Dọnsẹpọ Jiwheyẹwhe

Jehovah “Ma Yin Mẹnukuntahopọntọ”

Be e ko jọ pọ́n bọ yè yinuwa hẹ we to aliho agọ̀ mẹ na yè gbẹwanna akọ̀ he mẹ a wá sọn wutu ya? Be e ko jọ pọ́n bọ yè súali nude tọn do we kavi gbẹ́ nado gọalọna we kavi de we pò na sinmẹ agbasa towe tọn, akọ̀ he mẹ a wá sọn, kavi na onú ma yọ́n na we sọmọ wutu ya? Eyin mọ wẹ, yọnẹn dọ ehe ko jọ do mẹsusu devo lẹ go ga. Ṣigba, nuhe yọ́n wẹ yindọ, nuyiwa mẹdèpo tọn enẹlẹ he gbayipe to aigba ji ma tin to olọn mẹ. Apọsteli Pita he yin Klistiani de dọ po nujikudo po dọmọ: “Jiwheyẹwhe ma yin mẹnukuntahopọntọ gba.”—Hia Owalọ lẹ 10:34, 35.

Fie Pita ma dona ko biọ, yèdọ owhé Kosi de he nọ yin Kọneliọsi tọn gbè, wẹ e zan hogbe enẹlẹ te. Juvi jiji de wẹ Pita yin, podọ to ojlẹ etọn mẹ, Ju lẹ nọ pọ́n Kosi lẹ hlan di gbẹtọ mawé bo ma nọ dike nudepope ni kọ̀n yé dopọ. To whelọnu lo, naegbọn Pita do tin to owhé Kọneliọsi tọn gbè? Do glido, Jehovah Jiwheyẹwhe wẹ jlo dọ nulẹ ni yì domọ. E ko hẹn Pita nado mọ numimọ de he mẹ ogbè de dọna ẹn te dọmọ: “A sọ ylọ nuhe Jiwheyẹwhe ko klọwé lẹ dọ mawé ba blo.” Pita ma yọnẹn dọ to azán he jẹnukọnna numimọ etọn, Kọneliọsi lọsu ko mọ numimọ de, ehe mẹ angẹli de dọna ẹn te nado ylọ Pita wá owhé etọn gbè. (Owalọ lẹ 10:1-15) To whenue Pita doayi e go dọ alọ Jehovah tọn to whẹho lọ mẹ, e ma whleawu nado dọho.

Pita dọ dọ: “Na nugbo tọn, yẹn mọdọ Jiwheyẹwhe ma yin mẹnukuntahopọntọ gba.” (Owalọ lẹ 10:34) Gando hogbe Glẹki tọn he yin lilẹdo “mẹnukuntahopọntọ” go, weyọnẹntọ Biblu tọn de basi zẹẹmẹ dọmọ: “[Hogbe enẹ] nọ yin yiyizan na whẹdatọ de he nọ pọ́n nukunta do dawhẹ, he ma nọ dawhẹ sọgbe hẹ nuhe mẹde jẹna, ṣigba nọ pọ́n do owanyi kavi wangbẹna he e tindo na mẹlọ go.” Jiwheyẹwhe ma nọ do nukundagbe etọn hia mẹde hugan mẹdevo, vlavo na akọ̀ mẹlọ tọn, otò etọn, ninọmẹ etọn, kavi nudevo depope he gbẹtọ nọ na ayidonugo wutu gba.

Kakatimọ, nuhe to ahun mẹ wẹ Jehovah nọ pọ́n. (1 Samuẹli 16:7; Howhinwhẹn lẹ 21:2) Pita yidogọ dọmọ: “To akọta lẹpo mẹ, mẹhe nọ dibusi i bo nọ wazọ́n dodo tọn wẹ nọ yin alọkẹyi to e dè.” (Owalọ lẹ 10:35) Nado dibusi Jiwheyẹwhe zẹẹmẹdo nado nọ na ẹn sisi, nọ doyẹyigona ẹn bo nọ dejidego bosọ nọ dapana nudepope he ma nọ hẹn homẹ etọn hùn. Nado wazọ́n dodo tọn nọ biọ dọ mí ni nọ wà nuhe sọgbe to nukun Jiwheyẹwhe tọn mẹ. Eyin mẹde nọ gbọn sisi sisosiso dali wà nuhe sọgbe, homẹ Jehovah tọn nọ hùn do mẹlọ go.—Deutelonomi 10:12, 13.

Eyin yè ko yinuwa hẹ we to aliho agọ̀ mẹ pọ́n, na yè gbẹwanna akọ̀ towe kavi na nuvẹun wutu, be nuhe Pita dọ gando Jiwheyẹwhe go lẹ sọgan miọnhomẹna we taun. Jehovah to gbẹtọ lẹ dọ̀n wá sinsẹ̀n-bibasi nugbo mẹ sọn akọta lẹpo mẹ. (Johanu 6:44; Owalọ lẹ 17:26, 27) Ewọ nọ dotoaina odẹ̀ sinsẹ̀n-basitọ etọn lẹ tọn bo nọ siọ yé mahopọnna akọ̀, otò po ninọmẹ yetọn po. (1 Ahọlu lẹ 8:41-43) Mí sọgan deji dọ to whenue Jehovah pọ́n aigba ji hlan, gbẹtọ lẹ wẹ e nọ na ayidonugo, e ma yin akọ̀ yetọn. Be enẹ ma whàn we nado plọn nususu dogọ gando Jiwheyẹwhe mítọn he ma nọ homẹnukuntapọn go ya?

Biblu hihia

Johanu 17–Owalọ lẹ 10

[Nudọnamẹ tangan lẹ to weda 14]

To whenue Jehovah pọ́n aigba ji hlan, gbẹtọ lẹ wẹ e nọ na ayidonugo, e ma yin akọ̀ yetọn