1 Corinto 11:1-34
11 Iluga ninyo ako, subong nga ginailog ko ang Cristo.+
2 Ginadayaw ko kamo bangod pirme ninyo ako ginadumdom kag ginasunod gid ninyo ang mga tradisyon nga ginliton ko sa inyo.
3 Apang luyag ko nga mahibaluan ninyo nga ang Cristo amo ang ulo sang tagsa ka lalaki;+ ang lalaki amo ang ulo sang babayi;+ ang Dios amo ang ulo sang Cristo.+
4 Ang tagsa ka lalaki nga nagapangamuyo ukon nagapanagna nga may pandong sa ulo nagapakahuya sang iya ulo;
5 apang ang tagsa ka babayi nga nagapangamuyo ukon nagapanagna+ nga wala sing pandong sa ulo nagapakahuya sang iya ulo, kay pareho lang sia sa isa ka babayi nga ginkiskisan ang ulo.
6 Kay kon ang isa ka babayi wala nagapandong, dapat sia magpautod sang buhok; apang kon makahuluya sa isa ka babayi nga magpautod sang buhok ukon magpakiskis sang ulo, dapat sia magpandong.
7 Ang lalaki indi dapat magpandong, kay larawan sia+ kag himaya sang Dios, apang ang babayi himaya sang lalaki.
8 Kay ang lalaki indi halin sa babayi, kundi ang babayi halin sa lalaki.+
9 Kag ang lalaki wala gintuga tungod sa babayi, kundi ang babayi gintuga tungod sa lalaki.+
10 Amo kon ngaa ang babayi dapat may tanda sang pagpasakop sa iya ulo bangod sa mga anghel.+
11 Sa kongregasyon sang Ginuo, kinahanglan sang lalaki ang babayi kag kinahanglan man sang babayi ang lalaki.
12 Kay subong nga ang babayi halin sa lalaki,+ subong man ang lalaki nabun-ag halin sa babayi; apang ang tanan nga butang halin sa Dios.+
13 Kamo ang magpamat-od sini: Nagakaigo bala nga mangamuyo sa Dios ang babayi nga wala sing pandong?
14 Indi bala nga ginatudlo sa inyo sang kinaugali nga kon malaba ang buhok sang isa ka lalaki makahuluya ini sa iya?
15 Apang kon malaba ang buhok sang isa ka babayi, indi bala himaya ini sa iya? Kay ang iya buhok ginhatag sa iya sa baylo sang pandong.
16 Ang iban mahimo nga indi mag-ugyon sa sini, apang amo ini ang aton kinabatasan kag sang kongregasyon sang Dios.
17 Apang samtang ginahatag ko ini nga mga instruksion, wala ko kamo ginadayaw kay ang inyo mga pagtinipon wala nagadala sing kaayuhan kundi sing kalainan.
18 Kay nabalitaan ko nga kon nagatipon kamo sa kongregasyon nagabinahinbahin kamo; kag daw nagapati ako sa sini.
19 Pat-od gid nga may mga sekta sa tunga ninyo,+ apang sa sini nga paagi makilala ang mga tawo nga ginakahamut-an sang Dios.
20 Kon nagatipon kamo, wala kamo sa husto nga kahimtangan sa pagkaon sing Panihapon sang Ginuo.+
21 Kay nakapanihapon na kamo antes kamo magkaon sini, amo nga ang iban gutom apang ang iban naman hubog.
22 Indi bala nga may mga balay kamo nga mahimo ninyo kan-an kag imnan? Ukon ginatamay bala ninyo ang kongregasyon sang Dios kag ginapakahuy-an ang mga wala sing bisan ano? Ano bala ang akon isiling sa inyo? Dayawon ko bala kamo? Tungod sini, indi ko kamo pagdayawon.
23 Kay ang nabaton ko sa Ginuo ginatudlo ko man sa inyo, nga sang gab-i nga ginluiban si Ginuong Jesus,+ nagkuha sia sang tinapay
24 kag nagpasalamat. Dayon gintipiktipik niya ini kag nagsiling: “Ini nagakahulugan sang akon lawas+ nga ginahatag para sa inyo. Padayon ninyo nga himua ini sa pagdumdom sa akon.”+
25 Amo man ang ginhimo niya sa kopa,+ pagkatapos nila panihapon, nga nagasiling: “Ini nga kopa nagakahulugan sang bag-o nga katipan+ pasad sa akon dugo.+ Sa tagsa ka tion nga mag-inom kamo sa sini, himua ninyo ini sa pagdumdom sa akon.”+
26 Kay sa tagsa ka tion nga nagakaon kamo sini nga tinapay kag nagainom sa sini nga kopa, padayon ninyo nga ginapahayag ang kamatayon sang Ginuo, tubtob sa iya pag-abot.
27 Gani ang bisan sin-o nga magkaon sang tinapay ukon mag-inom sa kopa sang Ginuo nga indi takus, makasala sa lawas kag sa dugo sang Ginuo.
28 Dapat usisaon anay sang isa ka tawo ang iya kaugalingon kon bala takus sia+ antes magkaon sang tinapay kag mag-inom sa kopa.
29 Kay ang nagakaon kag nagainom, nagadala sing paghukom batok sa iya kaugalingon kon wala niya mahangpan ang kahulugan sang lawas.
30 Amo kon ngaa madamo sa inyo ang maluya kag masakiton, kag ang iban nagatulog sa kamatayon.*+
31 Apang kon usisaon naton sing maayo kon ano gid kita, indi kita paghukman.
32 Apang, kon ginhukman kita, gindisiplina kita ni Jehova,*+ agod indi kita pagpakamalauton upod sa kalibutan.+
33 Gani, mga kauturan ko, kon magtipon kamo agod magkaon sini nga panihapon, hulata ninyo ang isa kag isa.
34 Kon may isa nga ginagutom, magkaon sia anay sa iya balay, agod kon magtipon kamo indi kamo paghukman.+ Kon tuhoy sa iban pa nga mga butang tadlungon ko ina pag-abot ko dira.
