Nasubuan kami sa pagreport nga ang duha naton ka sister napatay sa pagpamomba sa siudad sang Mariupol. Subong, masobra 2,000 pa naton ka kauturan ang indi makapalagyo halin sa siudad bangod sang grabe gid nga inaway. Sang nagligad nga pila ka adlaw, mga 150 ka Saksi ang nakapalagyo. Gintinguhaan sang mga utod sa Disaster Relief Committee (DRC) nga magdala sing mga suplay sa Mariupol pero nagbalik sila kag ang iban pa nga humanitarian aid convoy kay gin-atake sila. Isa ka bomba ang naglupok sa isa ka propiedad nga may Kingdom Hall kag Assembly Hall. Mga 200 ka kauturan ang nagapanago sa basement sang Kingdom Hall sina nga tion. Wala man maano ang mga kauturan pero nawasak gid ang ila mga salakyan amo nga mas mabudlayan na gid sila nga makapalagyo.

Ang isa ka elder (may piktyur sa ubos) nga nakapalagyo halin sa Mariupol upod sa iya pamilya nagsiling: “Ginbiyaan namon ang amon apartment, obra, kag indi na kami makakontak sa amon mga abyan. Ang amon pagpalagyo, nga kon normal ang kahimtangan isa lang ka adlaw, naglawig sing anom ka adlaw. Samtang nagadrayb kami [pa gua sa siudad], nakita pa namon ang mga aso sang wala maglupok nga mga bomba sa dalan. Sa amon ginaagyan, ginbuligan kami sang mga kauturan nga makakita sang mga dalayunan kag pagkaon. Nabatyagan gid namon ang pag-ulikid ni Jehova sa amon bilang isa ka Amay . . . Bangod sini, nagasalig gid kami sing bug-os kay Jehova.”

Ang Saksi nga mga refugee halin sa Ukraine nagpalagyo sa pila ka pungsod sa Europa. Halimbawa, ang isa ka ministeryal nga alagad, upod sa iya asawa, kag tatlo ka kabataan nga nagapangidaron sing 7, 11, kag 16 nagkadto sa Portugal kay may mga paryente sila didto nga mga Saksi ni Jehova. Pagkatapos sang 11 ka oras nga paghulat para makatabok sa border, naglakbay ang pamilya sing masobra 4,000 ka kilometro sa sulod sang apat ka adlaw pakadto sa balay sang ila mga paryente. Nag-abot sila sang manugsugod na ang miting sang kongregasyon. Bisan pa nga indi sila kabalo sang Portuguese, regular nga nagasimba ang pamilya kay Jehova kag nagtambong sila sa miting. Nagdayaw gid ang mga kauturan sa kongregasyon nga ila gintambungan kay makita nila nga malipayon gihapon ang pamilya bisan pa nga mabudlay ang ila sitwasyon.

Ang isa pa ka sister nga nagpalagyo sa Germany upod sa iya pamilya nagsiling: “Ang pagbasa sang Biblia, kag ang paghunahuna sang maayo nga mga butang sa amon kabuhi kag sa aton matahom nga paglaum, nagpabakod kag nagpalig-on gid sa amon. . . . Nabatyagan gid namon ang paggiya kag pagbulig ni Jehova paagi sa aton mga kauturan. Gin-abiabi gid nila kami kag ginbuligan sa Ukraine, sa Hungary, kag subong diri sa Germany!”

Maathag gid nga ginabuligan ni Jehova ang aton pinalangga nga mga kauturan sa Ukraine.—Salmo 145:14.

Ang masunod amo ang report halin sa Ukraine nga natipon asta sang Marso 16, 2022. Ini nga mga numero base sa kompirmado nga mga report sang mga kauturan. Pero mahimo nga indi lang amo sini ang aktual nga report bangod indi pirme makontak ang tanan nga rehiyon sa pungsod:

• 4 ka kauturan ang napatay

• 19 ka kauturan ang nasamaran

• 29,789 ka kauturan ang nagbakwit pakadto sa mas safe nga mga lugar sa pungsod

• 45 ka balay ang nawasak

• 84 ka balay ang may daku nga guba

• 366 ka balay ang may gamay nga guba

• 16 ka Kingdom Hall ang naguba

• 27 ka DRC ang nagapanghikot sa Ukraine

• 20,981 ka kauturan ang direkta nga ginbuligan sang DRC para makakita sang safe nga dalayunan

• 11,973 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod