Ang mabaskog nga pag-ulan sa mga bulan sang Septiembre kag Oktubre 2020 nagresulta sa grabe nga pagbaha sa madamo nga lugar sa Nigeria. Madamo nga uma kag mga propiedad ang nahalitan kag makapasubo nga isa naton ka brother ang napatay bangod sini nga kalamidad. Dugang pa, sobra sa 1,828 ka manugbantala ang nagbakwit kag indi magnubo sa 62 ka balay sang aton mga kauturan ang nahalitan.

Ang branch sa Nigeria nag-asayn na sang pito ka Disaster Relief Committee para magdumala sa pagbulig samtang padayon nga ginasunod ang mga pagsulundan bangod sa COVID-19 nga pandemic. Ang mga manugtatap sang sirkito kag ang mga gulang nagabuligay na para maamanan ang aton mga kauturan sang ila mga kinahanglanon kag mapaumpawan sila paagi sa Biblia.

Ginakasubo naton nga may mga napatay bangod sini nga kalamidad. Kabalo kita nga si Jehova, ang Dios sang aton kaluwasan, padayon nga magapaumpaw kag magabulig sa aton mga kauturan sa sining mabudlay nga mga tion.—Salmo 68:19.