Jesu whẹ́n to Nazalẹti, yèdọ to tòpẹvi he ma diyin sọmọ de mẹ. E tin to agewaji to lẹdo pópló tọn de mẹ he nọ yin Galili, to whèzẹtẹn-waji otọ̀ daho de tọn he yin yinyọnẹn taidi Ohù Galili tọn.

To whenue Jesu tindo nudi owhe awe wẹ Josẹfu po Malia po plan ẹn sọn Egipti wáfi. E taidi dọ ewọ kẹdẹ wẹ yin ovi yetọn to whenẹnu. Ṣigba to nukọn mẹ, nọvisunnu daa Jesu tọn lẹ yin jiji, enẹ wẹ Jakọbu, Josẹfu, Simọni po Juda po. Josẹfu po Malia po sọ ji viyọnnu lẹ ga, yèdọ nọviyọnnu daa Jesu tọn lẹ. Mọwẹ, e whè gbau Jesu tindo nọvisunnu ẹnẹ po nọviyọnnu awe po.

Na nugbo tọn, Jesu tindo hẹnnumẹ devo lẹ. Mí ko plọnnu wayi gando Elizabẹti po visunnu etọn Johanu po go. Yé nọ nọ̀ hùwaji to Jude, yèdọ fie dẹn na kilomẹtlu susu. Salome he sọgan ko yin nọviyọnnu Malia tọn, yèdọ nafẹ Jesu tọn nọ nọ̀ lẹdo Galili tọn mẹ. Asu Salome tọn wẹ Zebede. Visunnu yetọn awe lẹ, yèdọ Jakọbu po Johanu po wẹ na ko yin nafẹ-vi tintan Jesu tọn lẹ. Mí ma yọnẹn eyin Jesu yí whenu susu zan dopọ hẹ visunnu awe ehelẹ to whenue yé to whinwhẹ́n, ṣigba e họnwun dọ yé wá lẹzun gbẹdohẹmẹtọ pẹkipẹki etọn lẹ, yèdọ awe to apọsteli etọn lẹ mẹ.

Josẹfu dona wazọ́n sinsinyẹn nado penukundo whẹndo etọn he to jijideji lọ go. Whlẹpatọ de wẹ ewọ. Na e pọ́n Jesu go whẹ́n taidi visunnu etọn titi wutu, Jesu nọ yin yiylọdọ “visunnu  whlẹpatọ lọ tọn.” (Matiu 13:55) Josẹfu plọn azọ́n whlẹpatọ tọn Jesu, podọ Jesu yọ́n azọ́n ganji. Na nugbo tọn, gbẹtọ lẹ dọ gando Jesu go to nukọn mẹ dọmọ: “Ehe wẹ whlẹpatọ lọ.”—Malku 6:3.

Whẹndo Josẹfu tọn nọ ze sinsẹ̀n-bibasi Jehovah tọn do otẹn tintan mẹ. Dile Osẹ́n Jiwheyẹwhe tọn biọ do, Josẹfu po Malia po nọ na anademẹ gbigbọmẹ tọn ovi yetọn lẹ ‘to whenue yé sinai to owhé yetọn gbè, to whenue yé to zọnlinzin to aliho ji, to whenue yé mlọnai podọ to whenue yé fọ́n.’ (Deutelonomi 6:6-9) Sinagọgu de tin to Nazalẹti. Mí sọgan kudeji dọ Josẹfu nọ plan whẹndo etọn yì finẹ to gbesisọ mẹ nado basi sinsẹ̀n. E wá yin didọ to nukọn mẹ dọ Jesu yì sinagọgu mẹ, “dile e ko yin aṣa etọn to Gbọjẹzangbe do.” (Luku 4:16) Ayajẹ daho wẹ e sọ nọ yin na whẹndo lọ nado nọ zingbejizọnlin to gbesisọ mẹ yì tẹmpli Jehovah tọn mẹ to Jelusalẹm.