Salmo 57:1-11
Para sa pangulo sang musika; sa tono sang “Indi Paglaglaga.” Salmo ni David. Miktam.* Sang nagpanago sia sa kueba bangod kay Saul.+
57 Kaluy-i ako, O Dios ko, kaluy-i ako,Kay nagadangop ako* sa imo,+Kag nagapanago sa idalom sang imo mga pakpak tubtob magligad ang mga katalagman.+
2 Nagapanawag ako sa Labing Mataas nga Dios,Sa matuod nga Dios, nga nagaluwas sa akon sa mga katalagman.
3 Magapadala sia sing bulig halin sa langit sa pagluwas sa akon.+
Paslawon niya ang nagasalakay sa akon. (Selah)
Ipakita sang Dios ang iya mainunungon nga gugma kag pagkamasaligan.+
4 Ginalibutan ako* sang mga leon;+Nagahigda ako sa tunga sang mga tawo nga luyag maglamon sa akon,Ang ila mga ngipon daw mga bangkaw kag mga baslay
Kag ang ila dila daw matalom nga espada.+
5 Pakataason ka labaw sa mga langit, O Dios ko;Kabay nga ang imo himaya mangin labaw sa bug-os nga duta.+
6 Ginbutangan nila sing lambat ang akon mga alagyan;+Ginsubuan ako.*+
Nagkutkot sila sing tugalbong para sa akon,Apang sila ang nahulog sa sini.+ (Selah)
7 Malig-on ang akon tagipusuon, O Dios ko,+Malig-on ang akon tagipusuon.
Magaamba ako kag magahimo sang musika.
8 Magmata ka, akon himaya.
Magmata ka, de-kuerdas nga instrumento, kag ikaw man arpa.
Magamata ako sing aga pa.+
9 Dayawon ko ikaw sa tunga sang katawhan, O Jehova;+Magaamba ako sing mga pagdayaw* sa imo sa tunga sang mga pungsod.+
10 Kay ang imo mainunungon nga gugma dalayawon, subong kataas sang mga langit,+Kag ang imo pagkamasaligan tubtob sa mga panganod.
11 Pakataason ka labaw sa mga langit, O Dios ko;Kabay nga ang imo himaya mangin labaw sa bug-os nga duta.+
Footnote
^ Ukon “ang akon kalag.”
^ Ukon “ang akon kalag.”
^ Ukon “ang akon kalag.”
^ Ukon “Magalanton ako.”
