Si Brother Kegawale Biyama, nga miembro sang Komite sang Sanga sa Papua New Guinea, amo ang nagpagua sang Bag-ong Kalibutan nga Badbad sang Balaan nga Kasulatan sa Hiri Motu nga lenguahe. Ang programa ginrekord sa branch office sang mga Saksi ni Jehova sa Port Moresby kag gin-stream ini sa sobra sa 7,000 ka tumalambong sang Nobiembre 28, 2020.

Ang Papua New Guinea amo ang may pinakamadamo nga lenguahe sa kalibutan, kay mga 840 ka lenguahe ang ginahambal sa sini nga pungsod. Ang Hiri Motu isa sa tatlo ka opisyal nga lenguahe sang pungsod kag ginahambal sang mga 140,000 ka tawo.

Si Brother Kukuna Jack, nga miembro sang Komite sang Sanga, nagsiling: “Ini nga Biblia, madugay na nga ginahulat sang mga tawo nga nagahambal sang Hiri Motu. Bal-an namon nga manamian gid sila sa Bag-ong Kalibutan nga Badbad bangod simple lang ini kag mahapos intiendihon.”

Isa ka team sang anom ka translator ang nagpangabudlay sa sini nga proyekto sa sulod sang pulo ka tuig. Ang isa ka translator nagsiling: “Sigurado nga malipay gid ang mga bumalasa kay makita na nila ang ngalan sang Dios sa Biblia, halin sa Genesis asta sa Bugna. Nagapasalamat gid kami kay Jehova sa sining regalo nga Biblia!”

Samtang ginahunahuna naton ang tanan nga panikasog para mahimo ining bag-o nga translation, nabatyagan naton ang pareho kay propeta Isaias sang nagsiling sia: “O Jehova, hatagan mo kami sing paghidait, bangod ang tanan nga nahimo namon ginhimo mo para sa amon.”—Isaias 26:12.