Pọ́n visunnu pẹvi he tin to yẹdide lọ mẹ. E taidi dọ e to ṣokẹdẹ bo to budi, kavi? Be enẹ ko jọ do gowe pọ́n ya?— Mẹlẹpo go wẹ enẹ nọ jọ do. Biblu dọhodo họntọn Jehovah tọn delẹ ji he ko mọ yede to ṣokẹdẹ pọ́n bo dibu. Dopo to yé mẹ wẹ Elija. Gbọ mí ni dọhodo ewọ ji.

Elija nọgbẹ̀ to Islaeli e ko dẹn taun whẹpo Jesu do yin jiji. Ahabi he yin ahọlu Islaeli tọn ma to Jiwheyẹwhe nugbo lọ, Jehovah sẹ̀n. Yẹwhe lalo Baali wẹ ewọ po asi etọn Jezebẹli po to sinsẹ̀n. Enẹ zọ́n bọ Islaelivi susu jẹ Baali sẹ̀n ji. Mẹylankan taun wẹ Ahọsi Jezebẹli yin bo jlo na hù mẹhe nọ sẹ̀n Jehovah lẹpo, kakajẹ Elija ji. Be a yọ́n nuhe Elija wà ya?—

Elija họnyi fie dẹn taun de to danfafa ji bo whlá ede do osó de glọ. Be a yọ́n nuhewutu ewọ wàmọ ya?— Mọwẹ, budi  wẹ e te. Amọ́, Elija ma dona ko dibu. Etẹwutu? Na ewọ yọnẹn dọ Jehovah sọgan gọalọna emi. Jẹnukọnna nujijọ ehe, Jehovah ko do huhlọn etọn hia Elija. Di apajlẹ, Jehovah ko sè odẹ̀ etọn bo do miyọ́n hlan sọn olọn mẹ. Enẹwutu, e họnwun dọ Jehovah sọgan gọalọna Elija todin lọsu!

To whenue Elija to osó lọ glọ, Jehovah kanbiọ ẹ dọmọ: ‘Etẹwẹ a to wiwà tofi?’ Elija gblọn dọmọ: ‘Yẹn kẹdẹ wẹ pò bo to sinsẹ̀n we. N’to ṣokẹdẹ podọ n’to budi dọ yè na hù mi.’ Elija lẹndọ sinsẹ̀n-basitọ Jehovah tọn he pò lẹpo wẹ ko yin hùhù. Amọ́ Jehovah dọna Elija dọmọ: ‘Lala, e ma yin hiẹ kẹdẹ wẹ pò. Gbẹtọ 7 000 gbẹ́ pò bo to sinsẹ̀n mi. Gboadọ. Azọ́n susu gbẹ́ pò bọ a na wà na mi!’ Be a lẹndọ homẹ Elija tọn hùn nado sè ohó enẹlẹ ya?—

Etẹwẹ a sọgan plọn sọn nuhe jọ do Elija go mẹ?— Ma nọ mọdọ emi to ṣokẹdẹ bo nọ dibu blo. A tindo họntọn he yiwanna Jehovah bosọ yiwanna we lẹ. Gbọnvona enẹ, Jehovah tindo huhlọn taun, podọ e na gọalọna we to whelẹponu! Be homẹ towe hùn nado yọnẹn dọ Jehovah tin hẹ we to whelẹponu ya?—