Ang tanan nga judge sang European Court of Human Rights (ECHR) nagdesisyon nga may diskriminasyon ang gobierno sang Belgium kontra sa mga Saksi ni Jehova sang gin-cancel sini ang property tax exemption sang siam ka kongregasyon sa Brussels-Capital Region. Ini nga desisyon sa kaso nga Christian Assembly of Jehovah’s Witnesses and Others v. Belgium, ginpagua sang Abril 5, 2022. Makapabakod ini sang aton kahilwayan sa pagsimba indi lamang sa Belgium kundi sa iban pa nga mga pungsod sa Europe.

Ang tanan nga relihion sa Brussels-Capital Region exempted nga magbayad sing buhis para sa ila mga tilipunan sang pagsimba asta sang 2018. Sina nga tuig, ginbag-o sang rehiyon ang kasuguan sini parte sa buhis kag nagdesisyon ini nga anom lang ka “ginakilala nga relihion” ang exempted. Bangod sining bag-o nga kasuguan, ang mga Saksi ni Jehova dapat magbayad sing tuman kadaku nga buhis para sa ila mga Kingdom Hall sa Brussels, nga naglab-ot sa 45,000 euros ($49,025 U.S.) kada tuig.

Ang ECHR nagdesisyon nga ang paghatag sing exemption sa anom lamang ka “ginakilala nga relihion” sang Estado, nagapakita nga may diskriminasyon batok sa mga Saksi ni Jehova ang Brussels-Capital Region kag ginlapas sini ang European Convention on Human Rights.

Sa sini nga desisyon, nagsiling man ang ECHR nga indi matuod ang ginasiling sang gobierno sang Belgium nga puede maka-apply ang mga Saksi ni Jehova para kilalahon sila sang Estado. Kay suno sa ECHR, sa Belgium, ang Minister of Justice lang ang makahimo sang una nga tikang para kilalahon sang Estado ang isa ka relihion. Kag ang desisyon para aprobahan ini nagadepende sa gobierno.

Sa opisyal nga desisyon sini, ang ECHR nagsiling nga ang proseso sa Belgium para kilalahon sang Estado ang isa ka relihion wala pa sing insakto nga basihan. Nagdugang pa ini nga indi mapaabot sang gobierno nga ma-apply ang mga relihion para kilalahon sila kag hatagan sing exemption nga indi magbayad sing buhis, kay wala man sing garantiya nga himuon ini nga proseso sa patas nga paagi. Gani, ginmanduan sang Korte ang Belgium nga mangin “neutral kag wala sing pinilian” sa tanan nga relihion pareho sa mga Saksi ni Jehova.

Maathag sa sini nga desisyon sang ECHR nga ang mga awtoridad sang Estado wala sing kinamatarong nga magsiling kon bala ang isa ka relihion matuod ukon kon paano himuon sang mga tawo ang ila pagsimba. Ini nga desisyon makabulig man para indi maghimo ang iban nga mga pungsod sa Europe sing mga kasuguan parte sa buhis nga posible magresulta sa diskriminasyon sa aton organisasyon.

Ginapasalamatan naton si Jehova sa tanan nga kaso nga nadag-an naton kay makabulig gid ini sa aton nga matuman ang aton handum nga himayaon ang iya ngalan.—Bugna 15:4.