Exodo 5:1-23
5 Pagkatapos sini, nagkadto si Moises kag si Aaron sa Paraon kag nagsiling: “Amo ini ang ginasiling ni Jehova nga Dios sang Israel, ‘Palakta ang akon katawhan agod magsaulog sila sing kapiestahan para sa akon sa kamingawan.’ ”
2 Apang nagsiling ang Paraon: “Sin-o si Jehova,+ nga tumanon ko ang iya tingog kag palakton ang Israel?+ Indi ko kilala si Jehova, kag indi ko pagpalakton ang Israel.”+
3 Nagsabat sila: “Nagpakighambal sa amon ang Dios sang mga Hebreo. Palihug, luyag namon maglakbay sing tatlo ka adlaw sa kamingawan kag maghalad kay Jehova nga amon Dios;+ kay kon indi, hatagan niya kami sing malubha nga balatian ukon patyon paagi sa espada.”
4 Nagsabat sa ila ang hari sang Egipto: “Moises kag Aaron, ngaa ginapauntat ninyo sa pag-obra ang katawhan? Magbalik kamo sa inyo obra!”*+
5 Nagsiling pa ang Paraon: “Tan-awa kon daw ano kadamo ang inyo katawhan sa sini nga duta, kag luyag ninyo nga mag-untat sila tanan sa pag-obra kag mag-upod sa inyo?”
6 Sa sina man nga adlaw, ginsugo sang Paraon ang mga nagadumala sa pag-obra kag ang ila mga kabo:*
7 “Indi na kamo maghatag sing uhot sa katawhan agod himuon nila nga tisa.+ Sila na ang magtipon sing uhot nga ila gamiton.
8 Apang pareho gihapon kadamo nga tisa ang ipahimo ninyo sa ila. Indi ninyo ini pagbuhinan, bangod nagapatawhay* sila. Amo kon ngaa nagasiling sila, ‘Luyag namon maglakat, luyag namon maghalad sa amon Dios!’
9 Dugangi pa ninyo ang ila obra agod magsako pa gid sila sa pag-obra sa baylo nga mamati sila sa mga kabutigan.”
10 Gani ang mga nagadumala sa pag-obra+ kag ang ila mga kabo naglakat kag nagsiling sa katawhan: “Amo ini ang ginsiling ni Paraon, ‘Indi na kamo paghatagan sing uhot.
11 Kamo na ang mangita bisan diin sang uhot nga inyo gamiton, apang indi pagbuhinan ang inyo obra.’ ”
12 Gani nagkadto ang katawhan bisan diin sa bug-os nga duta sang Egipto agod magkuha sing dagami sa baylo sang uhot.
13 Ginasako sila sang mga nagadumala sa pag-obra: “Dapat tapuson ninyo ang inyo obra kada adlaw, pareho sang una sang ginahatagan pa kamo sing uhot.”
14 Ginasakit man sang mga nagadumala nga tinawo sang Paraon ang mga kabo nga Israelinhon.+ Ginpamangkot nila ang mga kabo: “Ngaa wala ninyo matapos ang kadamuon sang tisa nga ginapaobra sa inyo pareho sang una? Wala ninyo ini matapos kahapon kag subong nga adlaw.”
15 Gani ang mga kabo nga Israelinhon nagkadto kag nagreklamo sa Paraon: “Ngaa amo sini ang ginahimo mo sa imo mga alagad?
16 Wala sing ginhatag nga uhot sa imo mga alagad apang ginasugo nila kami, ‘Maghimo kamo sing tisa!’ Ginasakit nila ang imo mga alagad, apang ang imo mga tinawo ang may sala.”
17 Apang nagsiling ang Paraon: “Nagapatawhay* kamo, nagapatawhay* kamo!+ Amo kon ngaa nagasiling kamo, ‘Luyag namon maglakat, luyag namon maghalad kay Jehova.’+
18 Gani, lakat na kamo kag magbalik sa inyo obra! Indi na kamo paghatagan sing uhot, apang amo gihapon kadamo nga tisa ang himuon ninyo.”
19 Nakita sang mga kabo nga Israelinhon ang ila mabudlay gid nga kahimtangan bangod sang sugo sa ila: “Indi ninyo pagbuhinan ang kadamuon sang tisa nga ginahimo ninyo kada adlaw.”
20 Paghalin nila sa Paraon, nagkadto sila kay Moises kag kay Aaron nga nagatindog didto agod makigkita sa ila.
21 Nagsiling sila dayon sa ila: “Kabay pa nga makita ni Jehova ang inyo ginhimo kag hukman niya kamo, kay bangod sa inyo naakig sa amon ang Paraon kag ang iya mga alagad.* Kamo ang nagbutang sing espada sa ila kamot agod patyon kami.”+
22 Dayon nagdangop si Moises kay Jehova kag nagsiling sia: “Jehova, ngaa ginapaantos mo ini nga katawhan? Ngaa ginpadala mo pa ako?
23 Sugod sang nagkadto ako sa atubangan sang Paraon agod maghambal sa imo ngalan,+ mas malain pa ang ginhimo niya sa sini nga katawhan,+ kag wala mo gid ginluwas ang imo katawhan.”+
Footnote
^ Ukon “mga lulan.”
^ Ginpili sila halin sa mga Israelinhon.
^ Ukon “tamaran.”
^ Ukon “Tamaran.”
^ Ukon “tamaran.”
^ Ukon “nagbaho kami sa Paraon kag sa iya mga alagad.”
