KANBIỌ 3
Nawẹ N’Na Nọ Dọho hẹ Mẹjitọ Ṣie lẹ Gbọn?
ETẸWẸ A NA WÀ?
Pọ́n nujijọ ehe: Mercredi whèjai de wẹ bọ Geoff he tindo owhe 17 fó whégbè-zọ́n etọn lẹ bo jlo na gbọjẹ vude! E tá televiziọn bo họ́ jẹ oján he e yiwanna hugan lọ mẹ.
E ma dẹn bọ baba etọn hùnhọ̀n bo mọ ẹn, bọ homẹ etọn ma hùn paali.
“Geoffrey! Be Tele wẹ a mọ bo na pọ́n to ogàn ehe mẹ kakati nado gọalọna nọvisunnu towe nado wazọ́n etọn lẹ ya? A ma nọ wà nue dọna we yè te gbede!”
Geoff hlunnudọ daga dọ “E ko sọ na yá,” bọ baba etọn sè.
Baba etọn dẹ́ bo dọ, “Dẹpẹ, etẹ a dọ din?”
Geoff gbọ gángán bo dọ, “N’ma dọ nude” dile e to nukun lilẹ́.
Todin, baba lọ gblehomẹ bo dọ po adán po dọ “Ṣọ́ dewe mọọ!”
Eyin hiẹ wẹ yin Geoff, etẹwẹ a na ko wà na ehe nikaa jọ?
YIAGBỌJI BO LẸNNUPỌN!
Hodidọ dopọ hẹ mẹjitọ towe lẹ taidi mọto de kùnkùn. Eyin a mọdọ ali de ján, a sọgan dín ali devo.
DI APAJLẸ:
Awhli de he nọ yin Leah dọ, “E nọ vẹawuna mi nado dọhodopọ hẹ baba ṣie. N’ko nọ to hodọna ẹn na ojlẹ de bọ e nọ wá dọ, ‘jaale, etẹwẹ a dọ dai?’”
LEAH SỌGAN DE NADO WÀ DOPO TO ONÚ ATỌ̀N EHELẸ MẸ.
-
Dawhá do baba etọn ji.
Leah sọgan dawhá dọ “Mì ma nọ dotó mi gbede!”
-
Doalọtena hodidọ na baba etọn.
Leah sọgan nọma dọ nuhahun lọ na baba etọn ba.
-
Nọtepọn ojlẹ he sọgbe lọ nado vọ́ hodọdo whẹho lọ ji.
Leah sọgan dọhodopọ hẹ baba etọn nukun-sọ-nukun to whedevonu kavi kanwehlan ẹn gando nuhahun lọ go.
Detẹ to onú atọ̀n ehelẹ mẹ wẹ a na ko na tuli Leah nado wà?
PỌ́N: Leah sin baba ko yin ayihafẹsẹna podọ e ma yọnẹn dọ Leah gblehomẹ. Enẹwutu, eyin Leah de Afọdide A lọ, otọ́ lọ sọgan nọma mọnukunnujẹ nuhewutu e do to awhádo mẹ. Afọdide ehe ma na zọ́n bọ otọ́ etọn na dotoaina ẹn, podọ ehe ma na do sisi po gbégbò po hia otọ́ lọ. (Efesunu lẹ 6:2) Enẹwutu, nado dọ hójọhó, afọdide ehe ma na wà dagbe.
Kẹdẹdile e ma yin dandan dọ a ni dike ali jinján de ni do we te kakadoi, mọ wẹ a sọgan dín ali devo nado kọngbedopọ hẹ mẹjitọ towe lẹ do niyẹn
Podọ Afọdide B lọ sọgan taidi nuhe bọawu hugan, amọ́ e ma yin nuyọnẹnnu. Etẹwutu? Na eyin Leah jlo na duto nuhahun etọn lẹ ji, e dona dọhona baba etọn—eyin baba etọn nasọ penugo nado gọalọna ẹn, e dona yọ́n nuhe to yìyì to gbẹzan etọn mẹ. Abọẹninọ ma na jla nudepope do.
Ṣigba, eyin Leah de Afọdide C lọ, nudepope ma na glọnalina ẹn nado dọho hẹ baba etọn. Kakatimọ, e na tẹnpọn nado dọhodo whẹho lọ ji to whedevonu. Podọ eyin Leah de nado kanwehlan baba etọn, enẹ sọgan fahomẹna ẹn to afọdopolọji.
Wekinkan sọgan sọ gọalọna ẹn nado dọ nuhe to ahun ji na ẹn taun. Whenue baba etọn na hia wekanhlanmẹ lọ, e na mọ nuhe Leah to tintẹnpọn nado dọna ẹn lọ ganji bo na penugo nado yọ́n ninọmẹ etọn dogọ. Ayihaawe matin dọ ehe na hẹn ale wá na Leah po baba etọn po. Vlavo yé dọho nukun-sọ-nukun kavi gbọn wekanhlanmẹ dali, afọdide C lọ sọgbe hẹ ayinamẹ Biblu tọn he dọmọ: “Mì gbọ mí ni doafọna nuhe nọ hẹn jijọho wá lẹ.”—Lomunu lẹ 14:19.
Afọdide devo tẹlẹ wẹ Leah sọgan ze?
Pọ́n eyin a sọgan mọ dopo. Enẹgodo, lẹnnupọndo nuhe na yin kọdetọn afọdide enẹ tọn ji.
NỌ PAYI LEHE NUHE A DỌ NA YIN NUKUNNUMỌJẸEMẸ DO GO
Flindọ mẹjitọ towe lẹ sọgan nọma mọnukunnujẹ nuhe dọ a te mẹ dile hiẹ lẹn do to whelẹponu.
DI APAJLẸ:
Mẹjitọ towe lẹ kàn nuhewutu homẹ towe ma hùn sè we. A dọ, “Nude ma jọ.”
Nuhe mẹjitọ towe lẹ sọgan mọnukunnujẹemẹ die: “N’ma dejido mì go nado dọho enẹ na mì. E pé na mi nado dọ nuhahun ṣie lẹ na họntọn ṣie lẹ.”
Mí ni dọ dọ a to pipehẹ nuhahun sinsinyẹn de bọ mẹjitọ towe lẹ jlo na gọalọna we. Ṣigba a dọ dọ: “Mì ma hanú blo. N’yọ́n nue n’na wà.”
-
Etẹ mẹ wẹ mẹjitọ towe lẹ sọgan mọnukunnujẹ?
-
Gblọndo tẹwẹ a na ko na?
A Gán Sọ Pọ́n Hosọ Ehelẹ
KANBIỌ HE JỌJA LẸ NỌ KANSE
Nawẹ N’Sọgan Nọ Jijọho mẹ hẹ Mẹjitọ Ṣie lẹ Gbọn?
Ayinamẹ atọ́n delẹ die he sọgan gọalọna we nado dapana gbemanọpọ delẹ podọ ayinamẹ ehelẹ nasọ gọalọna we ma nado hẹn nulẹ vantan to whenue gbemanọpọ lẹ tlẹ fọ́n.
YẸDIDE ṢIṢAVI TỌN LẸ
Nawẹ N’Sọgan Nọ Dọho hẹ Mẹjitọ Ṣie lẹ Gbọn?
Nawẹ a gán dọho hẹ mẹjitọ towe lẹ gbọn eyin hodidọ ma tlẹ jlo we?
