To whèjai godo tọn he Jesu yizan hẹ apọsteli etọn lẹ, e ko plọn yé devizọnwiwa po whiwhẹ po gbọn afọ yetọn lẹ kiklọ dali. Naegbọn enẹ do wá do gànmẹ? Na awugbopo he yé ko dohia wutu wẹ. Yé ko ze yede jo na Jiwheyẹwhe, ṣogan mẹhe klohugan to yé mẹ gbẹ́ nọ duahunmẹna yé. (Malku 9:33, 34; 10:35-37) Awugbopo enẹ sọ vọ́ sọawuhia to whèjai enẹ.

“Nudindọn sinsinyẹn de fọ́n to [apọsteli lọ lẹ] ṣẹnṣẹn gando mẹhe klohugan to yé mẹ go.” (Luku 22:24) Lehe e na ko biọlanmẹna Jesu nado mọdọ yé sọ vọ́ to nudọn do sọ! Etẹwẹ e wà?

Kakati nado wọhẹ apọsteli lọ lẹ na pọndohlan po nuyiwa yetọn po wutu, Jesu yí homẹfa do yihojlẹdohogo hẹ yé dọmọ: “Ahọlu akọta lẹ tọn lẹ nọ duklunọ do yé ji, podọ mẹhe tindo aṣẹ do yé ji lẹ nọ yin yiylọdọ Dagbewatọ lẹ. Nalete, e ma dona yinmọ na mìwlẹ. . . . Na mẹnu wẹ klohu, ewọ he jagla to tafo kọ̀n kavi ewọ he to lizọnyi?” Enẹgodo, Jesu flinnu yé gando apajlẹ he e ko nọ saba zedai na yé go bo dọmọ: “Etomọṣo, yẹn tin to mì ṣẹnṣẹn taidi mẹhe to lizọnyi.”—Luku 22:25-27.

Mahopọnna mape apọsteli lọ lẹ tọn, yé gbọṣi Jesu dè to ninọmẹ susu he kàn dẹpẹ biọ lẹ mẹ. Enẹwutu, e dọmọ: “Yẹn basi alẹnu Ahọluduta tọn de hẹ mì, kẹdẹdile Otọ́ ṣie ko basi alẹnu de hẹ mi do.” (Luku 22:29) Sunnu ehelẹ wẹ hodotọ nugbonọ Jesu tọn lẹ. Ewọ na yé jide dọ, gbọn alẹnu de to ewọ po yewlẹ po ṣẹnṣẹn dali, yé na tin to Ahọluduta lọ mẹ bo na duahọlu hẹ ẹ.

Mahopọnna dọ apọsteli lẹ tindo todido jiawu ehe, yé gbẹ́ tin to agbasalan mẹ bo gbẹ́ yin mapenọ. Jesu dọna yé dọmọ: “Satani ko biọgbè nado jàn mì di likun,” ehe nọ vúnvún pé eyin yè to jinjàn ẹn. (Luku 22:31) E sọ na avase dọmọ: “Mìmẹpo wẹ na dahli to ozán ehe mẹ na nuhe na jọ do go e wutu, na e ko yin kinkandai dọ: ‘Yẹn na linú lẹngbọhọtọ lọ, bọ lẹngbọ lẹngbọpa lọ tọn lẹ na gbàdo.’”—Matiu 26:31; Zekalia 13:7.

Po jide po, Pita jẹagọdo dọmọ: “Eyin mẹhe pò lẹpo tlẹ dahli na nuhe na jọ do gowe wutu, yẹn ma na dahli gbede!” (Matiu 26:33) Jesu dọna Pita dọ whẹpo koklo na dosé whla awe to ozán enẹ mẹ, Pita na mọ́n emi. Ṣigba, Jesu yidogọ dọmọ: “Yẹn ko basi ovẹvivẹ do ota towe mẹ na yise towe nikaa miọn, podọ hiẹ, tlolo he hiẹ lẹkọ, hẹn mẹmẹsunnu towe lẹ lodo.” (Luku 22:32) Ṣogan, Pita dọ po jintli po dọmọ: “Eyin etlẹ biọ dọ yẹn ni kú po hiẹ po, yẹn ma na mọ́n we gbede.” (Matiu 26:35) Apọsteli he pò lẹ dọ nudopolọ.

Jesu dọna devi etọn lẹ dọmọ: “Yẹn na gbẹ́ nọ mì dè vude dogọ. Mìwlẹ na dín mi; podọ kẹdẹdile yẹn ko dọna Ju lẹ do dọ, ‘Fihe yẹn jei, mìwlẹ ma sọgan wá,’ todin, yẹn sọ vọ́ dọ ẹ na mìlọsu.” Enẹgodo, e yidogọ dọmọ: “Gbedide yọyọ de wẹ yẹn to nina mì, dọ mì ni yiwanna ode awetọ; kẹdẹdile yẹn ko yiwanna mì do, dọ mìlọsu ni yiwanna ode awetọ mìtọn. Gbọn ehe dali wẹ mẹlẹpo na yọnẹn dọ devi ṣie lẹ wẹ mì yin, eyin mì tindo owanyi to mìdelẹ ṣẹnṣẹn.”—Johanu 13:33-35.

To whenue Pita sè bọ Jesu dọ dọ emi na gbẹ́ nọ yé dè vude dogọ, e kanse dọmọ: “Oklunọ, fie wẹ hiẹ jei?” Jesu gblọn dọmọ: “Fihe yẹn jei, hiẹ ma sọgan hodo mi todin, ṣigba hiẹ na hodo mi to godo mẹ.” Pita biọ bẹwlu mẹ bo dọmọ: “Oklunọ, naegbọn yẹn ma sọgan hodo we todin? Yẹn na ze alindọn ṣie jo do ota towe mẹ.”—Johanu 13:36, 37.

Todin, Jesu donù ojlẹ he mẹ e do apọsteli lẹ hlan nado yì dọyẹwheho to Galili bọ yé ma hẹn sẹgẹ akuẹ tọn kavi aglò núdùdù tọn de go. (Matiu 10:5, 9, 10) E kanse dọmọ: “Mì ma jẹdò nudepope tọn, kavi mì jẹdò yetọn wẹ?” Yé gblọn dọmọ: “Lala!” Ṣigba, etẹwẹ yé dona wà to ojlẹ he  to nukọn ja lẹ mẹ? Jesu na yé anademẹ dọmọ: “Mì gbọ mẹhe tindo sẹgẹ akuẹ tọn de ni ze e, mọdopolọ, aglò núdùdù tọn de, podọ mì gbọ mẹhe ma tindo ohí de ni sà awugbó etọn bo họ̀ ode. Na yẹn dọna mì dọ, nuhe yin kinkandai ehe dona yin hinhẹndi to yẹn mẹ, dọmọ, ‘E sọ yin hihia dopọ hẹ sẹ́nhẹngbatọ lẹ.’ Na enẹ he gando yẹn go to yinyin hinhẹndi.”—Luku 22:35-37.

Whenue Jesu na yin whiwhè do pòtin go hẹ ylanwatọ kavi sẹ́nhẹngbatọ lẹ wẹ e to alọdlẹndo. Enẹgodo, hodotọ etọn lẹ na pehẹ homẹkẹn sinsinyẹn. Yé mọdọ emi ko wleawudai bo dọmọ: “Oklunọ, pọ́n! ohí awe die.” Ewọ gblọn dọmọ: “E ko pé.” (Luku 22:38) Ohí awe he yé tindo lọ lẹ na hùn dotẹnmẹ dote na Jesu to madẹnmẹ nado plọn yé onú titengbe devo.