U Tienu diema tie yaa bali n ye tanpoli. O ba bolini a diekpiama kuli, ki cedi U Tienu yanbuama n tieni tanpoli leni ki tinga po. Lanwani tie labaaliŋamu. Ne leni ne waamu bi ninsaaliba ba ti ba yaa diema ke bi bua. Laa yogunu ŋanduna kuli niba ba dagidi leni bi yaba.—Cogi mani Danieli 2:44; Matiyu 6:9, 10; 24:14.

Diema kuli pia o bado. Jeova gandi o biga Jesu Kilisiti ke o tie o diema yaa bado.—Cogi mani Mi Doagidima 11:15.

Li ŋani Jesu n tua ti bado kelima o den bua bi niba. O go den bua mi teginma. (Jan 1:14) O paalu yaba ke o ba fidi todi Adama bila, kelima o baa kali tanpoli ki diedi ki tinga po. Jesu n den faadi yeni puoli, o go goani tanpoli ki kali Jeova jienu po. O den guudi yaa yogunu ke o ba ti dini o li bali. (Ebilunba 10:12, 13) Laa yogunu n pundi yeni, U Tienu den cedi ke o cili o diema diedima.—Cogi mani Danieli 7:13, 14.

U Tienu gandi bi niba ke bani n baa taani leni Jesu ki diedi tanpoli. Bi yi ba ke “U Tienu niba.” O den cili ki gandi Jesu ŋoadikaaba yaaba n tuo O yeni. Jeova baa gandi puoba leni jaba, yaaba n tiendi o yanbuama, ke bani moko ba ti taani ki diedi leni ba. Nani Jesu, bi kuuma puoli, U Tienu baa faadi-ba, ban tua malekinba tanpoli.—Cogi mani Jan 14:1-3; Kolinta Yaaba Tikpiali 15:42-44.

 Niba ŋa n ba gedi tanpoli? Jesu den yi-ba: “ya yankulu n ki yaba.” Li bua yedi ke bi naa yabi ba. (Luka 12:32) Bi tie niba 144000. Bi ba taani leni Jesu ki diedi ki tinga.—Cogi mani Mi Doagidima 14:1.

U Tienu diema bali kali 1914 * binla. Jesu n ga o diema, o cicili tuonli den tie wan deli Sutaani leni o cenda ki jiini ba ki tinga po. Sutaani pali beni hali ke o cuani falaciamu i kaani kuli. (Mi Doagidima 12:7-10) Hali laa yogunu fala yeni li pugide. Bu tuobu, mi koma, i yiani leni mi tindigibima tie yaa senankeeni n waani, ke ne leni waamu U Tienu diema ba gbeni ŋanduna yeni paka cain.—Cogi mani Luka 21:7, 10, 11, 31.

Dinli-dinla bi kpaani labaali ŋanduna kuli nni. Leni laa todima ke U Tienu diema taagi yaa nilugu n yaba, yaaba n ñani i nibuoli kuli nni. Yaa niba n yaba ki tie yumiindanba n tuo ki tua o diema niba, ke Jesu tie bi bado. Lanwani yua n bua ki ba U Tienu diema n ba ti cuani yaa ñoadi yeni, li tie tiladi wan tuo Jesu.—Cogi mani Mi Doagidima 7:9, 14, 16, 17.

Mi diema ba diedi bina 1000. O ba cedi ke U Tienu cicili yanbuama bi ninsaaliba po n tieni. Ki tinga kuli ba tua ŋalijani. Lankuli yaa gbeni, Jesu ba guani o Ba mi diema kuli. (Kolinta Yaaba Tikpiali 15:24-26) Yi moko ba fidi ki togidi nitoba yin bandi yaala U Tienu diema po.—Cogi mani Matiyu 5:5.