ANG pila ka iskolar karon nagasiling nga indi matuod nga persona si Satanas. Suno sa ila, imahinasyon lamang sia sang mga tawo. Ini nga argumento indi bag-o. “Ang labing epektibo nga panglimbong sang Yawa,” sulat sang mamalaybay sang ika-19 nga siglo nga si Charles-Pierre Baudelaire, “amo nga papatihon kita nga wala sia nagaluntad.”

Matuod gid bala nga persona si Satanas? Kon amo, sa diin sia naghalin? Sia bala ang di-makita nga gahom sa likod sang mga problema nga nagasalot sa aton kalibutan? Paano mo malikawan ang iya malaut nga impluwensia?

Ginalaragway sang Biblia nga si Satanas isa gid ka persona nga nagakabuhi sa duog sang mga espiritu. (Job 1:6) Ginasugiran kita sini tuhoy sa iya mapintas kag wala sing kaluoy nga mga kinaiya subong man sa iya malaut nga mga buhat. (Job 1:13-19; 2:7, 8; 2 Timoteo 2:26) Ginrekord pa gani sini ang pagpakigsugilanon ni Satanas sa Dios kag kay Jesus.—Job 1:7-12; Mateo 4:1, 11.

Sa diin naghalin ining malauton? Madugay pa antes nagluntad ang tawo, gintuga sang Dios ang iya “panganay” nga Anak, nga sang ulihi nakilala nga si Jesus. (Colosas 1:15) Nian, gintuga man ang iban nga “mga anak sang Dios,” nga gintawag nga mga anghel. (Job 38:4-7) Ang tanan himpit kag matarong. Apang, ang isa sa sining mga anghel nangin Satanas sang ulihi.

 Indi Satanas ang iya ngalan sang gintuga sia. Isa ini ka malaragwayon nga ngalan, nga nagakahulugan sing “Kontra; Kaaway; Manugsumbong.” Gintawag sia nga Satanas bangod ginpili niya ang dalanon nga supak sa Dios.

Ang bugal kag ang handum nga makigtupong sa Dios nagtubo sa sining espiritu nga tinuga. Luyag niya nga simbahon sia sang iban. Sang ang panganay nga Anak sang Dios nga si Jesus yari sa duta, ginsulay pa gani ni Satanas si Jesus nga “maghimo sing isa ka buhat sang pagsimba” sa iya.—Mateo 4:9.

Si Satanas ‘wala magpabilin nga malig-on sa kamatuoran.’ (Juan 8:44) Nagsiling sia nga butigon ang Dios, pero ang matuod, sia amo ang butigon. Ginsilingan niya si Eva nga mangin kaangay si Eva sa Dios, samtang sia ang luyag nga mangin kaangay sa Dios. Kag bangod sa iya malimbungon nga mga paagi, natigayon niya ang iya makagod nga handum. Gin-impluwensiahan niya si Eva nga kilalahon sia nga mas mataas sangsa Dios. Paagi sa pagtuman kay Satanas, ginbaton ni Eva nga si Satanas ang iya dios.—Genesis 3:1-7.

Paagi sa pagsulsol sang rebelyon, ginhimo sining ginasaligan anay nga anghel ang iya kaugalingon nga Satanas—kaaway sang Dios kag sang tawo. Ang “Yawa,” nga nagakahulugan sing “Manugpasipala,” gindugang man sa paglaragway sa sining malauton. Sang ulihi, gin-impluwensiahan sining isa nga nanguna sa pagpakasala ang iban nga anghel nga lapason ang Dios kag magbuylog sa iya sa pagrebelde. (Genesis 6:1, 2; 1 Pedro 3:19, 20) Apang, wala mapaayo sining mga anghel ang kahimtangan sang mga tawo. Bangod gin-ilog nila ang makagod nga dalanon ni Satanas, “ang duta napun-an sing kasingki.”—Genesis 6:11; Mateo 12:24.

Mahimo panason sang kriminal ang mga marka sang iya tudlo sa natabuan sang krimen sa pagtinguha nga taguon ang iya identidad. Apang, pag-abot sang mga pulis, nahibaluan nila nga kon may krimen, may kriminal gid. Si Satanas, ang orihinal nga ‘manugpatay sing tawo,’ nagatinguha gid sa pagtago sang iya identidad. (Juan 8:44; Hebreo 2:14) Sang nagpakigsugilanon sia kay Eva, gintago ni Satanas ang iya identidad paagi sa isa ka man-ug. Ginatinguhaan niya gihapon nga taguon ini karon. ‘Ginbulag niya ang mga hunahuna sang mga di-tumuluo’ agod matago niya ang kasangkaron sang iya impluwensia.—2 Corinto 4:4.

Apang, ginsugid ni Jesus nga si Satanas amo ang yara sa likod sining malaut nga kalibutan nga ginapuy-an naton. Gintawag niya sia nga “manuggahom sini nga kalibutan.” (Juan 12:31; 16:11) “Ang bug-os nga kalibutan yara sa gahom sang isa nga malauton,” sulat ni apostol Juan. (1 Juan 5:19) Gingamit sing epektibo ni Satanas “ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa” sa ‘pagpatalang sa bug-os napuy-an nga duta.’ (1 Juan 2:16; Bugna 12:9) Sia amo ang ginatuman sang katawhan sa kabug-usan.

Kaangay sa natabo kay Eva, ang mga nagatuman kay Satanas, sa pagkamatuod, nagahimo sa iya nga ila dios. Busa, si Satanas amo ang “dios sining sistema sang mga butang.” (2 Corinto 4:4) Lakip sa epekto sang iya paggahom ang pagkasalimpapaw kag kabutigan; inaway, pagpaantos kag kagulub-an; krimen, kakagod kag kalautan.

Nagpaandam ang Biblia: “Hupti ang inyo kaligdong, magmabinantayon.” Ngaa? Bangod “ang inyo kaaway, ang Yawa, nagaluyong subong sang isa ka nagangurob nga leon, nga nagapangita sing matukob.” (1 Pedro 5:8) Makapahunahuna gid ini nga teksto. Apang, makapaumpaw gid mahibaluan nga ang mga wala lamang nagahupot sang ila kaligdong—yadtong wala nagabantay sing padayon—amo ang “madaug ni Satanas.”—2 Corinto 2:11.

Importante gid nga kilalahon naton ang pagluntad ni Satanas kag tugutan ang Dios nga ‘magpalig-on sa aton’ kag ‘magpabakod sa aton.’ Sa sini nga paagi mahimo kita ‘makatindog batok kay Satanas’ kag makadampig sa Dios.—1 Pedro 5:9, 10.