Samtang nagagrabe ang inaway sa Donetsk Region sa Ukraine, si Brother Mykola Bozhedomov pila ka beses nga nagbalikbalik sa Kramatorsk para buligan ang mga tawo nga makapalagyo sa amo nga lugar.

Pero sang Abril 8, 2022, napatay si Mykola sang ginbombahan ang estasyon sang tren sa Kramatorsk, Donetsk Region.

Luwas kay Mykola, nga 58 anyos, may isa pa ka sister nga nalakip sa sobra 50 nga napatay. Kag isa ka brother ang nalakip sa sobra 100 nga nasamaran. Ang aton mga kauturan nga wala maano sa sini nga pagpamomba nagreport nga nabatian nila ang duha ka mabaskog katama nga pagsigabong kag naglinupad dayon ang mga shrapnel.

Si Mykola kag si Nina, 32 ka tuig na nga mag-asawa. Si Nina nagsiling: “Ginauna pirme sang akon bana ang kaayuhan sang iban. Gusto gid niya buligan ang mga tigulang kag nagamasakit nga mga kauturan. Pero kada magbiyahe sia sa Kramatorsk, mas nagadelikado na gid ang sitwasyon. Amo na ato tani ang iya katapusan nga pagbiyahe.”

Dungan sila nga nabawtismuhan nga mag-asawa sang 1997. Nag-alagad si Mykola bilang matutom nga elder sa sulod sang madamo nga tinuig. Ginpakita gid sang mga kauturan kay Nina ang ila pagpalangga kag suporta. Sia nagsiling, “Ang ila pagpalig-on nakabulig sa akon sa sining mabudlay nga tion.”

Nagsiling man si Nina nga napalig-on sia sang Kasulatan, ilabi na sang Isaias 40:28-31. “Ginabuligan ako ni Jehova nga maulian sing kusog,” siling ni Nina. “Mabatyagan ko gid ang gugma ni Jehova. Sadto mabasa ko lang ina nga gugma sa aton mga publikasyon, pero subong mabatyagan ko na ini.”

Ginapangamuyo naton si Nina kag ang tanan nga napatyan sang ila mga pinalangga bangod sa inaway. Nahibaluan naton nga padayon sila nga sakdagon ni Jehova.—Salmo 20:2.