Dile owhe lẹ to yìyì, owanyi he asu po asi po delẹ tindo na ode awetọ nọ jẹ didepo ji. Eyin mọ wẹ e te to alọwle towe mẹ, be a dona hanú wẹ ya?

•  Nuhe a dona yọnẹn

•  Nuhe a sọgan wà

 Owanyi yin dandannu nado hẹn alọwle de lodo. Kẹdẹdile núdùdù po osin nùnù sọn ojlẹ de mẹ jẹ devo mẹ po yin dandannu nado tindo huhlọn bo hẹn agbasalilo dagbe de go do, mọ wẹ owanyi didohia whẹwhẹ nọ na huhlọn alọwle de bo nọ hẹn ẹn lodo do. Etlẹ yin owhe susu to alọwle godo, asu po asi po lẹ gbẹ́ nọ tindo nuhudo jidenamẹ tọn whẹwhẹ dọ alọwlemẹ yetọn yiwanna yé bo nọ hò yetọn pọ́n.

 Owanyi nugbo ma nọ yin ṣejannabinọ. E nọ dín ayajẹ omẹ awetọ tọn. Enẹwutu, kakati nado nọ do owanyi hia to whenue e jlomẹ nado wàmọ poun, alọwlemẹ mẹtọnhopọntọ de nọ doayi e go eyin awetọ etọn tindo nuhudo owanyi tọn bo nọ dovivẹnu nado súdo nuhudo enẹ tọn.

 To paa mẹ, asi lẹ nọ tindo nuhudo dohia owanyi tọn hú asu lẹ. Asu de sọgan yiwanna asi etọn taun. Amọ́, eyin afọnnu kavi whèjai azán dopodopo tọn kavi jẹnukọnna kọndopọ zanhẹmẹ tọn kẹdẹ wẹ e nọ do owanyi enẹ hia te, e sọgan nọ vẹawuna asi etọn nado mọdọ e yiwanna emi nugbonugbo. E na yọ́n hugan dọ asu de ni nọ do owanyi hia asi etọn to azán dopodopo gblamẹ.

 Nọ do owanyi hia to hodidọ mẹ. Hogbe kleun delẹ taidi “N’yiwanna we” kavi “A họakuẹ to nukun ṣie mẹ” gán hẹn alọwlemẹ towe nado mọdọ a nọ wlebòna emi.

 Nunọwhinnusẹ́n Biblu tọn: “Sọn susugege nuhe tin to ahun mẹ lẹ tọn mẹ wẹ onù nọ dọtọ́n.”—Matiu 12:34.

 Ayinamẹ: Ma nọ do owanyi towe hia to hodidọ kẹdẹ mẹ blo. Nọ basi kandai etọn na alọwlemẹ towe do owe pẹvi de ji kavi gbọn wekanhlanmẹ alokan ji tọn gblamẹ.

 Nọ do owanyi hia to nuyiwa mẹ. Mẹgbigbòfán, nùdonùgo kavi alọ ode awetọ tọn go hinhẹn poun sọgan dohia dọ hójọhó dọ wẹ a te to whenue a dọ “N’yiwanna we.” Mẹtọnhopọn nujọnu tọn sọ sọgan yin didohia gbọn alọsadomẹgo, nukun yìnpọ́n ode awetọ, kavi nunina de bibasi sọn ojlẹ de mẹ jẹ devo mẹ dali. Eyin asu de wẹ a yin, naegbọn a ma na gọalọna asi towe to nudelẹ wiwà mẹ—vlavo nado hẹn agbàn hẹ ẹ, hùnhọ̀n na ẹn, klọ́ panu, yàn avọ̀ kavi dà núdùdù? Na mẹsusu, onú enẹlẹ wiwà ma yin alọgọnamẹ poun—kakatimọ owanyi didohia to nuyiwa mẹ wẹ!

 Nunọwhinnusẹ́n Biblu tọn: “Mí ma dona nọ yiwannamẹ, to ohó mẹ kavi po odẹ́ po kẹdẹ gba, ṣigba to walọ . . . mẹ.”—1 Johanu 3:18.

 Ayinamẹ: Nọ yinuwa hẹ alọwlemẹ towe po mẹtọnhopọn po dile a nọ wà do to whenue mì to họntọn mẹ.

 Mì nọ yí whenu zan hẹ ode awetọ. Whenu dide dovo nado nọpọ́ hẹ ode awetọ na hẹn alọwle mìtọn lodo bo na dohia alọwlemẹ towe dọ e nọ vivi na we nado nọpọ́ hẹ ẹ. Na nugbo tọn, e gán vẹawu nado mọ whenu pọninọ hẹ ode awetọ tọn eyin mì tindo ovi lẹ kavi eyin mì tindo azọ́n susu nado wà egbesọegbesọ. Vlavo mì sọgan de nado nọ wà onú kleun delẹ dopọ taidi nado nọ zinzọnlin dopọ—yèdọ mì omẹ awe lẹ kẹdẹ.

 Nunọwhinnusẹ́n Biblu tọn: “Mì ... mọdona nuhe yin nujọnu hugan lẹ.”—Filipinu lẹ 1:10.

 Ayinamẹ: Asu po asi po he alọnu yetọn tlẹ ján lẹ nọ de whenu dovo whẹwhẹ nado disa tọ́n to whèjai lẹ kavi to sẹfifo lẹ nado nọpọ́ hẹ ode awetọ.

 Yọ́n alọwlemẹ towe. Nuhudo dohia owanyi tọn he mẹdopodopo tindo nọ gbọnvo. Mì dọhodopọ gando lehe dopodopo mìtọn jlo dọ owanyi ni nọ yin didohia emi do go bo pọ́n eyin nuhudo etọn tin dogọ. Enẹgodo, dovivẹnu nado súdo nuhudo enẹ tọn na alọwlemẹ towe. Flindọ, owanyi didohia yin dandannu nado hẹn alọwle de lodo.

 Nunọwhinnusẹ́n Biblu tọn: “Owanyi . . . ma nọ dín ale edetiti tọn lẹ.”—1 Kọlintinu lẹ 13:4, 5.

 Ayinamẹ: Kakati nado nọ biọ to alọwlemẹ towe si dọ ni do owanyi hia emi, kanse dewe dọ, ‘Etẹwẹ n’sọgan wà nado whàn alọwlemẹ ṣie nado nọ do owanyi hia mi dogọ?’