WETA 25

Vijinu-Yido-Daihun—Nawẹ N’Gán Duto Aṣa Enẹ Ji Gbọn?

“N’jẹ vijinu-yido-daihun ji to whenue n’do owhe ṣinatọ̀n. To nukọn mẹ, n’wá yọ́n nukun he Jiwheyẹwhe nọ yí do pọ́n aṣa enẹ. N’nọ jẹflumẹ to whedepopenu he n’vọ́ doalọ to aṣa enẹ mẹ. N’nọ kanse dee dọ, ‘Nawẹ Jiwheyẹwhe gán yiwanna gbẹtọ yẹn nkọ gbọn?’—Luiz.

WHENUE a to owhe aflanmẹ tọn mẹ biọ, ojlo zanhẹmẹ tọn towe gán jẹ sinsinyẹn deji ji dogọ. Enẹ gán sisẹ́ we nado nọ yí vijinu do daihun. a Mẹsusu gán dọ dọ nude ma ylan to enẹ mẹ. Yé nọ dọ dọ “e ma nọ gbleawuna mẹde.” Ṣigba, whẹwhinwhẹ́n dagbe de tin he wutu yè dona nọ dapana aṣa enẹ. Aposteli Paulu wlan dọ: “Enẹwutu, mì hù awutugonu mìtọn he to aigba ji lẹ, enẹ wẹ. . . ojlo zogbe zanhẹmẹ tọn.” (Kolosinu lẹ 3:5) Vijinu-yido-daihun ma nọ hù ojlo zogbe zanhẹmẹ tọn, kakatimọ e nọ fọ́n adán na ẹn dogọ wẹ. Gbọnvona enẹ, lẹnnupọndo ehe ji:

● Vijinu-yido-daihun nọ zọ́n bọ yè nọ wleawuna jijọ ṣejannabi tọn devo lẹ. Di apajlẹ, whenue mẹde yí vijinu etọn do to aihunda, e nọ ze ayiha etọn lẹpo do awuvivi hinhẹnwa na ede kẹdẹ ji.

● Vijinu-yido-daihun nọ zọ́n bọ yè nọ wá mọ mẹhe yin vijinu awetọnọ lẹ di nuyizan tata kavi nuhe yè na do gbọ ojlo de poun.

● Pọndohlan ṣejannabi tọn he aṣa enẹ nọ hẹnmẹ nado wleawuna sọgan wá hẹn ẹn vẹawuna mẹde nado nọ do pekọ to kọndopọ zanhẹmẹ tọn mẹ hẹ alọwlemẹ etọn.

Kakati nado nọ yí vijinu do daihun nado gbọ ojlo zanhẹmẹ tọn, dovivẹnu nado nọ dava numọtolanmẹ towe lẹ. (1 Tẹsalonikanu lẹ 4:4, 5) Na e nido pà we, onú tintan he Biblu na ayinamẹ etọn wẹ nado nọ dapana ninọmẹ he gán fọ́n ojlo zanhẹmẹ tọn dote na we lẹ. (Howhinwhẹn lẹ 5:8, 9) Bọ eyin a ko yí vijinu-yido-daihun do dó aṣa pete lo? Vlavo, a to tintẹnpọn nado jodo bọ e ma to pipà we. E bọawu taun nado wá tadona lọ kọ̀n dọ towe ko fò, dọ a ma gán wanu sọgbe hẹ anademẹ Jiwheyẹwhe tọn lẹ ba. Nukun he jọja sunnu de he nọ yin Pedro nọ yí do pọ́n ede niyẹn. E dọ, “Eyin n’ko doalọtena aṣa lọ na ojlẹ de bo wá vọ́ jai jẹ e mẹ, n’nọ jẹflumẹ pete. N’nọ lẹndọ nuhe n’wà lọ ma do jona. Podọ e nọ vẹawuna mi nado hodẹ̀.”

Eyin mọ e te na hiẹ lọsu, ma gbọjọ blo. Todido gbẹ́ tin na we. Jọja sunnu po mẹho susu po wẹ ko duto aṣa vijinu-yido-daihun tọn ji. E gán pà hiẹ lọsu!

Nọ Duto Numọtolanmẹ Whẹhuhu Tọn Ji

Dile mí ko dọ do wayi, mẹhe jai jẹ aṣa vijinu-yido-daihun tọn mẹ lẹ nọ to whẹ̀do yede whẹwhẹ. E họnwun dọ ‘awubla to aliho Jiwheyẹwhe tọn mẹ’ gán whàn we nado duto aṣa lọ ji. (2 Kọlintinu lẹ 7:11) Amọ́, numọtolanmẹ whẹhuhu tọn tintindo glanglan nọ hẹn ẹn vẹawunamẹ nado yinuwa. E gán hẹn we gbọjọ sọmọ bọ a ma na jlo na dovivẹnu de ba.—Howhinwhẹn lẹ 24:10.

Enẹwutu, dovivẹnu nado lẹnnupọndo whẹho lọ ji to aliho he sọgbe mẹ. Vijinu-yido-daihun yin walọ mawé de. E gán hẹnmẹ zun “afanumẹ na ojlo po gbẹdudu voovo lẹ po,” bosọ planmẹ jẹ walọ gblezọn devo lẹ kọ̀n. (Titu 3:3) To ojlẹ dopolọ mẹ, vijinu-yido-daihun ma nọ yin pinpọnhlan di wunmẹ fẹnnuwiwa zanhẹmẹ tọn he ylan taun de, taidi galilọ. (Juda 7) Eyin a to ahidi hẹ aṣa vijinu-yido-daihun tọn, ma wá tadona kọ̀n dọ a ko waylando de he ma gán yin jijona gbede blo. Aṣli lọ wẹ nado nọavùnte sọta ojlo lọ podọ ma nado jogbe gbede!

Nuhe sọgbe wẹ e yin dọ yè nọ jẹflumẹ sinsinyẹn eyin yè ko dudeji na ojlẹ de bosọ vọ́ wá jai jẹ e mẹ. To whenue enẹ jọ, hẹn hogbe Howhinwhẹn lẹ 24:16 tọn lẹ do ayiha mẹ he dọmọ: “Dodonọ sọgan jai whla ṣinawe bo na vọ́ fọnṣite, ṣigba, nugbajẹmẹji wẹ na hẹn mẹylankan dahli.” Eyin e wá jọ bọ a klẹnafọ kleun de, enẹ ma ko dohia dọ a yin mẹylankan. Enẹwutu, ma jogbe blo. Kakatimọ, lẹnnupọndo nuhe hẹn we klẹnafọ lọ ji, enẹgodo tẹnpọn nado nọ dapana onú mọnkọ.

Nọ de whenu dovo nado lẹnayihamẹpọn do owanyi po lẹblanu Jiwheyẹwhe tọn po ji. Salmu-kantọ lọ Davidi, he ko jiya awugbopo mẹdetiti tọn lẹ tọn wayi dọmọ: “Dile otọ́ de nọ wàlẹblanuna visunnu etọn lẹ do, mọ wẹ Jehovah ko wàlẹblanuna mẹhe nọ dibusi i lẹ do. Na ewọ yọ́n lehe mí yin didá do hezeheze, bosọ nọ flindọ kọ́gudu wẹ mí.” (Salmu lẹ 103:13, 14) Na nugbo tọn, Jehovah nọ flindọ mí yin mapenọ podọ e “nọ wleawu nado jonamẹ.” (Salmu lẹ 86:5) Humọ, ojlo etọn wẹ yindọ mí ni dovivẹnu vẹkuvẹku nado basi vọjlado. Enẹwutu, afọdide nujọnu tọn tẹlẹ wẹ a gán ze nado duto aṣa lọ ji?

Gbadopọnna ayidedai towe lẹ. Be a nọ pọ́n video kavi tito-to-whinnu televiziọn ji tọn he nọ do nuhe gán fọ́n ojlo zanhẹmẹ tọn dote namẹ lẹ hia kavi nọ yì nọtẹn Intẹnẹt tọn mọnkọ lẹ ji wẹ ya? Salmu-kantọ lọ gbọn nuyọnẹn dali hodẹ̀ hlan Jiwheyẹwhe dọmọ: “Lẹ́ nukun ṣie sẹ̀ sọn nuhe yin ovọ́ lẹ pinpọn ji.” b—Salmu lẹ 119:37.

Dovivẹnu nado ze ayiha do nudevo lẹ ji. Klistiani de he nọ yin William na ayinamẹ dọmọ: “Whẹpo a nado yìhọ, nọ hia nuhe sinai do Ohó Jiwheyẹwhe tọn ji de. Nujọnu taun wẹ e yin dọ onú godo tọn he ji a na lẹnnupọndo whẹpo do yìhọ ni yin gbigbọnu lẹ.”—Filipinu lẹ 4:8.

Dọhodo nuhahun lọ ji hẹ mẹde. Winyan gán glọnalina we nado dọhodo whẹho lọ ji hẹ mẹhe go a dejido de. Etomọṣo, mọwiwà gán gọalọna we nado duto aṣa lọ ji! Klistiani de he nọ yin David mọdọ enẹ nọ hẹn ale wá nugbo. E dọmọ: “N’plan otọ́ ṣie jẹ olá bo do ohó lọ hia ẹ. N’ma na wọ̀n nuhe e gblọnna mi gbede. Po nukiko yẹsẹ po, e vọ́ jide na mi bo dọ, ‘Homẹ ṣie hùn do gowe taun.’ E yọnẹn dọ e na ko biọ adọgbigbo to asi e taun nado hẹn ohó mọnkọ wá e dè. Hogbe etọn lẹ na mi tuli bosọ dozolanmẹna mi taun nado tẹdo gbemima ṣie nado basi vọjlado go.

“Otọ́ ṣie do wefọ delẹ hia mi he gọalọna mi ma nado nọ mọ dee di ‘nuvọ́nọ godo tọn,’ bosọ do wefọ devo lẹ hia mi na n’ma do mọ obá he mẹ nue wá n’te lọ ylan jẹ. Enẹgodo, e dọ dọ mí ni dike ojlẹ de ni juwayi, na mí nisọ pọ́n lehe nulẹ na yì do kakajẹ whedevonu he mí na wá vọ́ hodọdo whẹho lọ ji. E dọ dọ eyin e jọ bọ n’sọ doalọ to aṣa lọ mẹ, enẹ ni ma hẹn awàkan kú mi blo, amọ́ dọ n’ma magbe ma nado vọ́ joawuna aṣa enẹ zọnmii.” Tadona tẹ kọ̀n wẹ David wá? E dọ: “Nuhe hẹn ale wá na mi hugan wẹ nado do whẹho lọ hia mẹdevo bosọ mọ alọgọ yí sọn e dè.” c

TO WETA HE BỌDEGO MẸ

Whẹho sinsinyẹn wẹ zanhẹmẹ tintindo hẹ mẹdepope poun yin. Pọ́n nuhewutu.

[Nudọnamẹ odò tọn lẹ]

WEFỌ TANGAN

“Nọ họ̀nna ojlo jọja whenu tọn lẹ, ṣigba nọ doafọna dodowiwa, yise, owanyi, jijọho, to pọmẹ hẹ mẹhe nọ ylọ Oklunọ sọn ahun wiwe de mẹ lẹ.”—2 Timoti 2:22.

AYINAMẸ

Nọ hodẹ̀ whẹpo ojlo lọ nido sinyẹn. Biọ to Jehovah Jiwheyẹwhe si dọ ni na we “huhlọn he hú jọwamọ tọn” nado duto mẹtẹnpọn lọ ji.—2 Kọlintinu lẹ 4:7.

BE A YỌNẸN YA . . . ?

Mẹhe yin madogánnọ kavi ma pé ede ji de sọgan joawuna ojlo zanhẹmẹ tọn etọn lẹ. Amọ́, sunnu jọ sunnu kavi yọnnu he pé ede ji de nọ dava numọtolanmẹ etọn lẹ, etlẹ yin whenue e to edeṣo.

AFỌDIDE HE N’DONA ZE!

N’gán ze ayiha do nuhe wé lẹ ji eyin n’nọ ․․․․․

Kakati nado joawuna ojlo lọ, n’na ․․․․․

Nuhe n’jlo na kanse mẹjitọ ṣie (lẹ) gando whẹho ehe go wẹ ․․․․․

ETẸWẸ A LẸN?

● Naegbọn e do yin nujọnu nado nọ flindọ Jehovah nọ “wleawu nado jonamẹ”?—Salmu lẹ 86:5.

● To whenuena e yindọ Jiwheyẹwhe lọsu he dá we to aliho de mẹ bọ a gán nọ do ojlo zanhẹmẹ tọn, wẹ sọ biọ dọ a ni nọ dava ẹ, etẹwẹ a lẹndọ ewọ deji dọ a gán wà?

[Nudọnamẹ tangan]

“Sọn whenue n’duto nuhahun lọ ji, n’mọdọ n’gán do ayihadawhẹnamẹ wiwe de to Jehovah nukọn, podọ ehe họakuẹ na mi hugan nudevo depope!”—Sarah

[Yẹdide]

Aijijẹ whladopo to alewezun de whenu ma zẹẹmẹdo dọ a dona vọ́ gọ̀ wezun lọ bẹ sọn godo—mọdopolọ nado vọ́ jai jẹ whẹho vijinu-yido-daihun tọn mẹ ma zẹẹmẹdo dọ vivẹnu he a ko do wayi lẹpo yin ovọ́