Makahayanghag nga mga Butang sa Palibot!

SA BULIG sang pagtuon sa siensia, madamo na kita sing nahibaluan parte sa uniberso. Mas nahangpan na ini subong sang mga tawo, halin sa pinakagamay nga elemento asta sa tuman kasangkad nga kahawaan. Pero sa pihak sini, may mga butang sa gihapon nga padayon naton nga ginapaligban.

Ining duta nga ginaistaran naton tuman ka gamay lamang nga bahin sang tuman kasangkad nga uniberso. Pero kon tan-awon naton ang aton palibot, nahayanghag na kita sa kasibod kag katahom sini, pareho sang matahom nga mga bulak, mga alibangbang, mga lugar, sarisari nga kolor sang pispis, pagtunod sang adlaw, ukon bisan ang yuhum sang aton pinalangga.

Madamo nga tawo ang nakatalupangod nga may bastante nga ebidensia ang uniberso para magpati kita nga may nagaluntad nga isa ka maalam nga Ginhalinan. Suno sa ila, ang kasuguan sa physics daw naplastar gid sing maayo para magpadayon ang kabuhi. Kon magligdas lang diutay ang pagplastar sang uniberso, wala na sing may mabuhi. Pero indi amo sini ang natabo kay madamo nga butang sa palibot ang padayon nga nagakabuhi.

Ang cosmologist nga si Paul Davies nagsulat: “Samtang nagahulag kag nagabag-o ang uniberso, masiling nga daw naplano gid ini sing maayo. Ang tanan nga butang nagahisantuanay . . . Ang kinaugali indi natabuan lamang, kundi pamatuod sang nagahisantuanay nga mga prinsipio sa matematika.” Ang iban nga sientipiko nagaugyon kay Davies, pero ang iban wala.

Halimbawa, ang isa ka physicist nga nakabaton sing Nobel prize nga si Steven Weinberg nagsiling: “Samtang daw nagaathag pa gid ang nahibaluan parte sa uniberso, labi man nga daw wala ini sing padulungan.” Pero nagsiling man sia nga “kon kaisa ang mga butang sa palibot tuman katahom, bisan pa daw indi gid man ini kinahanglanon. . . . Daw indi gid malikawan hunahunaon nga ang amo sini nga katahom ginhimo para malipay kita.”

Ano ang ginapakita sini? Kon naplastar ini sing maayo, indi bala nga dapat may Desinyador kag Manunuga nga nagplastar gid sini suno sa iya katuyuan? May katuyuan bala ang aton kabuhi kag ang aton uniberso? Ukon nagluntad lang kita tungod sa pisikal nga proseso nga natabuan lang? Sabton sang masunod nga mga artikulo ini nga mga pamangkot.