiwadomẹji dagbe mẹhẹnlodo tọn do hodotọ Klisti tọn lẹ ji. Be nukun he Pita nọ yí do pọ́n ede niyẹn ya? E na vẹawu dọ ni yinmọ. Delẹ to mẹhe tlẹ nọ hia owe Wẹndagbe tọn to egbehe lẹ mẹ ma nọ mọ Pita taidi mẹhe afọ etọn hẹnai di osé. Mẹdelẹ ko dọ dọ ewọ ma lodo bo ma hẹnai bosọ nọ yawu diọ linlẹn.

Nugbo wẹ dọ Pita tindo awugbopo delẹ. Jesu yọ́n ehe ganji. Ṣigba taidi Otọ́ etọn Jehovah, Jesu nọ pọ́n adà dagbe gbẹtọ lẹ tọn to whepoponu. Jesu mọdọ Pita tindo nugopipe susu, podọ E jlo na gọalọna ẹn nado hẹn jẹhẹnu dagbe enẹlẹ pọnte dogọ. Mọdopolọ to egbehe, Jehovah po Ovi etọn po nọ mọ adà dagbe mítọn lẹ. E sọgan vẹawuna mí nado lẹndọ yé na mọ jẹhẹnu dagbe susu to mí si. Ṣigba, mí dona dejido pọndohlan yetọn go bo dohia dọ mí ko wleawufo nado yin pinplọn bosọ yin anadena dile Pita wà do.—1 Johanu 3:19, 20.

“A Dibu Ba Blo”

E yọnbasi dọ Pita hodo Jesu na ojlẹ de to gbejizọnlin yẹwhehodidọ tọn he bọdego mẹ. Gbọnmọ dali, e sọgan ko mọ whenue Jesu wà azọ́njiawu etọn tintan bo diọ osin zun ovẹn to hùnwhẹ alọwle tọn de tẹnmẹ to Kana. Nuhe tlẹ sọ yin nujọnu hugan wẹ yindọ, e sè owẹ̀n ayidego tọn he gọ́ na todido he Jesu lá gando Ahọluduta Jiwheyẹwhe tọn go. Ganṣo, e lẹkọyi azọ́n whèhuhu tọn etọn kọ̀n. Ṣigba to osun delẹ godo, Pita sọnukunmọ Jesu whladopo dogọ—podọ to ojlẹ ehe mẹ Jesu basi oylọna ẹn nado nọ hodo e to whepoponu na pipotọ gbẹzan etọn tọn.

To gbenẹgbe, Pita ṣẹṣẹ wazọ́n na ozán blebu dopo to ovọ́ mẹ. Ewọ po whèhutọ-gbẹ́ etọn lẹ po ko yìn odọ̀ whlasusu bo ma mọ nude wle. Pita na ko yí numimọ po azọ́nyinyọnẹn etọn lẹpo po zan nado dín whèvi. E na ko yìn odọ̀ gbọn ofi voovo lẹ to otọ̀ lọ ji nado mọ fie whèvi lẹ to núdù te. Matin ayihaawe, taidi whèhutọ susu, ewọ na ko nọ jlo to whedelẹnu nado mọ whèvi he to yìyì dopọ to otọ̀ glọ lẹ bo deanana yé tlọlọ biọ odọ̀ etọn mẹ. Ṣigba, nulinlẹnpọndo onú mọnkọtọn lẹ ji na yidogọna flumẹjijẹ etọn poun wẹ. Pita ma to whèhu nado deayidai gba; azọ́n he e nọ wà nado penukundo whédo etọn go niyẹn. Yigodo yinukọn, e gọwá agé ji agbá. Etomọṣo, odọ̀ lẹ dona yin kiklọ́. Ehe wà wẹ e te klinkán-klinkán to whenuena Jesu dọnsẹpọ ẹ.

Gbẹtọgun de lẹdo Jesu bo to todoaina ẹn po zohunhun po. Enẹwutu Jesu biọ tọjihun Pita tọn mẹ bo biọ to e si nado sẹ̀ ohún lọ sọn agé vude. Sọn otọ̀ lọ ji, ogbè Jesu tọn yiaga ganji bọ e jẹ nuplọn gbẹtọgun lọ ji. Pita dotoai po sọwhiwhe po dile mẹhe to agé ji lẹ lọsu wà do. Agbọ́ ma nọ pé e gbede nado dotoaina Jesu dile e to zẹẹmẹ basi do hosọ tangan yẹwhehodidọ etọn tọn ji—yèdọ Ahọluduta Jiwheyẹwhe tọn. Lẹblanulọkẹyi nankọ wẹ e na yin nado gọalọna Klisti lọ to owẹ̀n todido tọn ehe hinhẹn gbayipe mẹ! Ṣigba be enẹ na sọgbe hẹ lẹnpọn  dagbe ya? Etẹwẹ yé na dù? Vlavo Pita na ko vọ́ nulẹnpọndo tukla tata he e jẹ to ozán lọ mẹ bo ma mọ whèvi de wle ji.—Luku 5:1-3.

To whenuena Jesu dọho pó, e dọna Pita dọmọ: “Sẹ̀ ohún lọ yì fihe siso, na mì ni yìn odọ̀ mìtọn lẹ nado wle whèvi.” Pita tindo ayihaawe sinsinyẹn. E dọmọ: “Nuplọnmẹtọ, ozán lọ pete wẹ mí ko yí do jẹtukla bo ma wle nudepope, ṣigba na hiẹ degbè wutu, yẹn na yìn odọ̀ lọ lẹ.” E họnwun dọ, onú godo tọn he Pita na ko jlo nado wà wẹ nado gọ̀ odọ̀ lẹ yìn do otọ̀ mẹ—titengbe todin he whèvi lẹ na ko dùnú pó bo gbàdo! Etomọṣo e setonu, vlavo bo mìalọ na hagbẹ etọn he tin to tọjihun devo mẹ lẹ nado hodo yé.—Luku 5:4, 5, NW.

To whenuena Pita jẹ odọ̀ lọ lẹ dọ̀n ji, e paṣa ẹ nado mọdọ yé pẹ̀n. E ma sọgan yise. E dó huhlọn dogọ, podọ to ojlẹ vude godo, e mọ whèvi susugege he to linlọ́n to odọ̀ mẹ! Po jeje po, e mìalọ hlan mẹhe tin to tọjihun awetọ mẹ lẹ nado wá gọalọ. Whenuena yé wá, e wá họnwun dọ ohún dopo ma sọgan hẹn whèvi lọ lẹpo. Yé bẹ whèvi gọ́ ohún awe lọ lẹpo mẹ, ganṣo e gbẹsọ pò janwẹ—ohún lọ lẹ tlẹ jẹ sisiọ ji. Avò daho vò Pita. E ko mọ bọ Klisti wà azọ́njiawu pọ́n, ṣigba ehe gando Pita lọsu go tlọlọ! Etẹ nkọ, dawe ehe sọgan hẹn whèvi lẹ biọ odọ̀ mẹ! Obu jẹ Pita ji. E họ́jai to kligonu Jesu tọn lẹ kọ̀n bo dọmọ: “Yì sọn dè e, Oklunọ, na ylandonọ de wẹ yẹn.” Nawẹ ewọ sọgan pegan nado dogbẹ́ hẹ Mẹhe mọ huhlọn yí sọn Jiwheyẹwhe dè nado wà azọ́njiawu mọnkọtọn lẹ gbọn?—Luku 5:6-9, NW.

Po homẹdagbe po, Jesu dọmọ: “A dibu ba blo. Na sọn din sọyi, hiẹ na nọ wle gbẹtọ lẹ gbẹ̀te.” (Luku 5:10, 11, NW) E ma yin ojlẹ lọ die nado tindo ayihaawe kavi dibu gba. Ayihaawe he Pita tindo gando nuwiwa egbesọegbesọ tọn lẹ taidi whèhuhu go ma sọgbe; mọjanwẹ e ma dona dibu na awugbopo po nugomape etọn titi lẹ po do niyẹn. Jesu tindo azọ́n daho de nado wà, yèdọ lizọnyizọn he na diọ whenuho gbẹtọvi lẹ tọn. Jiwheyẹwhe he e nọ sẹ̀n “nasọ jona [Pita] susugege.” (Isaia 55:7) Jehovah na penukundo nuhudo yetọn lẹ go to agbasa-liho podọ to gbigbọ-liho.—Matiu 6:33.

Pita yinuwa to niyaniya mẹ dile Jakobu po Johanu po wà do. “Yé hẹn tọjihun lọ gọwá agé, bo jo onú lẹpo do bosọ hodo e.” (Luku 5:11, NW) Pita tindo yise to Jesu po Mẹhe do e hlan po mẹ. Nudide dagbe hugan he e sọgan basi niyẹn. Mọdopolọ to egbehe, Klistiani he nọ duto ayihaawe po obu po ji nado wà sinsẹ̀nzọn hlan Jiwheyẹwhe lẹ to yise dohia. Mẹhe ze jide mọnkọtọn do Jehovah mẹ ma nọ duwinyan gbede.—Psalm 22:4, 5.

“Naegbọn A Do Jẹ Ayihaawe Tindo Ji?”

Nudi owhe awe to whenuena Pita pé Jesu godo, e kùnhún to yujẹhọn nù gbọn Ohù Galili tọn ji to zánmẹ dile mí donù e go to bẹjẹeji do. Nugbo wẹ dọ mí ma sọgan yọ́n nuhe ji e na ko to nulẹnpọndo to ojlẹ enẹ mẹ. Nuhe ji e sọgan ko to nulẹnpọndo lẹ ma whè! Jesu ko hẹnazọ̀ngbọna asi-nọ̀ Pita tọn. E ko dọ Yẹwhehodidọ Osó ji tọn. E ko dohia whlasusu gbọn nuplọnmẹ po azọ́njiawu etọn lẹ po dali dọ ewọ wẹ Mẹdide Jehovah tọn, yèdọ Mẹssia lọ. Dile osun lẹ to yìyì, awugbopo Pita tọn lẹ, taidi ayilinlẹn etọn nado nọ joawuna obu po ayihaawe po ko depò jẹ obá de mẹ. Jesu tlẹ ko de Pita taidi dopo to apọsteli 12 lẹ mẹ! Etomọṣo, Pita ma ko duto obu po ayihaawe po ji mlẹnmlẹn, dile e na wá mọ do to madẹnmẹ.

To mimá ẹnẹtọ ozán lọ tọn mẹ, enẹ wẹ to gblagbla ogàn 3 zánmẹ tọn jẹ zánfinfọ́n, Pita doalọtena húnkùnkùn to ajiji mẹ bo wlekli. Nude to whinwhàn to agbówhẹn lẹ ji to nukọn etọn! Be hinhọ́n osun tọn wẹ to sisẹ́ to agbówhẹn lẹ ji ya? E ma sọgan yinmọ, na nulọ ko jlọ ṣite gbau. Gbẹtọ wẹ! Mọwẹ, gbẹtọ wẹ podọ e to zọnlinzin gbọn osin ji! Dile mẹlọ to dindọnsẹpọ, e taidi dọ e dlí ja yé dè. Obu jẹ devi lẹ ji bọ yé lẹndọ odlọ de wẹ. Todin mẹlọ dọho dọmọ: “Mì gboadọ, yẹn wẹ; mì dibu blo.” Etẹ nkọ, Jesu wẹ!—Matiu 14:25-28, NW.

Pita gblọn dọmọ: “Oklunọ, eyin hiẹ wẹ, degbena mi nado gbọn osin ji wá dè we.” E yinuwa po adọgbigbo po to tintan whenu. Azọ́njiawu vonọtaun ehe whàn Pita sọmọ bọ e jlo na hẹn yise etọn lodo dogọ. E jlo na tindo mahẹ  to nujijọ lọ mẹ. Jesu basi oylọna ẹn po homẹdagbe po. Pita jẹte sọn tọjihun lọ mẹ bo tẹ afọ ohù lọ ji. Yí nukun homẹ tọn do pọ́n numọtolanmẹ Pita tọn to whenuena afọ etọn hẹnai to osin nukunta bọ e ṣite to osin ji. Awú na ko ji i tlala dile e zinzọnlin dedo Jesu dè. Ṣigba, e ma dẹn bọ numọtolanmẹ devo fọ́n to ahun etọn mẹ.—Matiu 14:29, NW.

Pita dona ze ayidonugo etọn do Jesu ji. Jesu wẹ hẹn Pita dote to agbówhẹn lẹ ji gbọn huhlọn Jehovah tọn gblamẹ. Podọ yise he Pita tindo to Jesu mẹ wẹ zọ́n bọ e do wàmọ. Ṣigba nude wá fẹayihasẹna Pita. Kandai lọ dọmọ: “To whenuena e pọ́n yujẹhọn lọ, obu di i.” Pita yìnnukunpọn agbówhẹn he to hihò do tọjihun lọ go bo nọ fún osin do jẹhọn mẹ lẹ bọ obu jẹ e ji. Vlavo e na ko mọ ede taidi mẹhe to sisiọ bo na kútọ. Dile obu etọn to susudeji, yise etọn jẹ didepo ji. Ewọ he yè ko do yinkọ na dọ Osé na Jesu mọ hlan nukọn dọ e na wá hẹnai wutu jẹ sisiọ ji na yise etọn hokọ̀. Pita yọ́n sìnlin ganji, ṣigba e ma ganjẹ nugopipe enẹ go todin gba. E dawhá dọmọ: “Oklunọ whlẹn mi!” Jesu hẹn alọ go na ẹn bo dọ̀n ẹn wá aga. Enẹgodo, dile yé gbẹ́ pò to osin ji, Jesu zinnudo onú tangan de ji na Pita dọmọ: “Hiẹ yise pẹvinọ, naegbọn a do jẹ ayihaawe tindo ji?”—Matiu 14:30, 31, NW.

“Jẹ ayihaawe tindo ji”—lehe hodidọ ehe sọgbe do sọ! Ayihaawe tintindo sọgan hẹnnugble taun. Eyin mí joawuna ẹn, e sọgan hù yise mítọn sudo bo hẹn mí gbọjọ to gbigbọ-liho. Mí dona hoavùn sọta ẹ sinsinyẹn! Gbọnna? Gbọn ayidonugo zizedo nuhe sọgbe ji dali. Eyin mí nọ ze ayiha do nuhe nọ dobuna mí, nuhe nọ fẹayihasẹna mí sọn Jehovah po Ovi etọn po ji, podọ do nuhe nọ hẹn mí gbọjọ lẹ ji, ayihaawe nasọ fọ́n to ahun mítọn mẹ dogọ. Ṣigba, eyin mí nọ ze ayiha do Jehovah po Ovi etọn po, nuhe yé ko wà, nuhe yé to wiwà, po nuhe yé na wà to sọgodo na mẹhe yiwanna yé lẹ po ji, mí na de ayihaawe depope he na fọ́n to ahun mítọn mẹ sẹ̀.

Dile Pita hodo Jesu lẹkọyi biọ tọjihun lọ mẹ, yujẹhọn lọ doalọte. Ohù Galili tọn nabọẹ whii. Pita po devi hatọ he pò lẹ po dọmọ, “Na nugbo tọn, Visunnu Jiwheyẹwhe tọn wẹ hiẹ.” (Matiu 14:33, NW) E họnwun dọ, ayiha Pita tọn na ko gọ́ na pẹdido to tọjihun lọ mẹ dile ai jẹ hinhọ́n ji. Obu po ayihaawe he e tindo po busẹ. Nugbo wẹ dọ, onú susu gbẹ́ pò bọ e na wà whẹpo do lẹzun Klistiani he afọ etọn hẹnai di osé dile Jesu mọ hlan do. Ṣigba e magbe nado to vivẹnudo yì nukọn. Be hiẹ tindo gbemima mọnkọtọn ya? Matin ayihaawe, hiẹ na mọdọ mí dona hodo apajlẹ yise Pita tọn.

[Yẹdide to weda 30]

Jesu mọdọ whèhutọ whiwhẹnọ ehe tindo nugopipe susu

[Yẹdide to weda 32]

“Oklunọ, ... ylandonọ de wẹ yẹn”