Pọ́n nujijọ ehe: Karen jẹ agọ́ de ji e ma pé nukunwhiwhe ao bọ mẹyinyọnẹn de ylọ ẹ sọn godo.

Karen lilẹ́ bo mọ họntọn etọn Jessica po ahàn-go awe he yè ṣẹṣẹ hùn po to alọmẹ. E doayi e go dọ ahàn sinsinyẹn lẹ wẹ. Jessica dlẹn ahàn lọ dopo do Karen bo dọmọ: “A masọ yin yọpọvu ba nẹ, kavi?”

Karen jlo na gbẹ́, amọ́ họntọn etọn wẹ Jessica yin. Podọ, Karen ma jlo dọ họntọn emitọn ni lẹndọ homẹ emitọn ma hùn. Humọ, yọnnu dagbe de wẹ Jessica yin, bo ka to ahànnu, ehe dohia dọ nude ma ylan to e mẹ sọmọ. Karen dọna ede dọ, ‘ahàn poun wẹ sin, e ma yin amasin adínọ nẹ.’

Eyin a to ninọmẹ Karen tọn mẹ, etẹwẹ a na wà?

Nado basi nudide dagbe to ninọmẹ mọnkọtọn mẹ, a dona yọ́n dewe whẹ́. Nado yọ́n dewe zẹẹmẹdo nado yọ́n mẹhe nkọ a yin po nujinọtedo towe lẹ po. Eyin a yọ́n ehelẹ, a na penugo nado deanana gbẹzan towe kakati mẹdevo lẹ ni nọ deanana ẹn.—1 Kọlintinu lẹ 9:26, 27.

Nawẹ a sọgan wleawuna nugopipe enẹ gbọn? Bẹjẹeji gbọn gblọndo dindin na kanbiọ he bọdego lẹ dali.

Eyin a yọ́n nugopipe po jẹhẹnu dagbe towe lẹ po, jidide towe na sinyẹn deji.

APAJLẸ BIBLU TỌN: Apọsteli Paulu wlan dọmọ: “Eyin yẹn ma tlẹ tindo nugopipe to hodidọ mẹ, e họnwun dọ yẹn wàmọ to oyọnẹn mẹ.” (2 Kọlintinu lẹ 11:6) Na Paulu nọ mọnukunnujẹ Owe-wiwe lẹ mẹ ganji wutu, e penugo nado hẹn tenọgligo to whenue mẹdevo lẹ diọavunnukunsọ ẹ. E ma dike hodidọ agọ̀ yetọn lẹ ni dekanpona jidide etọn.—2 Kọlintinu lẹ 10:10; 11:5.

GBEJE DEWE PỌ́N: Kàn nugopipe towe kavi nunina he a tindo de dofi.

Todin, basi zẹẹmẹ jẹhẹnu dagbe he a tindo de tọn. (Di apajlẹ, be a nọ homẹtọnpọn ya? Be a nọ hẹjómẹ ya? Be yè sọgan dejido gowe ya? Be a nọ nọ̀ gànmẹ ji ya?)

Dile atin he ma doadọ̀do ganji de sọgan yawu họ́ do, mọ wẹ gbẹzan towe sọgan gble do eyin a nọ natẹn awugbopo towe lẹ nado deanana we.

APAJLẸ BIBLU TỌN: Paulu yọ́n awugbopo etọn lẹ. E wlan dọmọ: “Na taun tọn, yẹn nọ mọ awuvivi to osẹ́n Jiwheyẹwhe tọn mẹ sọgbe hẹ mẹhe n’yin to homẹ, ṣigba n’mọ osẹ́n devo to agbasa ṣie mẹ he to awhànfun sọta osẹ́n ayiha ṣie mẹ tọn bo to hinhẹn mi zun kanlinmọ na osẹ́n ylando tọn.”—Lomunu lẹ 7:22, 23.

GBEJE DEWE PỌ́N: Awugbopo tẹ ji wẹ n’dona dù te?

Be hiẹ na do mọto bo na biọ to húnkùntọ lọ si dọ ni to lilẹpe kaka bọ amì etọn na vọ̀ wẹ ya? Nulunu wẹ enẹ na yin—bo nasọ hẹn akuẹ gú!

Etẹwẹ yin nuplọnmẹ lọ? Yanwle lẹ na zọ́n bọ gbẹzan towe na tindo lẹndai bọ a ma na to lilẹpe. A do fide bo jei bosọ bayi tito nado jẹ finẹ.

APAJLẸ BIBLU TỌN: Paulu wlan dọmọ: “Aliho he mẹ yẹn to wezundo te ma yin po lẹndai matindo po gba.” (1 Kọlintinu lẹ 9:26) Kakati Paulu ni dike nulẹ ni to yìyì poun to gbẹzan etọn mẹ, e ze yanwle lẹ dai bosọ yinuwa sọgbe hẹ yé.—Filipinu lẹ 3:12-14.

GBEJE DEWE PỌ́N: Kàn yanwle atọ̀n he kọ̀n a na jẹ to owhe he ja mẹ lẹ dofi.

Eyin a ma tindo nujikudo, a na nọ tindo ayihaawe. Taidi agànma, a na nọ diọwunmẹ nado sọgan yinuwa taidi hagbẹ towe lẹ—ehe na dohia dọ a ma yọ́n dewe.

To vogbingbọn mẹ, eyin a nọ yinuwa sọgbe hẹ nujikudo towe lẹ, a na do mẹhe nkọ a yin hia—mahopọnna nuhe mẹdevo lẹ to wiwà.

APAJLẸ BIBLU TỌN: Dile etlẹ taidi dọ yẹwhegán Daniẹli gbẹ́ yin jọja, e “magbe to ahun etọn mẹ” nado setonuna osẹ́n Jiwheyẹwhe tọn lẹ mahopọnna dọ e ma topọ hẹ whẹndo etọn. (Daniẹli 1:8) Gbọn mọwiwà dali, e yin nugbonọ na ede. Daniẹli nọgbẹ̀ sọgbe hẹ nujikudo etọn lẹ.

GBEJE DEWE PỌ́N: Etẹwẹ yin nujikudo towe lẹ? Di apajlẹ: Be hiẹ yise to Jiwheyẹwhe mẹ ya? Eyin mọwẹ, etẹwutu? Etẹwẹ hẹn we kudeji dọ ewọ tin?

Be a yise dọ nujinọtedo walọ dagbe tọn Jiwheyẹwhe tọn lẹ na hẹn ale wá na we ya? Eyin mọwẹ, etẹwutu?

To godo mẹ, be a jlo na taidi amà húhú he jẹhọn depope nọ to fúfú dlan wẹ ya kavi atin he sọgan nọte pannukọn yujẹhọn sinsinyẹn lẹ? Eyin a nọ do nuhe a yin hia po nujikudo po, a na taidi atin mọnkọtọn. Enẹ nasọ gọalọna we nado na gblọndo na kanbiọ lọ dọ, Omẹ Nankọ Wẹ N’Yin?