SEKSION 8
Kon May Trahedya nga Matabo
“Nagakasadya kamo sing daku, bisan pa nga sa malip-ot nga tion sa karon kinahanglan nga mag-antos kamo sang nanuhaytuhay nga pagtilaw.”
Bisan pa ginahimo mo ang imo labing masarangan para mangin malipayon ang inyo pag-asawahay kag pamilya, mahimo matabo ang wala ginapaabot nga mga butang nga makadula sang inyo kalipay. (Manugwali 9:11) Mahigugmaon nga nagabulig ang Dios sa aton kon may mga kabudlayan. Kon tumanon ninyo ang masunod nga mga prinsipio sa Biblia, maatubang mo kag sang imo pamilya, bisan ang pinakamabudlay nga kahimtangan.
1 MAGDANGOP KAY JEHOVA
ANG GINASILING SANG BIBLIA: “[Itugyan] ninyo sa iya ang tanan ninyo nga kabalaka, bangod nagaulikid sia sa inyo.” (1 Pedro 5:7) Dumduma pirme nga ang Dios indi ang balasulon sang imo mga problema. (Santiago 1:13) Kon mangin suod ka sa iya, buligan ka gid niya. (Isaias 41:10) “Iula sa atubangan niya ang inyo tagiposoon.”
Malugpayan ka man kon magbasa kag magtuon ka sang Biblia adlaw-adlaw. Mabatyagan mo nga si Jehova “nagalugpay sa aton sa tanan naton nga kapipit-an.” (2 Corinto 1:3, 4; Roma 15:4) Nagpromisa sia nga ihatag sa imo “ang paghidait sang Dios nga nagalabaw sa tanan nga panghunahuna.”
ANO ANG MAHIMO MO?
-
Mangamuyo nga buligan ka ni Jehova nga mangin kalmado kag makahunahuna sing maayo
-
Hibalua ang tanan nga puede mo himuon kag pilia ang pinakamaayo
2 ATIPANA ANG IMO KAUGALINGON KAG ANG IMO PAMILYA
ANG GINASILING SANG BIBLIA: “Ang tagiposoon sang mahalongon nagaagum sing ihibalo, kag ang idulungug sang maalam nagapangita sing ihibalo.” (Hulubaton 18:15) Hibalua ang tanan nga impormasyon kag ang mga kinahanglanon sang tagsa ka miembro sang imo pamilya. Istoryaha kag pamatii sila.
Ano abi kon mapatay ang imo hinigugma? Indi mahadlok nga ipabutyag ang imo kasubo. Dumduma nga bisan gani si Jesus “naghibi” man. (Juan 11:35, APD; Manugwali 3:4) Importante man ang bastante nga pahuway kag tulog. (Marcos 6:31) Makabulig ini sa imo nga maatubang ang mabudlay nga kahimtangan.
ANO ANG MAHIMO MO?
-
Antes matabo ang trahedya, makig-istorya pirme sa imo pamilya. Kon may problema, mahapos na sila makig-istorya sa imo
-
Istoryaha ang iban nga mahimo nakaeksperiensia man sang imo kahimtangan
3 MAGPABULIG
ANG GINASILING SANG BIBLIA: “Ang isa ka abyan nagahigugma sa tanan nga tion, kag ang isa ka utud natawo tungud sa kapiotan.” (Hulubaton 17:17) Gusto ka buligan sang imo mga abyan, pero mahimo nga indi sila kahibalo kon ano ang ila himuon. Ipahibalo sa ila kon ano gid ang imo kinahanglan. (Hulubaton 12:25) Magpabulig sa mga nakahangop sang Biblia kon paano mo maaplikar ang mga prinsipio sini. Makabulig sa imo ang laygay nga ihatag nila halin sa Biblia.
Mabuligan ka kon regular nga nagapakig-upod ka sa mga tawo nga nagatuo sa Dios kag nagasalig sa iya mga saad. Malipay ka man kon palig-unon mo ang iban. Isugid sa ila ang parte kay Jehova kag sa iya mga saad. Mangin masako sa pagbulig sa iban kag makig-upod pirme sa mga nagahigugma kag nagaulikid sa imo.
ANO ANG MAHIMO MO?
-
Istoryaha ang suod mo nga abyan kag magpabulig sa iya
-
Bunayag nga isugid ang imo mga kinahanglanon
Basi Manamian Ka Man
MAGMATA!
Kon Mamangkot ang Imo Bata Tuhoy sa Kamatayon
Apat ka tikang ang makabulig sa imo agod masabat ang ila pamangkot kag mapakita sa ila kon ano ang himuon nila kon mapatay ang isa ka hinigugma.
MAGMATA!
Kon May Trahedya nga Matabo
Lima ka miembro sang pamilya ni Ronaldo ang napatay sa aksidente sa salakyan 16 ka tuig na ang nagligad. Bisan pa ginapamensar niya gihapon ini, malinong na ang iya panghunahuna.
