Biblu dọ dọ e sọgbe bo tlẹ sọ yin nujọnu nado yiwanna mẹdetiti jẹ obá de mẹ. Nado yiwanna dewe nọ biọ dọ a ni nọ penukundo dewe go, nọ na sisi dewe bo nọ mọdọ a họakuẹ. (Matiu 10:31) Biblu ma nọgodona mẹdezizedaga, kakatimọ e dohia dọ wanyina mẹdetiti dona nọ otẹn he jẹna ẹn mẹ.

Mẹnu whẹ́ wẹ mí dona yiwanna?

1.   Wanyina Jiwheyẹwhe wẹ dona to otẹn tintan mẹ na mí. Biblu plọnmẹ dọ gbedide he klohugan lọ wẹ: “Hiẹ dona yí ahun towe lẹpo . . . do yiwanna Jehovah Jiwheyẹwhe towe.”​—Malku 12:28-30; Deutelonomi 6:5.

2.   Gbedide awetọ he klohugan lọ wẹ: “Hiẹ dona yiwanna kọmẹnu towe di dewe.”​—Malku 12:31; Levitiku 19:18.

3.   Nugbo wẹ dọ Biblu ma na gbedide de tlọlọ gando wanyina mẹdetiti go, amọ́ gbedide lọ nado “yiwanna kọmẹnu towe di dewe” dohia dọ e sọgbe bosọ yọ́n jẹ obá de mẹ nado yiwanna dewe bo nọ na sisi dewe.

Mẹnu whẹ́ wẹ Jesu yiwanna?

 Jesu do lehe yè gán nọ jlẹkaji to wanyina Jiwheyẹwhe, wanyina kọmẹnu po wanyina mẹdetiti po mẹ do hia bosọ plọn devi etọn lẹ nado nọ hodo apajlẹ etọn.​—Johanu 13:34, 35.

1.   Jehovah Jiwheyẹwhe whẹ́ wẹ e yiwanna bosọ ze ede jo nado wà azọ́n Etọn. E dọmọ: “Na aihọn nido yọnẹn dọ yẹn yiwanna Otọ́, dile Otọ́ ko degbena mi do, mọkẹdẹ wẹ yẹn to wiwà do.”​—Johanu 14:31.

2.   Jesu yiwanna kọmẹnu etọn lẹ, podọ ehe wẹ zọ́n bọ e nọ gọalọna mẹdevo lẹ bo tlẹ ze ogbẹ̀ ede tọn jo do ota yetọn mẹ.​—Matiu 20:28.

3.   E yiwanna ede jẹ obá de mẹ, bọ ehe wutu wẹ e do nọ dín whenu nado gbọjẹ, dùnú bo nọ jaya dopọ hẹ họntọn lẹ po mẹhe na wá lẹzun devi lẹ po.​—Malku 6:31, 32; Luku 5:29; Johanu 2:1, 2; 12:2.

Be wanyina mẹdevo lẹ whẹ́ na de ayajẹ kavi sisi mẹdetiti tọn mítọn pò wẹ a?

 Lala, na mí yin didá to apajlẹ Jiwheyẹwhe tọn mẹ wutu, mẹhe jẹhẹnu tangan etọn wẹ owanyi matin ṣejannabi. (Jenẹsisi 1:27; 1 Johanu 4:8) Ehe dohia dọ mí yin didá po nugopipe lọ po nado yiwanna mẹdevo lẹ. Nugbo wẹ dọ mí dona yiwanna míde, amọ́ mí nọ do ayajẹ hugan eyin mí yiwanna Jiwheyẹwhe whẹ́ bo nọ ze ayiha do dagbe wiwà na mẹdevo lẹ ji. Dile Biblu dọ do, “ayajẹ sù to nunamẹ mẹ hú to mimọyi mẹ.”​—Owalọ lẹ 20:35.

 To egbehe, mẹsusu nọ dọ dọ wanyina mẹdetiti hú mẹdevo lẹ wẹ nọ hẹn ayajẹ wá. Na yewlẹ, “wanyina mẹdetiti” ko diọtẹnna “wanyina kọmẹnu.” Amọ́, nuhe to jijọ to egbehe lẹ dohia dọ mẹhe nọ do agbasalilo po ayajẹ po hugan lẹ wẹ mẹhe nọ hodo ayinamẹ nuyọnẹn tọn Biblu tọn lọ, he dọ: “Mì gbọ mẹdopodopo ni nọ dín, e ma yin ale edetiti tọn gba, ṣigba dehe yin mẹdevo tọn.”​—1 Kọlintinu lẹ 10:24.