Whladopo gee wẹ nukinkan do agbasago yin nùdego to Biblu mẹ, to Levitiku 19:28 mẹ, he dọmọ: “Mì ma dona kannu do agbasa mìtọn go.” Akọta Islaeli tọn wẹ Jiwheyẹwhe na gbedide ehe, nado hẹn yé gbọnvona akọta he lẹdo yé lẹ he nọ kàn yinkọ kavi ohia yẹwhe yetọn lẹ tọn do agbasago lẹ. (Deutelonomi 14:2) Dile etlẹ yindọ Klistiani lẹ ma tin to Osẹ́n he yin nina Islaelivi lẹ glọ, nunọwhinnusẹ́n kavi anademẹ he osẹ́n enẹ bẹhẹn gbẹ́ jẹna ayidego taun.

Be e sọgbe dọ Klistiani de ni kannu kavi de yẹdide do agbasago ya?

 Wefọ Biblu tọn he bọdego ehelẹ sọgan gọalọna we nado lẹnnupọndo whẹho lọ ji:

•   ‘Yọnnu lẹ ni nọ gbọn mẹdehihọ́ dali doaṣọ́na yede.’ (1 Timoti 2:9) Anademẹ he wefọ ehe bẹhẹn gando sunnu po yọnnu po go. Mí dona nọ na sisi numọtolanmẹ mẹdevo lẹ tọn bo dapana ayidonugo he ma yin dandan tọn dindọn wá míde ji.

•   Mẹdelẹ nọ kannu do agbasago nado do mẹhe yé yin kavi fie yé wá sọn hia kavi nado dohia dọ emi ma to mẹde si, amọ́ mẹdevo lẹ nọ wàmọ nado dohia dọ nue jlo emi wẹ emi gán yí agbasa emitọn do wà. Ṣigba, Biblu na tuli Klistiani lẹ dọmọ: “[Mì] yí agbasa mìtọn do basi avọ́sinsan he togbẹ̀, wiwe, he yin alọkẹyi na Jiwheyẹwhe, yèdọ sinsẹ̀nzọn wiwe he yin bibasi po huhlọn nulẹnpọn tọn mìtọn po.” (Lomunu lẹ 12:1) Yí “huhlọn nulẹnpọn tọn” towe zan nado gbeje nuhewutu e nọ jlo we dọ a ni kannu do agbasago pọ́n. Eyin a jlo na wàmọ na enẹ wẹ to zòji wutu kavi nado dohia dọ a yin hagbẹ ogbẹ́ de tọn wutu, flindọ linlẹn he a tindo todin do to mọwà gán wá diọ, amọ́ nukinkan lọ uwọ na gbọṣi gowe na ojlẹ dindẹn. Nulinlẹnpọn do nue to sisisẹ́ we nado wàmọ ji gán gọalọna we bọ a na basi nudide nuyọnẹn tọn de.—Howhinwhẹn lẹ 4:7.

•   “Tito mẹhe nọ dovivẹnu tọn lẹ nọ tindo kọdetọn dagbe dandan, ṣigba, mẹhe ma nọ whesọ lẹpo wẹ na biọ ohẹ́n mẹ dandan.” (Howhinwhẹn lẹ 21:5) Mẹlẹ nọ saba basi nudide nado kannu kavi de yẹdide do agbasago gbọn sọmawhe dali, bọ ehe ka sọgan hẹn nuhahun lẹ wá na yé na ojlẹ dindẹn, vlavo to nuwadopọ yetọn hẹ mẹdevo lẹ mẹ kavi gando agbasazọ́n he yé na wà go. Podọ nue ko yin kinkan do agbasago de didesẹ sọgan biọ akuẹzinzan taun bosọ hẹn awufiẹsa susu wá. Dodinnanu lẹ—gọna akuẹ susu he ajọwhé he nọ de nukinkan sẹ̀ sọn agbasago namẹ lẹ to mimọ—dohia dọ suhugan mẹhe tindo nukinkan kavi yẹdide de to agbasago lẹ tọn wẹ e nọ wá vẹna dọ yé wàmọ.