Dọdai zẹẹmẹdo owẹ̀n de kavi numimọ de he wá sọn Jiwheyẹwhe dè. Biblu dọ dọ yẹwhegán lẹ “dọho sọn Jiwheyẹwhe dè dile yé yin anadena gbọn gbigbọ wiwe dali do.” (2 Pita 1:​20, 21) E dohia dọ mẹhe nọ mọ owẹ̀n yí sọn Jiwheyẹwhe dè bo nọ wá do e mẹdevo lẹ wẹ nọ yin yiylọdọ yẹwhegán.​—Owalọ lẹ 3:​18.

Nawẹ Yẹwhegán lẹ Nọ Mọ Owẹ̀n Yí sọn Jiwheyẹwhe dè Gbọn?

 Jiwheyẹwhe nọ yí aliho voovo lẹ zan nado hẹn linlẹn etọn lẹ zun yinyọnẹn na yẹwhegán etọn lẹ:

•   Nukinkan. Jiwheyẹwhe yí aliho ehe zan e whè gbau to nujijọ dopo mẹ, enẹ wẹ whenue ewọ lọsu ze kandai Gbedide Ao lẹ tọn jo na Mose tlọlọ.​—Eksọdusi 31:18.

•   Hodidọ gbọn angẹli lẹ gblamẹ. Di apajlẹ, Jiwheyẹwhe yí angẹli de zan nado na anademẹ Mose gando owẹ̀n he ewọ dona yì do na Falo Egipti tọn go. (Eksọdusi 3:2-4, 10) Eyin nuhe wẹndomẹ lọ bẹhẹn lẹ yin nujọnu taun, Jiwheyẹwhe nọ biọ to angẹli lẹ si nado do owẹ̀n lọ tlọlọ po hogbe etọn titi lẹ po, dile e yindo to whenue e dọna Mose dọmọ: “Kàn ohó ehelẹ dai, na to kọndopọ mẹ hẹ ohó ehelẹ wẹ yẹn to alẹnu de basi hẹ hiẹ po Islaeli po.”​—Eksọdusi 34:27. a

•   Numimọ lẹ. To whedelẹnu, Jiwheyẹwhe nọ hẹn yẹwhegán lẹ nado mọ numimọ lẹ to whenue yé to nukle bọ nukun yetọn lẹ to ote. (Isaia 1:1; Habakuku 1:1) Numimọ delẹ nọ họnwun sọmọ bọ mẹhe yé to yinyin didohia lọ lọsu nọ tindo mahẹ to yé mẹ. (Luku 9:28-36; Osọhia 1:10-17) To ojlẹ devo lẹ mẹ, numimọ delẹ nọ sọawuhia taidi odlọ kléwhète tọn nkọ. (Owalọ lẹ 10:10, 11; 22:17-21) Jiwheyẹwhe sọ nọ do owẹ̀n etọn yẹwhegán lẹ gbọn odlọ gblamẹ to whenue yé to amlọn mẹ.​—Daniẹli 7:1; Owalọ lẹ 16:9, 10.

•   Anadidena ayiha yetọn lẹ. Jiwheyẹwhe nọ deanana linlẹn yẹwhegán etọn lẹ tọn bọ yé nọ yọ́n owẹ̀n etọn he yé dona do. Ehe wẹ Biblu to alọdlẹndo to whenue e dọ dọ: “Owe-wiwe lẹpo wẹ yin gbigbọdo sọn Jiwheyẹwhe dè.” (2 Timoti 3:​16) Jiwheyẹwhe nọ yí gbigbọ wiwe kavi huhlọn-yido-wazọ́n etọn do ‘gbọ’ kavi ze linlẹn etọn lẹ do ayiha devizọnwatọ etọn lẹ tọn mẹ. Jiwheyẹwhe tọn wẹ owẹ̀n lọ, amọ́ yẹwhegán lẹ nọ ṣinyan hogbe he yé na yí do dowẹn lọ lẹ.​—2 Samuẹli 23:​1, 2.

Be nuhe na wá jọ to nukọn mẹ lẹ kẹdẹ go wẹ dọdai lẹ nọ gando ya?

 Lala, dọdai Biblu tọn lẹ ma nọ dọhodo nuhe na wá jọ to nukọn mẹ lẹ kẹdẹ ji. Amọ́, suhugan wẹndomẹ he wá sọn Jiwheyẹwhe dè lẹ tọn wẹ nọ do nuhe na jọ to nukọn mẹ lẹ hia, etlẹ yin to aliho he ma yin tlọlọ tọn mẹ. Di apajlẹ, yẹwhegán Jiwheyẹwhe tọn lẹ na avase Islaelivi hohowhenu tọn lẹ whlasusu gando walọyizan ylankan yetọn lẹ go. Avase enẹlẹ nọ bẹ dona he yé na mọyi eyin yé setonu lẹ hẹn, gọna nugbajẹmẹji he na wá yé ji eyin yé vẹtoli. (Jelemia 25:​4-6) Nuhe na wá jọ to nukọn mẹ lọ nọ sinai do lehe Islaelivi lẹ de nado yinuwa do ji.​—Deutelonomi 30:19, 20.

Dọdai Biblu tọn delẹ he ma gando nuhe na wá jọ to nukọn mẹ lẹ go

•   To nujijọ dopo whenu, Islaelivi lẹ biọ alọgọ Jiwheyẹwhe tọn bọ e do yẹwhegán de hlan nado basi zẹẹmẹ na yé dọ, na yé ko gbẹ́ nado setonuna gbedide Jiwheyẹwhe tọn lẹ wutu wẹ Ewọ ma do gọalọna yé.​—Whẹdatọ lẹ 6:6-10.

•   Whenue Jesu dọhona yọnnu Samalianu de, e dọ nuhe ko jọ do yọnnu lọ go wayi delẹ na ẹn, podọ e họnwun dọ Jiwheyẹwhe wẹ na ko hẹn onú enẹlẹ zun yinyọnẹn na Jesu. Yọnnu lọ dọ dọ yẹwhegán de wẹ ewọ yin, mahopọnna dọ ewọ ma dọdai depope gando sọgodo go.​—Johanu 4:​17-​19.

•   To whenue kẹntọ Jesu tọn lẹ to whẹdana ẹn, yé ṣinyọnnudo nukunmẹ na ẹn bo linú in bosọ dọna ẹn dọmọ: “Dọ dọdai! Mẹnu wẹ linú we?” Tofi, yé ma to bibiọ sọn Jesu si nado dọ nuhe na wá jọ to nukọn mẹ de gba, ṣigba nado yí huhlọn jiawu he e tindo zan nado pà mẹhe to nuli i to yé mẹ.​—Luku 22:63, 64.