Pinalangga Namon nga mga Kauturan:

Sa pinakauna nga isyu sang pangpubliko nga edisyon sang Ang Lalantawan, ang Enero 1, 2008, ginpahibalo sa aton ang isa ka makawiwili nga bag-o nga artikulo nga gintig-uluhan “Iluga ang Ila Pagtuo.” Sugod sadto, nalipay gid kita nga may bag-o nga artikulo sini nga ginabalhag kada tatlo ka bulan!

Ano ang reaksion sang mga bumalasa? Ang isa nagsiling tuhoy sa artikulo parte kay Marta: “Nagkadlaw ako sang nabasa ko ini kay pareho gid ako sa iya—gusto ko pirme amumahon sing maayo ang mga bisita kag masako gid ako amo nga nalipatan ko na kon kaisa nga mag-istorya sa ila.” Isa ka tin-edyer ang may makawiwili nga komento parte kay Ester: “Nahangpan ko nga posible kita mabuyo sa mga panapton kag sa pinakabag-o nga moda. Dapat maayo ang aton pamustura; pero, indi naton luyag nga magpasobra.” Nagsiling pa sia: “Ginatan-aw ni Jehova ang aton nasulod nga pagkatawo.” Nalipay ang isa ka Cristianong utod nga babayi sa artikulo parte kay apostol Pedro: “Nawili gid ako sa sugilanon sang ginbasa ko ini. Daw didto lang ako! Ginabatyag ko kon ano ang ginapatuhuyan sang tagsa ka dinalan.”

Ining mga bumalasa—kag ang madamo pa nga nagsulat sang ila apresasyon sa sini nga mga artikulo—nag-ugyon sa ginsulat ni apostol Pablo: “Ang tanan nga butang nga ginsulat sadto ginsulat sa pagtudlo sa aton.” (Roma 15:4) Huo, ginpasulat ni Jehova ini nga mga sugilanon sa Biblia agod tudluan kita. Tanan kita, bisan ano na kita kadugay sa kamatuoran, makatuon gikan sa ila.

Ginapalig-on namon kamo nga basahon dayon ini nga libro. Ilakip ini sa inyo programa sang Pangpamilya nga Pagsimba—manamian gid sa sini ang mga bata! Kon tun-an ini sang kongregasyon sa Pagtinuon sang Kongregasyon sa Biblia, indi gid mag-absent! Basaha ini sing maayo kag indi magdali. Gamita ang imo imahinasyon; ilakip ang imo mga igbalatyag. Tinguhai nga batyagon ang ginabatyag sang mga karakter, kag tan-awon ang ila nakita. Ipaanggid ang ila reaksion sa mga hitabo sa imo mangin reaksion.

Nalipay gid kami nga ihatag sa imo ini nga publikasyon. Kabay nga makabulig gid ini sa imo kag sa imo pamilya. Palangga gid namon kamo kag palihug batuna ang amon pangamusta,

Nagadumala nga Hubon sang mga Saksi ni Jehova