Halin sang Marso 1 asta Hunyo 30, 2024, sobra 1,000 ka Saksi ni Jehova ang nagpartisipar sa maid-id nga preaching campaign sa bilog nga Brazil. Gin-organisar ang campaign wala madugay nga gin-release ang publikasyon nga Magkabuhi sing Wala Katapusan! sa 11 ka lenguahe nga ginahambal sa pungsod. Bilang resulta, halos 300 ka tawo ang nangabay sang Bible study.

May isa ka babayi nga nagahambal sing Xavante nga taga-Campinápolis, nga namangkot sa mga utod: “Kamo ’ni ang nagahimo sang mga video sa akon lenguahe? Dugay ta na kamo nga ginapangita. Maayo kay nakita ko na gid kamo subong!” Siling niya nagatuon sia sang una sa Biblia upod sa mga Saksi ni Jehova pero nag-untat sia kay indi sia kaintiendi sang Portuguese. Pero sang nabal-an niya nga may mga publikasyon na kag mga video nga base sa Biblia sa Xavante, ginpangita niya ang mga Saksi. Nagpadayon sia sa pag-Bible study.

Sa Santa Maria de Jetibá, tatlo ka beses nga naistorya sing malawig sang isa ka sister ang interesado nga babayi nga nagahambal sing Pomeranian. Sa ikatlo nila nga pag-istoryahanay, nanugid ang babayi nga isa ka adlaw antes sang una nila nga pag-istoryahanay nangamuyo sia sa Dios nga tudluan sia kon paano niya simbahon ang Dios sa insakto nga paagi. Nalipay gid sia nga magpa-Bible study.

Sa isa ka gamay nga baryo sa southern Brazil, naistorya sang aton kauturan ang isa ka babayi nga nagahambal sing Kaingang nga wala pa gid nakaistorya sang una sa mga Saksi ni Jehova. Ginbasa nila sa iya ang Salmo 83:18 kag ginpaathag nga Jehova ang ngalan sang Dios. Nalipay gid sia kag nagsiling nga wala pa gid sang may nakasugid sa iya nga ang Dios may ngalan. Nagpa-Bible study sia dayon.

Nalipay gid kita upod sa aton kauturan sa Brazil kay madamo ang nagatuon parte sa “wala sing katapusan nga maayong balita” nga makita sa Pulong sang Dios. Makabulig ini para mahimaya man nila si Jehova.—Bugna 14:6, 7.