Ang 2019 amo ang may pinakamainit nga tingadlaw nga narekord sa Australia gani padayon nga nagadamo ang mga lugar nga apektado sang sunog sang mga hilamon kag kakahuyan sa sini nga pungsod. Sugod sang Septiembre 2019, may dalagku nga mga sunog nga natabo sa kada estado sa Australia. Bisan nagasugod pa lang ang panahon nga madamo sing sunog, madamo na nga sunog ang natabo. Ang pinakagrabe nga naapektuhan amo ang mga baybayon kag bagatnan-nasidlangan nga mga rehiyon, ang Victoria kag New South Wales.

Wala sing nareport nga napatay ukon nasamaran sa aton mga kauturan, pero madamo sang mga balay kag bilding ang nalab-ot sang sunog, lakip ang siam ka balay nga naupos gid sang kalayo. Subong, sobra 700 ka kauturan ang nagbakwit. Madamo ang Saksi nga pamilya nga nagbiya sa apektado nga mga lugar bangod sa grabe nga aso, nga suno sa pila ka eksperto, delikado gid sa panglawas. Ang kalabanan sa ila nagdayon anay sa ila pamilya, mga abyan, ukon mga kauturan sa kaingod nga mga kongregasyon nga wala naapektuhan sang sunog.

Ang branch sa Australasia nagporma na sang duha ka Disaster Relief Committee para maghatag sang espirituwal kag materyal nga bulig. Duha ka manugtatap sang sirkito kag mga miembro sang Komite sang Sanga ang naga-shepherding kag nagapalig-on sa aton mga kauturan nga naapektuhan. Bisan kapoy na kag naluyahan sing buot ang kalabanan sang mga kauturan nga naapektuhan sang sunog, madamo sa ila ang nagapasalamat gid sa matuod nga Cristianong gugma nga padayon nga ginapakita sang aton mga kauturan.—1 Pedro 2:17.