U Tienu n tie u labaaliŋamu daano. O tie yaa tienu n pia li pamanli, o bua u diegu yaaba moko n yaa pia li pamanli. (Timoti Tikpiali 1:11) Wani n tie li ñiigili tagido. Ti yaa bua li pamanli, li tie tiladi tin tieni li ñiigili lani n ŋoadi li bali maama. Lani n ba cedi ti diegu niba n yaa pia mi yanduanma. Yaaba n bua n tuo U Tienu, li tie tiladi ban ŋoadi bi dogu balimaama n tiendi li ñiigili maanma.—Cogi mani Luka 2:1, 4, 5.

U Tienu nua li ñiigili lede? O waani ke pua leni ja bebe n ba fidi ki tieni li ñiigili. Bi ba kali leni bi yaba bi miali banlu kuli. Jeova bua pua leni ja n yaa tie nidugikaaba leni bi yaba. (Ebulinba 13:4) O nani li poñanli. (Malaki 2:16) Kilisiti nilo, ke li tie o pua, bi o ja yaa conbi, U Tienu waani ke o ba fidi cie li ñiigili, ki ñiigi leni nitoa.—Cogi mani Matiyu 19:3-6, 9.

Jeova tagi pua leni ja ke bi yaa tieni li ñiigili, ban yaa kubi ki go ŋanbidi bi yaba. (Mi Cilima 2:18) U Tienu n bua o ja n yaa tie u diegu yudaano yeni, o ba moandi o diegu yaaba n ba yaala n tie tiladi bipo. Wani n yen gaa liiga ki todi-ba ban tuo U Tienu. Li go ŋani wan ŋanbi ki bua o pua. Pua leni ja ba bua bi yaba ki go fangi bi yaba. Nisaalo kuli n yen tudi yapo, tin yaa puuni ti yaba sugili, li ñiigili n yaa pia li pamanli.—Cogi mani Efesa Yaaba 4:31, 32; 5:22-25, 33; Pieli Tikpiali 3:7.

Yi yaa pia a paka yi ñiigili nni, yua kuli n moandi ki puguni mi ŋanma, ki kubi o lielo wan bandi ke o bua o. (Kolinta  Yaaba Tikpiali 13:3, 5) Bibili naa waani ke yi yaa bua yi paka n gbeni li ñiigili nni, yin ŋa yi yaba ba.—Cogi mani Kolinta Yaaba Tikpiali 7:10-13.

Jeova bua yin yaa pia li pamanli. O tundi-yi, ki ba todi-yi yi yema n yaa mani. O bua yin tuo ki yaa ŋoa yi danba maama ke bi yama leni bi bangima n yaa pia yipo ti ñoadi. (Kolosa Yaaba 3:20) Jeova yi tagido bua yin tieni o yambuana, yin tuo o bijua ki ba li pamanli.—Cogi mani O Yanfuodaano 11:9–12:1; Matiyu 19:13-15; 21:15, 16.

Yi ba soani ki kubi yi bila, ban ba mi jiema, u duanu kaanu leni ti tiadi. (Timoti Tikpiali 5:8) Yi yaa bua yi bila n yaa pia li pamanli, se yin todi-ba ban bandi U Tienu, ki go bua o ŋanma. (Efesa Yaaba 6:4) Yi bila ya nua ke yinba yiba bua U Tienu, li ba fidi ki todi-ba bani moko n yaa bua o. Yi yanjaga yaa ña U Tienu maama nni, li ba todi ba, ban ta yaa sanu n ŋani.—Cogi mani Mi Tiadima 6:4-7; Mi Kpanjama 22:6.

Yi yaa paagidi yi bila pala ki go selegidi ba, li ba todi-ba. Li tie tiladi yin tundi-ba. Lani n ba todi-ba bani n gobidi bi yula leni yaa tuonli n ba biidi bi yema. (Mi Kpanjama 22:16) Yin da tundi yi bila leni li pabienli ba.—Cogi mani Kolosa Yaaba 3:21.

Jeova siedinba diani a tila bi bidanba leni bi bila todima po. Laa tila yanjaga ñani Bibili nni.—Cogi mani Pisoma 19:8, 12.