Ang Maayo nga Resulta sang Diosnon nga Paghanas

Masami nga matigayon sang mga ginikanan ang maayo nga resulta sang ila paghanas sa ila mga anak sugod sa pagkabata. Ang bata nga si Dorian nga taga-Peru, sa Bagatnan nga Amerika, apat ka tuig pa lang sang naghatag sia sang iya una nga pamulongpulong sa Teokratikong Eskwelahan Para sa Ministeryo sa Kingdom Hall sang mga Saksi ni Jehova. Sang mag-eskwela na sia, napaathag niya sa iya manunudlo kag mga klasmeyt kon ngaa wala sia nagasaulog sing Krismas nga ginagamit ang Biblia.

Sang singko anyos si Dorian, ginpangabay sia nga maghambal sa atubang sang mga 500 ka estudyante sa ila eskwelahan, tuhoy sa iya pagpati sa Adlaw Para sa mga Amay (Father’s Day). Naghanda sia sing dies-minutos nga pamulongpulong tuhoy sa tema nga “Ang mga Responsibilidad Sang Isa ka Amay,” pasad sa teksto sa Efeso 6:4. Sa hingapusan sang iya pamulongpulong, nagsiling sia, “Sa baylo nga saulugon ang Adlaw Para sa mga Amay sing makaisa lang kada tuig, dapat tahuron kag tumanon sang mga kabataan ang ila mga ginikanan adlaw-adlaw.”

Sang 1943, ang Teokratikong Eskwelahan Para sa Ministeryo nangin isa sa mga miting sang mga Saksi ni Jehova kada semana. Gintukod ini agod buligan ang mga bata kag tigulang nga pauswagon ang ila ikasarang sa pagpakighambal sa publiko. Halin sadto, nakabulig ini sa paghanas tuhoy sa Biblia kag nabuligan man sini ang mga ginikanan sa pagtuman sa ila obligasyon nga hanason ang ila kabataan.​—Hulubaton 22:6.

Sang Nobiembre 2005, ang anom ka tuig nga si Simon, nga taga-Switzerland, naghatag sang iya una nga asaynment sa pagbasa sing Biblia sa Teokratikong Eskwelahan Para sa Ministeryo. Pagligad sang mga isa ka tuig, gin-interbyu sia sa isa ka daku nga asambleya sang mga Saksi ni Jehova. Ano ang iya pagtamod sa pagsimba kag pag-alagad sa Dios?

Naluyagan gid ni Simon ang pagtambong sa mga miting kay bisan may mga tion nga kapoy sia, wala gid sia nagapalta. Nagabantala man sia upod sa iya pamilya. Kada bulan nagapahamtang sia sing mga 30 tubtob 50 ka kopya sang Lalantawan kag Magmata! sa mga bata kag tigulang. Dugang pa, pirme niya ginaistoryahan sing tuhoy sa Biblia ang iya amay, nga indi Saksi ang relihion, kag ginahagad ini nga mag-upod sa ila sa pagtambong sa mga miting.

Pat-od gid nga malipay ang mga ginikanan kon mangin maayo ang resulta sang pagpadaku nila sa ila mga anak suno “sa disiplina kag nagatuytoy nga panghunahuna ni Jehova.”​—Efeso 6:4; Santiago 3:17, 18.

[Retrato sa pahina 28]

Si Dorian sa eskwelahan

[Retrato sa pahina 28]

Si Simon sa Kingdom Hall