Mga Halimbawa sang Madinalag-on nga Pamilya​— Bahin Dos

Subong sang ginbinagbinag sa “Mga Halimbawa sang Madinalag-on nga Pamilya—Bahin Uno,” ang mga prinsipio sa Biblia nakabulig sa mga pamilya nga mangin mabakod sa tion sang mga kabudlayan. * Si Jehova nagsaad sa mga nagatuman sa iya mga kasuguan: “Ton-an ko ikaw kag tudloan ikaw sang dalanon nga dapat mo laktan; laygayan ko ikaw nga ang akon mata yara sa ibabaw nimo.”—Salmo 32:8.

Pag-atubang sa problema sa pinansial. Ang kuarta amo sa masami ang kabangdanan sang pag-away sang mag-asawa. Pero makabulig ang mga prinsipio sa Biblia agod masolbar ang mga problema sa kuarta sa husto nga paagi. Si Jesus nagsiling: “Untati ninyo ang pagkabalaka tuhoy sa inyo kabuhi kon ano ang inyo kaunon ukon kon ano ang inyo imnon, ukon tuhoy sa inyo lawas kon ano ang inyo isuksok. . . . Nahibaluan sang inyo langitnon nga Amay nga kinahanglan ninyo ini tanan nga butang.”—Mateo 6:25, 32.

Sa pahina 23, isaysay ni Issachar nga taga-United States, kon paano nila gin-atubang sang iya pamilya ang kabudlayan sa pinansial sang ginguba sang Bagyo Katrina ang ila balay.

Kon magbalatian ang isa ka miembro sang pamilya. Halos tanan kita nagabalatian kon kaisa. Sa masami, temporaryo lang ini kag nagaayo dayon. Pero ano ang aton himuon kon ang isa ka miembro sang aton pamilya may malala nga balatian? Ang Biblia nagasiling nga atipanon ni Jehova ang mga nagabalatian. (Salmo 41:1-3) Paano ginagamit ni Jehova ang pamilya agod may mag-aman sang kinahanglanon nga pag-atipan sa mga nagabalatian?

Sa pahina 24, isaysay ni Hajime nga isa ka bana nga taga-Japan, kon paano nagbuligay ang ila pamilya sa pag-atipan sa iya asawa nga si Noriko sang nagbalatian ini sing malala.

Kon mapatyan sing bata. Ang kamatayon sang isa ka bata amo ang isa sa pinakamasakit nga trahedya nga maatubang sang isa ka pamilya. Nagsaad si Jehova nga pahiran niya ang mga luha sang kasubo nga epekto sang kasakit bangod sang kamatayon sang isa ka bata. (Bugna 21:1-4) Bisan subong, ginalugpayan niya ang mga namatyan.—Salmo 147:3.

Sa pahina 25, isaysay nanday Fernando kag Dilma nga taga-United States, kon paano sila ginpabakod sang Biblia sang napatay ang ila lapsag nga babayi.

Ang Biblia isa gid ka masaligan nga panuytoy para sa mga pamilya nga nagaatubang sang mga kabudlayan, subong sang ginapakita sa masunod nga mga pahina.

[Nota]

 [Kahon/Mga retrato sa pahina 23]

Pag-atubang sa Problema sa Pinansial

Panugiron ni Issachar Nichols, United States

“Ginguba sang Bagyo Katrina ang amon balay. Ang semento na lang nga salog ang nabilin. Ang eskwelahan nga akon ginaubrahan ginbahaan sa sulod sang isa ka bulan kag tunga.”

SANG tig-ilinit sang 2005, kami sang akon asawa nga si Michelle, kag ang amon duha ka tuig nga bata nga babayi nga si Sydney, nagaistar sa Bay St. Louis, Mississippi, U.S.A. Subong mga Saksi ni Jehova, ginatinguhaan gid namon ni Michelle nga gamiton ang amon daku nga tion subong Cristiano nga mga ministro. Isa ako ka maestro sang bokasyonal nga mga kurso, kag ang eskwelahan nga akon ginaubrahan nahamtang sa New Orleans, Louisiana. Tatlo lang ka adlaw ang akon obra kada semana, gani magamit ko ang iban nga mga adlaw sa pagtudlo sa iban parte sa Biblia. Daw kaayo lang sang dalagan sang amon kabuhi. Pero hinali lang nga ginbalita nga maabot ang Bagyo Katrina. Gani naghimos kami kag nagbakwit gilayon.

Pagkatapos sang bagyo, ang amon balay sa Bay St. Louis guba na, pati ang eskwelahan nga akon ginaubrahan sa New Orleans. Nakakita kami sing bag-o nga ilistaran sa bulig sang insurance kag gobierno, pero nabudlayan ako mangita sing permanente nga obra. Magluwas sini, nagmasakit ang akon asawa bangod sang mahigko nga tubig. Nagluya ang iya immune system, kag sang ulihi nagmasakit pa gid sia sing West Nile nga virus nga halin sa lamok. Bangod sini, nagdaku ang amon gasto kag balayran sa insurance.

Agod maka-adjust kami sa sini nga kahimtangan, gintun-an namon nga magkinot bisan sa amon mga kinahanglanon. Wala na ako nagapili sing obra.

Matuod nga ginbudlayan gid kami sang nadula ang amon mga pagkabutang. Pero nagapasalamat kami nga buhi kami gihapon. Natun-an man namon nga diutay gid lang ang kapuslanan sang materyal nga mga butang. Nadumduman namon ang ginsiling ni Jesus: “Bisan pa may kabuganaan ang isa ka tawo ang iya kabuhi indi nagagikan sa mga butang nga ginapanag-iyahan niya.”—Lucas 12:15.

Narealisar man namon nga bisan daw ano kadaku ang nadula sa amon, mas daku pa ang nadula sa iban. Ang iban nagkalamatay pa gani. Amo kon ngaa pagkatapos sini nga kalamidad, nangin masako ako sa pagboluntaryo sa pagpadala sing bulig sa mga nabiktima kag sa paglugpay sa ila.

Sa sini nga mga tion, ang Salmo 102:17 nakalugpay gid sa amon. Nagsiling ini nga “nagtalupangod [si Jehova nga Dios] sang mga pangamuyo sang mga makalolooy, kag wala magtamay sang ila pangamuyo.” Nabatyagan gid sang amon pamilya ang iya pagsakdag!

[Kahon sa pahina 23]

Pagkatapos nga nagwaswas ang Bagyo Katrina kag Rita sa U.S. Gulf Coast sang 2005, ang mga Saksi ni Jehova nagbutang gilayon sing 13 ka tilipunan sang mga boluntaryo sa pagpadala sing bulig, siam ka bodega, kag apat ka gasolinahan. Halos 17,000 ka Saksi halin sa United States kag 13 ka iban pa nga pungsod ang nagboluntaryo sa pagbulig. Ginkay-o nila ang linibo ka puluy-an.

 [Kahon/Mga retrato sa pahina 24]

Kon Magbalatian ang Isa ka Miembro sang Pamilya

Panugiron ni Hajime Ito, Japan

“Mahiligon kami magluto sang akon asawa nga si Noriko, pero nagbag-o ang tanan sang nagmasakit sia. Indi na sia makakaon, makainom, ukon makaistorya. Naga-wheelchair na lang sia kag nagaginhawa paagi sa respirator.”

NAGSUGOD nga ginbudlayan sa paghambal ang akon asawa nga si Noriko sang Mayo 2006. Sugod sadto, ginbudlayan man sia magkaon kag mag-inom. Sang Septiembre sadto nga tuig, nadiskobrehan nga may amyotrophic lateral sclerosis (ALS) sia. Isa ini ka malala nga balatian nga nagaapektar sa mga nerve cells sang utok kag taludtod. Sa sulod lang sang apat ka bulan, nagbag-o ang amon kabuhi. Kag umpisa pa lang ini sang paglala sang iya balatian.

Wala magdugay, naparalisar ang dila kag tuo nga kamot ni Noriko. Gani ginbutangan sia sing tubo sa tiyan agod may agyan ang pagkaon. Ginbutangan man sia sing tubo sa liog agod may alagyan ang hangin, pero bangod sini indi na sia makahambal. Nahibaluan ko nga mabudlay gid ini para kay Noriko, kay mapagsik gid sia kag masako sang una. Mga Saksi ni Jehova kami, kag ginagamit ni Noriko kag sang amon mga bata nga babayi ang ila daku nga tion subong Cristiano nga mga ministro. Subong, nagaginhawa si Noriko sa bulig sang respirator, kag nagahigda na lang sia pirme.

Pero wala ini nagpugong kay Noriko! Halimbawa, nagatambong gihapon sia sa Cristiano nga mga pagtilipon bisan pa naka-wheelchair sia kag may respirator. Indi sia makabati sing maayo, gani ginasulat sang amon bata sa dalagku nga mga karakter ang importante nga mga punto sa programa para makabenepisyo sia. Kag bisan pa indi na makapadayon si Noriko sa iya pagpakighambal sa mga tawo bilang Cristiano nga ministro, nagasulat sia sa mga tawo kag ginasugid sa ila ang paglaum sa Biblia paagi sa isa ka pinasahi nga gadyet nga ginaangot sa amon kompyuter.—2 Pedro 3:13; Bugna 21:1-4.

Ang amon bug-os nga pamilya nagabuligay sa pag-atipan kay Noriko. Ang amon duha ka bata nagpangita sang iban nga obra agod mas may tion sila sa balay. Ginabuligan namon nga tatlo ang mga ulubrahon sa balay nga ginaobra sang una ni Noriko.

May mga aga nga nakita ko si Noriko nga daw kapoy gid. Siling ko sa akon kaugalingon, ‘Hambalon ko sia nga magpahuway lang anay subong nga adlaw.’ Pero gusto gid ni Noriko nga isugid sa iban ang mensahe sang Biblia. Kon ginahanda ko na ang iya kompyuter, makita ko sa iya mga mata nga nalipay gid sia! Nagaayo-ayo ang iya pamatyag kon magsulat sia. Nakita ko nga importante gid nga “may madamo pirme nga ginahimo sa hilikuton sang Ginuo.”—1 Corinto 15:58.

Ang eksperiensia ni Jason Stuart nga may ALS man, nga mabasa sa Enero 2006 nga Magmata!, nakabulig gid kay Noriko nga malikawan ang pagluya sang buot. Ang matuod, kon mamangkot ang mga nagaobra sa ospital kon ngaa positibo gihapon sia, ginaistorya sa ila ni Noriko ini nga artikulo kag ginahatagan namon sila sing kopya sini. Ang pagsugid sa iban sang iya pagtuo nakabulig gid sa akon asawa nga makabatas.

Treinta ka tuig na kami nga mag-asawa ni Noriko. Pero sang nagligad nga tatlo ka tuig, naapresyar ko pa gid ang iya mga kinaiya nga sang una ginabalewala ko lang. Malipayon gid ako nga sia ang akon asawa!

 [Kahon/Mga retrato sa pahina 25]

Kon Mapatyan sing Bata

Panugiron nanday Fernando kag Dilma Freitas, United States

“Daw indi gid mapaathag ang kasakit kon mapatay ang imo bata. Wala na sing mas masakit pa sa sini.”

ANG amon bata nga si Precious, napatay sang Abril 16, 2006. Napulo pa lang sia ka adlaw. Mga tatlo pa lang ka bulan ang akon ginabusong sang mahibaluan namon nga may malala ini nga balatian sa tagipusuon. Samtang nagahilapit ang akon pagbata, napat-od namon nga bisan matawo sia nga buhi, indi sia magdugay. Daw indi gid namon ini mabaton. Mapagros ang amon tatlo ka bata, amo nga daw indi kami magpati nga mapatay ang amon lapsag.

Sang natawo si Precious, ang isa ka eksperiensiado nga espesyalista sa chromosomal disorders nagsiling nga si Precious may Trisomy 18. Isa ini ka talagsahon nga balatian nga nagakatabo sa 1 sa kada 5,000 ka lapsag. Nahibaluan namon nga indi gid sia magdugay. Daw wala gid kami sing mahimo magluwas nga atipanon sia sa malip-ot nga tion sang iya kabuhi. Amo gid sini ang amon ginhimo.

Nagapasalamat gid kami sa napulo ka adlaw nga nakaupod namon si Precious. Gin-atipan namon sia upod sa amon tatlo ka bata nga babayi. Ginkugos namon sia, gin-istorya, ginhakos, ginhalukan, kag ginkuhaan sia sing madamo nga piktyur. Ginaistoryahan pa gani namon kon kay sin-o gid sia nag-ilog. Adlaw-adlaw kami ginaduaw sa ospital sang espesyalista nga nag-eksamin kay Precious. Naghibi man sia upod sa amon kag nagpangayo sing pasensia nga wala na sia sing mahimo. Gindrowing pa gani niya si Precious samtang nagaistorya sia sa amon agod indi niya sia malipatan. Ginhatagan man niya kami sing kopya sang iya drowing.

Mga Saksi ni Jehova kami kag nagapati gid kami sa ginatudlo sang Biblia nga ipasag-uli sang Dios ang paraiso sa duta kag gusto gid niya nga banhawon ang mga patay, lakip ang mga lapsag pareho ni Precious. (Job 14:14, 15; Juan 5:28, 29) Ginahulat gid namon ang adlaw nga makugos kag mahakos namon sia liwat. Kon makabati gani kami sang tinaga nga “paraiso,” ini nga paglaum nagapahalipay gid sa amon! Samtang wala pa ini, nalugpayan kami tungod nahibaluan namon nga si Precious wala na nagaantos kag dumdumon sia sang Dios sa ulihi.—Manugwali 9:5, 10.