Ang Septiembre 28, 2021, amo ang ika-75 nga anibersaryo sugod sang ginhiwat sang mga Saksi ni Jehova ang una nga national convention sa Romania. Gin-organisar ini sang bag-o lang gid matapos ang ikaduha nga world war kag sa sini nga tion grabe man ang paghingabot. Gintinguhaan gid sang mga manugpamatok nga indi madayon ini nga kombension, pero nadayon gid ini kag na-enjoy sang mga kauturan.

Ang kombension ginhiwat sang Septiembre 28 kag 29, 1946, sa Roman Arenas sa Bucharest. May gin-arkilahan nga tren para sakyan sang mga delegado pakadto sa kombension. Pero, ginpadihutan sang isa ka kilala nga pari sang Orthodox nga magdulog sing madamo nga beses ang tren bisan wala sa iskedyul, para maatrasar ang pag-abot sini.

Sang Biernes, isa ka adlaw antes sang kombension, ang mga kauturan nga ara na sa siudad nga hiwatan sang kombension naghulat sa estasyon sang alas 9:00 sang aga. Mga alas 10:00 sang aga ang iskedyul nga maabot ang tren. Pero bisan pa naatrasar ang tren, naghulat gid ang mga kauturan asta nga nag-abot ini sang alas 6:00 na sang hapon.

Bangod sa inaway, linibo ka balay ang naguba amo nga diutay lang ang mga dalayunan. Halimbawa, sa isa ka lugar, nagbakal ang mga brother sang uhot kag ginlapta ini sa ugsaran sang isa ka brother nga ang balay malapit lang sa hiwatan sang kombension para may matulugan ang mga kauturan. Kanami sang tiempo sadto kag kitaon ang mga bituon, gani madamo nga pamilya ang nakatulog sing maayo sa gua.

Mga 3,400 ang nagtambong sa programa sang Sabado sang aga. Ginpahibalo nga Ang Lalantawan balhagon liwat sa Romanian kag Hungarian nga mga lenguahe. Sa kombension ginpanagtag ang mga 1,000 ka kopya sang una nga edisyon sina nga magasin sa mga tumalambong. Sa nagsunod nga mga isyu sina nga magasin, ginbutang ang tulun-an nga mga artikulo nga wala matun-an sang mga kauturan sang tion sang inaway, para makabenepisyo man sila sa sini.

Sang Domingo, naglab-ot sa mga 15,000 ang nagtambong sa pamulongpulong publiko. Nagtambong man ang mga opisyal sang gobierno sa Romania, mga pulis, kag ang mga pari sang Orthodox nga nakasutana pa. May nakasugid sa mga brother nga may ginsugo ang mga pari nga magbutang sang mga dram nga may gasolina malapit sa lugar sang kombension. Gusto sang mga pari nga palukpon ini sa tion sang kombension. Pero sa bulig sang mga pulis, wala nadayon ini nga plano.

Sa tion sang programa, gusto sang isa sa mga pari nga magsaka sa stage, pero ginbalabagan sia sang mga brother. Ang isa ka brother nagsiling sa pari: “Indi na kinahanglan nga magpamulongpulong sa sini nga pagtinipon ang isa ka pari sang Orthodox, pero kon gusto mo, puede ka magpungko kag magpamati.” Maayo lang kay wala na nagpanggamo liwat ang pari. Sang ulihi, gindayaw sang attorney general sang Romania ang mga kauturan bangod naorganisar sing maayo ang kombension.

Bisan pa sang paghingabot, wala gid nahadlok ang aton mga kauturan, siling ni Brother Vasile Sabadâş, nga nakatambong sa kombension kag 96 anyos na subong. “Wala gid ako sang madumduman nga ginhadlukan kami,” siling niya. “Indi namon ini problema, kay anad ang mga kauturan sa paghingabot. Gani wala gid sila sing nabatyagan bisan diutay lang nga kahadlok.”

Nagsiling pa gid si Vasile nga mas nagbakod ang paghiusa sang katawhan ni Jehova sa Romania bangod sang kombension. Madamo ang nag-Bible study kag nabawtismuhan sang tion sang inaway. Bangod bag-uhan pa lang sa kamatuoran, indi palareho ang opinyon sang iban parte sa inaway. Pero si Vasile nagsiling nga pagkatapos sang kombension, “ang mga kauturan nahiusa kag nagakasadya.” Nagsiling pa gid sia: “Gusto ko nga indi matapos ang kombension. Kabudlay magbabay sa mga kauturan.”

Subong, ang aton mga kauturan sa Romania wala na ginahingabot. Sang 2020, may sobra 39,000 ka aktibo nga Saksi ni Jehova sa pungsod, kag sang 2021, sobra 100,000 ka tawo ang nagtambong sa Memoryal sang kamatayon sang Cristo. Amo ini ang pinakamataas nga rekord sa kasaysayan sang pag-alagad sa Romania.

Dalayawon gid ang panikasog sang aton mga kauturan sa Romania para malampuwasan nila ang tanan nga kabudlayan sa ila pagtipon para magsimba. Ginapasalamatan naton si Jehova sa iya pag-amlig kag pagpakamaayo sa iya katawhan sining pinasahi kag indi malipatan nga okasyon.—Hebreo 10:24, 25.