Mas Maayo Bala Kon Wala Sing Relihion?

NAGAPATI ang bag-o nga mga ateista nga kon wala na sing relihion, madula na ang mga suicide bomber, ang pag-ilinaway bangod sa relihion, kag ang mga pastor sa TV nga nagapanguarta sa ila mga sumulunod. Amo man bala sini ang gusto mo matabo?

Antes mo ini sabton, pamangkuta ang imo kaugalingon, ‘May mga ebidensia bala nga mangin mas maayo ang aton kahimtangan kon ang tanan mga ateista?’ Binagbinaga ini: Sobra 1.5 milyones nga Cambodian ang nagkalamatay bangod sa pagtinguha sang Khmer Rouge nga magtukod sing isa ka Marxist nga paggobierno nga wala nagapati sa Dios. Kag 10 milyones ang nagkalamatay sang naggahom si Joseph Stalin sa USSR, nga isa ka ateista nga pungsod. Matuod, ining mga kalautan indi mo gid man mabasol tanan sa ateismo. Pero ginapakita lang sini nga ang paggahom sang mga ateista wala nagresulta sa paghidait kag kalinong.

Madamo ang nagasiling nga nagaantos ang tawo bangod sa relihion. Pero ang Dios bala  ang balasulon? Indi, pareho nga indi mo mabasol ang manughimo sang salakyan kon maaksidente ang drayber sini bangod nagagamit sia sing cell phone. Lainlain ang kabangdanan kon ngaa nagaantos ang tawo. Pero magluwas sa relihion, may mas daku pa nga kabangdanan. Ang Biblia nagasiling nga amo ini ang ginpanubli nga di-kahimpitan. “Ang tanan nakasala kag wala makalab-ot sa himaya sang Dios.” (Roma 3:23) Ining makasasala nga huyog nagaresulta sa kakagod, bugal, pagpinagusto, kag kasingki. (Genesis 8:21) Amo man ini ang rason kon ngaa mas gusto sang mga tawo ang relihion nga nagatolerar sa ila sala. (Roma 1:24-27) Husto gid ang ginsiling ni Jesucristo: “Gikan sa tagipusuon nagagikan ang malaut nga pangatarungan, pagpatay, panghilahi, pagpakighilawas, pagpangawat, di-matuod nga pagpanaksi, [kag] pagpasipala.”—Mateo 15:19.

Ang Kinatuhayan

Importante nga mahibaluan naton ang kinatuhayan sang butig nga pagsimba sa matuod nga pagsimba ukon sa pagsimba nga ginabaton sang Dios. Ang matuod nga pagsimba makabulig sa mga tawo nga mabatuan ang ila di-kahimpitan. Ginabuligan sila sini nga ipakita ang gugma, paghidait, kaayo, pagkamaayo, kalulo, pagpugong sa kaugalingon, katutom sa pag-asawahay, kag pagtahod sa iban. (Galacia 5:22, 23) Pero ang butig nga relihion nagasunod sa uso kay ginakunsinti nila ang malain nga mga buhat nga ginpakamalaut ni Jesus. Suno sa Biblia, ginapakalam nila ang ‘dulunggan sang mga tawo.’—2 Timoteo 4:3.

Ano ang epekto sang ateismo sa moralidad sang tawo? Kon wala sing Dios, wala kita sing salabton sa isa ka gamhanan nga awtoridad, kag “wala man kita sing mga pamatasan nga dapat sundon,” siling sang propesor sa law nga si Phillip Johnson. Kon amo sini, ang moralidad mangin relatibo. Buot silingon ang kada isa pagusto lang kon ano nga talaksan ang iya sundon. Amo gani nga may mga tawo nga nanamian sa ateismo.—Salmo 14:1.

Pero ang matuod, wala ginakunsinti sang Dios ang bisan sin-o nga butigon, ateistiko man ukon relihioso. * Ang Dios nagpromisa: “Ang mga matarong [sa moral kag espirituwal] amo ang magapuyo sa duta kag ang mga wala sing kasawayan amo ang magapabilin sa sini. Apang ang mga malauton utdon sa duta; kag ang mga maluib gabuton sa sini.” (Hulubaton 2:21, 22, NW) Kon amo sini ang kahimtangan, ang tanan mangin malinong na kag malipayon. Indi gid ini mahimo sang bisan sin-o nga tawo, ukon sang ila pilosopiya kag organisasyon.—Isaias 11:9.

[Nota]

[Kahon sa pahina 6]

PAANO GINATAMOD SANG DIOS ANG KAPINTAS?

Ang duta nga ginhatag sa dumaan nga Israel gin-istaran anay sang mga taga-Canaan. Ang mga tawo diri imoral. Nagapakighilawas sila sa pareho nila nga lalaki ukon babayi, sa ila pamilya, ukon sa sapat. May ritwal man sila nga ginahalad ang ila bata. (Levitico 18:2-27) Suno sa libro nga Archaeology and the Old Testament may nakutkutan “nga tinumpok sang mga abo kag kalabera sang mga lapsag sa mga sementeryo sa palibot sang pagano nga mga altar, nga nagapakita nga madamo gid ang [nagahalad sang ila bata].” Ang mga taga-Canaan nagasimba sa ila dios paagi sa paayaw nga pagpakighilawas subong ritwal kag paghalad sang ila kamagulangan nga bata sa ila dios, siling sang isa ka handbook sa Biblia. Nagsiling pa ini: “Ang mga arkeologo nga nagkutkot sa kagulub-an sang mga siudad sang Canaan natingala kon ngaa wala sila dayon ginlaglag sang Dios.”

Ang paglaglag sang Dios sa mga taga-Canaan isa ka serioso nga pahanumdom sa aton subong nga indi niya pagtugutan nga magpadayon ang kalautan nga ginapasibangod sa iya. “Nagtalana [ang Dios] sang isa ka adlaw nga tuyo niya hukman ang napuy-an nga duta sa pagkamatarong,” siling sang Binuhatan 17:31.

[Mga Retrato sa pahina 7]

Ang mga relihioso kag indi relihioso pareho lang nga mapintas

Ang simbahan nagsuporta kay Hitler

Mga bagol sang mga biktima sang Khmer Rouge sa Cambodia

[Credit Line sa pahina 7]

AP Photo