Numeros 31:1-54
31 Nagsiling si Jehova kay Moises:
2 “Itimalos+ ang mga Israelinhon batok sa mga Midianhon.+ Pagkatapos sini, mapatay ka kag ilubong pareho sang imo katawhan.”+
3 Gani nagsiling si Moises sa katawhan: “Hatagi sing hinganiban ang inyo mga lalaki kag pahandaa sila sa pagpakig-away batok sa Midian agod himuon ang pagtimalos ni Jehova sa Midian.
4 Halin sa kada tribo sang tanan nga tribo sang Israel, 1,000 ang ipadala ninyo sa inaway.”
5 Gani halin sa linibo sang Israel,+ 12,000 ang ginhatagan sing hinganiban kag ginpahanda para sa inaway, 1,000 halin sa kada tribo.
6 Dayon ginpadala ni Moises sa inaway ang 1,000 halin sa kada tribo, pati na si Finehas+ nga anak ni Eleazar kag saserdote sang mga soldado, nga nagadala sang balaan nga mga kagamitan kag sang mga trumpeta para sa pagpatunog sing mga sinyales sa inaway.+
7 Nagpakig-away sila batok sa Midian, suno sa ginsugo ni Jehova kay Moises, kag ginpamatay nila ang tanan nga lalaki.
8 Lakip sa ila ginpatay ang lima ka hari sang Midian, nga si Evi, si Rekem, si Zur, si Hur, kag si Reba. Ginpatay man nila paagi sa espada si Balaam+ nga anak ni Beor.
9 Apang gindala nga bihag sang mga Israelinhon ang mga babayi kag mga kabataan sang Midian. Ginpanguha man nila ang ila tanan nga kasapatan kag pagkabutang.
10 Ginsunog nila ang tanan nga siudad nga ila gin-istaran kag ang ila tanan nga kampo.*
11 Kag gindala nila ang tanan nila nga inagaw nga kasapatan kag pagkabutang kag mga bihag nga tawo.
12 Ang mga bihag kag ang mga inagaw gindala nila kay Moises kag kay Eleazar nga saserdote kag sa katilingban sang mga Israelinhon, sa kampo sa desyerto nga kapatagan sang Moab+ malapit sa Jordan sa Jerico.
13 Si Moises kag si Eleazar nga saserdote kag ang tanan nga pangulo sang katilingban naggua agod sugataon sila sa gua sang kampo.
14 Apang naakig si Moises sa ginpili nga mga pangulo sang linibo ka soldado kag sa mga pangulo sang ginatos ka soldado nga naghalin sa inaway.
15 Nagsiling si Moises sa ila: “Ngaa wala ninyo ginpamatay ang tanan nga babayi?
16 Amo ini sila nga bangod sa ginsiling ni Balaam naghaylo sa mga Israelinhon nga mangin indi matutom+ kay Jehova nga natabo didto sa Peor,+ gani nag-abot ang kalalat-an sa katilingban ni Jehova.+
17 Patya ninyo ang tanan nga kabataan nga lalaki kag ang tanan nga babayi nga nakahulid na sa lalaki.
18 Apang tuguti ninyo nga mabuhi ang tanan nga dalagita nga wala pa nakahulid sa lalaki.+
19 Magkampo kamo sa gua sang kampo sa sulod sang pito ka adlaw. Kamo tanan nga nakapatay sing tawo* kag nakatandog sing patay,+ magpaninlo kamo sang inyo kaugalingon+ sa ikatlo nga adlaw kag sa ikapito nga adlaw, kamo kag ang inyo mga bihag.
20 Tinluan ninyo ang tanan nga bayo, kag ang tanan nga gamit nga human sa panit, ukon sa balahibo sang kanding, ukon sa kahoy.”
21 Nagsiling si Eleazar nga saserdote sa mga soldado nga nagkadto sa inaway: “Amo ini ang kasuguan nga ginsugo ni Jehova kay Moises,
22 ‘Ang bulawan lamang, pilak, saway, salsalon, lata, kag tingga,
23 ang tanan nga indi maduktan sang kalayo, ang ipaagi ninyo sa kalayo, kag mangin matinlo ini. Apang dapat man ini tinluan paagi sa inugtinlo nga tubig.+ Ang tanan nga butang nga maduktan sang kalayo ipaagi ninyo sa tubig.
24 Labhan ninyo ang inyo mga bayo sa ikapito nga adlaw kag mangin matinlo kamo, dayon makasulod na kamo sa kampo.’”+
25 Nagsiling si Jehova kay Moises:
26 “Isipa ninyo ni Eleazar nga saserdote kag sang mga pangulo sang mga panimalay sang katilingban ang tanan nga inagaw, ang tanan nga bihag nga tawo kag sapat.
27 Tungaon mo sa duha ang inagaw, para sa mga soldado nga nagpakig-away kag para sa nabilin sa katilingban.+
28 Bilang buhis para kay Jehova, magkuha ka halin sa parte sang mga soldado nga nagkadto sa inaway sing isa ka kalag* sa kada 500, sa mga tawo, sa mga baka, sa mga asno, kag sa mga karnero.
29 Kuhaon ninyo ini sa ila parte kag ihatag mo ini kay Eleazar nga saserdote bilang amot para kay Jehova.+
30 Magkuha ka man halin sa parte sang mga Israelinhon sing isa ka tawo sa kada 50 ka tawo, kag isa sa kada 50 sa mga baka, sa mga asno, sa mga karnero, kag sa tanan nga sahi sang sinagod nga mga sapat. Ihatag mo ini sa mga Levinhon,+ nga amo ang may obligasyon sa tabernakulo ni Jehova.”+
31 Ginhimo ni Moises kag ni Eleazar nga saserdote ang ginsugo ni Jehova kay Moises.
32 Ang kadamuon sang nabilin sa mga inagaw nga ginpanguha sang mga tawo nga nagkadto sa inaway 675,000 ka karnero,
33 kag 72,000 ka baka,
34 kag 61,000 ka asno.
35 Ang kadamuon sang mga babayi* nga wala pa nakahulid sa lalaki+ 32,000.
36 Ang kadamuon sang katunga nga parte sang mga nagkadto sa inaway 337,500 ka karnero.
37 Ang kadamuon sang buhis para kay Jehova halin sa mga karnero 675.
38 Ang kadamuon sang mga baka 36,000, kag 72 sini ang buhis para kay Jehova.
39 Ang kadamuon sang mga asno 30,500, kag 61 sini ang buhis para kay Jehova.
40 Ang kadamuon sang mga tawo* 16,000, kag 32 ka tawo* ang buhis para kay Jehova.
41 Dayon ginhatag ni Moises kay Eleazar nga saserdote ang buhis bilang amot para kay Jehova,+ suno sa ginsugo ni Jehova kay Moises.
42 Amo ini ang parte sang mga Israelinhon, nga gintunga sa ila ni Moises kag sa mga soldado nga nagpakig-away:
43 ang katunga sang mga karnero, 337,500,
44 sang mga baka, 36,000,
45 sang mga asno, 30,500,
46 kag sang mga tawo,* 16,000.
47 Dayon nagkuha si Moises sa parte sang mga Israelinhon sing isa sa kada 50, halin sa mga tawo kag sa mga sapat, kag ginhatag niya ini sa mga Levinhon,+ nga amo ang may obligasyon sa tabernakulo ni Jehova,+ suno sa ginsugo ni Jehova kay Moises.
48 Dayon nagpalapit kay Moises ang ginpili nga mga lalaki sa mga tropa* sang soldado,+ ang mga pangulo sang linibo ka soldado kag ang mga pangulo sang ginatos ka soldado,
49 kag nagsiling sila kay Moises: “Gin-isip sang imo mga alagad ang mga soldado nga amon ginadumalahan kag wala sing bisan isa nga kulang.+
50 Gani ihalad sang kada isa sa amon kay Jehova ang bisan ano nga nakita namon, ang mga gamit nga bulawan, mga pulseras sa batiis, mga pulseras, pangselyo nga mga singsing, mga aritos, kag iban pa nga alahas, agod maghimo sing pagtumbas para sa amon sala* sa atubangan ni Jehova.”
51 Gani ginbaton ni Moises kag ni Eleazar nga saserdote ang tanan nga bulawan nga alahas halin sa ila.
52 Ang kabug-aton sang tanan nga bulawan nga gin-amot nila kay Jehova 16,750 ka siklo,* halin sa mga pangulo sang linibo ka soldado kag sa mga pangulo sang ginatos ka soldado.
53 Ang tagsa ka soldado nagkuha sang iya parte halin sa mga inagaw.
54 Ginbaton ni Moises kag ni Eleazar nga saserdote ang bulawan halin sa mga pangulo sang linibo ka soldado kag sang ginatos ka soldado kag gindala nila ini sa tolda nga tilipunan* bilang isa ka pahanumdom para sa katawhan sang Israel sa atubangan ni Jehova.
Footnote
^ Ukon “kampo nga may pader.”
^ Ukon “kalag.”
^ Ukon “kalag.”
^ Ukon “tawhanon nga kalag.”
^ Ukon “kalag.”
^ Ukon “tawhanon nga kalag.”
^ Sa literal, “mga grupo sang tag-isa ka libo.”
^ Ukon “para sa sala sang amon kalag.”
^ Ang isa ka siklo katumbas sang 11.4 ka gramo. Tan-awa ang Apendise B14.
