Gindesinyo Bala Ini?

Ang Bulbol sang Bukaw

▪Gusto gid ilugon sang mga engineer sang eroplano ang pispis nga bukaw, nga nagatulog kon adlaw kag nagabugtaw kon gab-i. Ngaa? Bangod matinong ini maglupad. “Wala na sing iban pa nga pispis nga amo sini katinong maglupad,” siling sang Web site sang National Geographic. Ano ang sekreto sang bukaw?

Binagbinaga: Kon maglupad ang kalabanan nga pispis, ang hangin nga nagahampas sa ila bulbol nagatuga sing gahod. Pero, wala ini nagakatabo sa mga bukaw bangod ang kilid sang mga bulbol sini sa pakpak may magagmay nga mga sarait nga nagabungkag sang gahod sang hangin samtang nagakapaykapay ini. Ang lawas sang bukaw may mapino pa gid kag mahumok nga bulbol nga nagabulig sa pagsuyop sang gahod.

Gusto ilugon sang mga nagadesinyo sang eroplano ang matinong nga paglupad sang bukaw. Kon matinong na ang mga eroplano, puede na sila makagamit sang mga airport sa mga lugar nga ginadumilian ang paglupad kag paghugpa kon gab-i kag kon kaagahon bangod sa gahod. May mga plano na kon paano ini himuon. “Ginatun-an pa lang namon ini,” siling ni Geoffrey Lilley, isa ka retirado nga propesor sang aeronautics sa University of Southampton sa England. Nagsiling pa gid sia nga pila pa ka dekada ang kinahanglan para makadesinyo sang matinong nga eroplano.

Ano sa banta mo? Natabuan lang bala ang bulbol sang bukaw nga nagapatinong sa paglupad sini? Ukon may nagdesinyo sini?

[Retrato sa pahina 23]

Ipaanggid ang bulbol sang bukaw sa wala sa bulbol sang dapay sa tuo

[Credit Lines sang retrato sa pahina 23]

Long-eared owl: © Joe McDonald/Visuals Unlimited; barn owl sequence: © Andy Harmer/Photo Researchers, Inc.; feather comparison: Courtesy of Eike Wulfmeyer/Wikimedia/GFDL