1 Samuel 19:1-24
19 Sang ulihi, ginsilingan ni Saul si Jonatan nga iya anak kag ang tanan niya nga alagad nga patyon si David.+
2 Apang bangod si Jonatan nga anak ni Saul nahamuot kay David,+ ginsilingan ni Jonatan si David: “Luyag ka ipapatay sang akon amay nga si Saul. Palihug mag-andam ka, kag buas sa aga magkadto ka sa isa ka tago nga duog kag magpanago ka didto.
3 Makadto man kami didto sang akon amay kag hambalon ko ang akon amay tuhoy sa imo, kag sugiran ko ikaw kon ano ang akon matukiban.”+
4 Maayo ang ginhambal ni Jonatan kay Saul nga iya amay tuhoy kay David.+ Nagsiling sia: “Indi paghimuan sang hari sing malain ang iya alagad nga si David, kay wala sia sing sala sa imo kag maayo gid ang iya ginhimo sa imo.
5 Ginbutang niya sa katalagman ang iya kabuhi* sang ginpatay niya ang Filistinhon,+ gani daku nga kadalag-an* ang ginhatag ni Jehova sa bug-os nga Israel. Nakita mo ini kag nalipay ka gid. Ngaa ipapatay mo si David nga wala sing kabangdanan?+ Makasala ka lang batok sa dugo sang isa ka tawo nga wala sing sala.”
6 Ginpamatian ni Saul si Jonatan, kag nanumpa si Saul: “Nagapanumpa ako sa buhi nga Dios nga si Jehova, indi sia pagpatyon.”
7 Pagkatapos sini, gintawag ni Jonatan si David kag ginsugid sa iya ni Jonatan ang tanan nga ginhambalan nila ni Saul. Dayon gindala ni Jonatan si David kay Saul, kag padayon sia nga nag-alagad sa iya pareho sang una.+
8 Sang ulihi, natabo liwat ang inaway, kag nagpakig-away si David sa mga Filistinhon kag madamo gid ang iya napatay sa ila kag nagpinalagyo sila.
9 Gintugutan ni Jehova nga pahadlukon si Saul sang iya natublag nga panghunahuna+ sang nagapungko sia sa iya balay kag may ginauyatan sia nga bangkaw, samtang nagatokar sing arpa si David.+
10 Gintinguhaan ni Saul nga ilansang si David sa dingding paagi sa pagbangkaw sa iya, apang nakalikaw sia kay Saul, kag nag-ungot ang bangkaw sa dingding. Nagpalagyo si David sina nga gab-i.
11 Sang ulihi, nagpadala si Saul sing mga mensahero sa balay ni David agod magbantay kag patyon sia pagkaaga,+ apang si Mical nga asawa ni David nagsiling sa iya: “Kon indi ka magpalagyo* sini nga gab-i, buas patyon ka nila.”
12 Ginbuligan dayon ni Mical si David nga makapanaug sa bintana agod makapalagyo sia.
13 Ginkuha ni Mical ang terapim nga estatwa* kag ginbutang ini sa katre, kag ginbutangan sa uluhan sini sing tela nga human sa balahibo sang kanding, dayon ginhabulan niya ini.
14 Nagpadala si Saul sing mga mensahero agod kuhaon si David, apang nagsiling si Mical: “Nagamasakit sia.”
15 Gani nagpadala si Saul sing mga mensahero agod tan-awon si David, kag ginsugo niya sila: “Dalha ninyo sia sa akon bisan nagahigda sia sa katre agod patyon sia.”+
16 Sang magsulod ang mga mensahero, ang nakita nila sa katre amo ang terapim nga estatwa* kag ang tela nga human sa balahibo sang kanding sa uluhan sini.
17 Nagsiling si Saul kay Mical: “Ngaa gintiplang mo ako kag ginpapalagyo mo ang akon kaaway?”+ Nagsabat si Mical kay Saul: “Kay nagsiling sia sa akon, ‘Papalagyuha ako! Kay kon indi, patyon ko ikaw.’ ”
18 Nalagyo si David kag nagkadto sia kay Samuel sa Rama.+ Ginsugid niya sa iya ang tanan nga ginhimo ni Saul sa iya. Dayon naglakat sila ni Samuel kag nagtener sila sa Nayot.+
19 Sang ulihi, may nanugid kay Saul: “Si David yara sa Nayot sa Rama.”
20 Nagpadala dayon si Saul sing mga mensahero agod dakpon si David. Sang makita nila ang tigulang nga mga manalagna nga nagapanagna kag si Samuel nga nagadumala sa ila, nagpanghikot ang espiritu sang Dios sa mga mensahero ni Saul, kag nagpanghikot man sila pareho sang mga manalagna.
21 Sang ginsugid nila ini kay Saul, nagpadala sia dayon sing iban nga mga mensahero, kag nagpanghikot man sila pareho sang mga manalagna. Gani nagpadala liwat si Saul sing ikatlo nga grupo sang mga mensahero, kag nagpanghikot man sila pareho sang mga manalagna.
22 Sang ulihi, nagkadto man sia sa Rama. Sang makalab-ot sia sa daku nga bubon sa Secu, namangkot sia: “Diin si Samuel kag si David?” Nagsabat sila: “Didto sila sa Nayot+ sa Rama.”
23 Samtang nagapakadto si Saul sa Nayot sa Rama, ang espiritu sang Dios nagpanghikot man sa iya, kag naglakat sia kag nagpanghikot pareho sang isa ka manalagna tubtob nakaabot sia sa Nayot sa Rama.
24 Gin-uba man niya ang iya mga bayo, kag nagpanghikot man sia pareho sang isa ka manalagna sa atubangan ni Samuel, kag naghigda sia didto nga nagauba* sa bug-os nga adlaw kag gab-i. Amo ini kon ngaa nagsiling sila: “Si Saul bala isa man sa mga manalagna?”+
Footnote
^ Ukon “Ginbutang niya ang iya kalag sa iya kamot.”
^ Ukon “kaluwasan.”
^ Ukon “Kon indi mo pagpapalagyuhon ang imo kalag.”
^ Ukon “dios sang isa ka panimalay; diosdios.”
^ Ukon “dios sang isa ka panimalay; diosdios.”
^ Ukon “halos wala sing panapton.”
