Juan 20:1-31
20 Samtang madulom pa sang nahaunang adlaw sang semana, nagkadto sa lulubngan*+ si Maria Magdalena. Pag-abot niya didto, nakita niya nga ginkuha na ang bato nga nagatakop sa lulubngan.*+
2 Gani nagdalagan sia kag nagkadto kay Simon Pedro kag sa pinalangga nga disipulo ni Jesus,+ kag nagsiling sia sa ila: “Ginkuha nila ang Ginuo sa lulubngan,+ kag wala kami makahibalo kon diin nila sia ginbutang.”
3 Gani nagkadto si Pedro kag ang disipulo sa lulubngan.
4 Nagdalagan sila nga duha; apang ang disipulo mas madasig magdalagan sangsa kay Pedro, gani una sia nga nakalab-ot sa lulubngan.
5 Nagsid-ing sia, kag nakita niya ang mga tela nga linen didto,+ apang wala sia magsulod.
6 Dayon nag-abot man si Simon Pedro kag nagsulod sa lulubngan. Kag nakita man niya ang mga tela nga linen.
7 Ang tela nga ginsambod sa ulo ni Jesus wala nahamtang upod sa mga tela nga linen kundi nabalulon ini.
8 Nagsulod man ang disipulo nga una nga nag-abot sa lulubngan, kag sa iya nakita, nagpati sia sa ginsiling sa ila.
9 Apang wala pa nila mahangpan ang ginsiling sang kasulatan nga mabanhaw sia.+
10 Gani nagpauli ang mga disipulo.
11 Apang, si Maria nagpabilin nga nagatindog kag nagahibi sa gua sang lulubngan. Samtang nagahibi sia, nagduko sia kag nagsid-ing sa sulod sang lulubngan,
12 kag nakita niya ang duha ka anghel+ nga nagapanapot sing puti. Ang isa nagapungko sa uluhan sang nahamyangan anay sang bangkay ni Jesus kag ang isa naman sa tiilan.
13 Nagpamangkot sila sa iya: “Babayi, ngaa nagahibi ka?” Nagsabat sia: “Ginkuha nila ang akon Ginuo, kag wala ako makahibalo kon diin nila sia ginbutang.”
14 Pagkasiling sini, nagbalikid sia kag nakita niya si Jesus nga nagatindog, apang wala niya sia makilala.+
15 Nagpamangkot si Jesus sa iya: “Babayi, ngaa nagahibi ka? Sin-o ang ginapangita mo?” Naghunahuna si Maria nga ini ang hardinero, gani nagsabat sia: “Ginuo, kon ikaw ang nagkuha sa iya, sugiri ako kon diin mo sia ginbutang, kay kuhaon ko sia.”
16 Nagsiling si Jesus: “Maria!” Nag-atubang sia kag nagsiling kay Jesus sa Hebreo: “Rab·boʹni!” (nga nagakahulugan “Manunudlo!”)
17 Nagsiling pa si Jesus: “Untati ang pagkapyot sa akon, kay wala pa ako makakayab sa Amay. Apang magkadto ka sa akon mga kauturan+ kag isiling sa ila, ‘Magakayab ako sa akon Amay+ kag inyo Amay kag sa akon Dios+ kag inyo Dios.’”
18 Ginkadtuan ni Maria Magdalena ang mga disipulo kag ginsugiran: “Nakita ko ang Ginuo!” Ginsugid man niya sa ila ang ginsiling ni Jesus.+
19 Sang gab-i sina nga adlaw, ang nahaunang adlaw sang semana, nagtipon ang mga disipulo. Kag bisan pa natrangkahan ang mga puertahan bangod nahadlok sila sa mga Judiyo, nagpakita si Jesus sa ila kag nagsiling: “Kabay nga may paghidait kamo.”+
20 Pagkasiling sini, ginpakita niya sa ila ang iya mga kamot kag ang iya kilid.+ Nagkalipay gid ang mga disipulo sang makita nila ang Ginuo.+
21 Ginsilingan sila liwat ni Jesus: “Kabay pa nga may paghidait kamo.+ Subong nga ginpadala ako sang Amay,+ ginapadala ko man kamo.”+
22 Pagkasiling sini, ginhuypan niya sila kag ginsilingan: “Batuna ninyo ang balaan nga espiritu.+
23 Kon ginpatawad ninyo ang tawo nga nakasala, napatawad na sia sang Dios. Apang kon wala ninyo ginpatawad ang tawo nga nakasala, wala pa sia mapatawad sang Dios.”
24 Apang si Tomas,+ nga isa sa 12 ka apostoles, nga ginatawag ang Kapid, indi nila kaupod sang nagpakita si Jesus sa ila.
25 Gani ginsugiran sia sang iban nga disipulo: “Nakita namon ang Ginuo!” Apang nagsiling sia: “Kon indi ko makita kag matandog ang agi* sang mga lansang sa iya mga kamot kag kon indi ko matandog ang iya kilid,+ indi gid ako magpati.”
26 Pagligad sang walo ka adlaw, nagtipon liwat ang iya mga disipulo sa isa ka balay, kag kaupod na nila si Tomas. Bisan pa natrangkahan ang mga puertahan, nagpakita si Jesus sa ila kag nagsiling: “Kabay nga may paghidait kamo.”+
27 Dayon nagsiling sia kay Tomas: “Tanduga ang akon mga kamot, kag tan-awa ini. Tanduga ang akon kilid, kag indi ka na magduhaduha kundi magpati ka na.”
28 Nagsabat si Tomas: “Ginuo ko kag Dios ko!”
29 Nagsiling si Jesus sa iya: “Nagpati ka na bala bangod nakita mo ako? Malipayon ang mga nagapati bisan pa wala sila makakita.”
30 Madamo pa gid nga milagro ang ginhimo ni Jesus sa atubangan sang mga disipulo nga wala masulat sa sini nga linukot.+
31 Apang ang mga nasulat na ginsulat agod magtuo kamo nga si Jesus amo ang Cristo, ang Anak sang Dios, kag bangod nagtuo kamo, makatigayon kamo sang kabuhi paagi sa iya ngalan.+
