Pagbantay sa Kalibutan

“Ang mga babayi sa imol nga mga pungsod 300 ka pilo ang posibilidad nga mapatay sa tion sang pagbusong ukon pagbata sangsa nagaistar sa manggaranon nga mga pungsod.”—BUSINESSWORLD, PILIPINAS.

Suno sa surbe sa Germany, 40 porsiento sa 11 asta 15 anyos didto ang wala makahibalo nga sa sidlangan nagabutlak ang adlaw; 60 porsiento ang wala makahibalo nga kada apat ka semana ang ugsad.—WELT ONLINE, GERMANY.

Nakutkutan sang mga arkeologo ang templo sang mga Filistinhon sa dumaan nga Gat. Ang templo may duha ka mayor nga haligi kag nagapahanumdom sa aton sa rekord sang Biblia parte kay Samson, nga nagtiklod sini nga mga haligi amo nga narumpag ang templo.—THE JERUSALEM POST, ISRAEL.

Pag-import sang Palangasaw-on

“Nagadamo ang mga lalaki sa manggaranon nga pungsod sang Asia pareho sang Japan kag South Korea ang nagapangita sing palangasaw-on sa imol nga [mga pungsod sa Asia] pareho sang Vietnam kag Pilipinas,” suno sa BusinessWorld, isa ka pamantalaan sa Internet sa Pilipinas. Sang 1995 asta 2006, nagdamo sing 73 porsiento ang mga Hapon nga nagapangasawa sang taga-iban nga pungsod. Ngaa? “Pislian abi ang mga babayi nga may sarang,” suno sa report, kag daw indi sila mamana. Pero ang mga babayi sa imol nga pungsod handa nga mamana bisan sa mga trabahador lang sa manggaranon nga pungsod, bangod “ginapasalig sila sang mas maayo nga pangabuhi.”

Bulig Para Indi Gid Madakpan?

Ang isa ka kontrobersial nga site sa lima ka pungsod nagatanyag sang ila serbisyo nga may islogan: “Malip-ot ang kabuhi. Magpangalipay.” Suno sa naghimo sini nga site, wala sini ginatudluan ang mga tawo nga magluib sa ila tiayon, kay “nakadesisyon na sila nga magluib.” “Nag-utwas lang ang kalabanan nga problema sa pagluib bangod nadakpan sila. Gani, ginatudluan namon nga indi madakpan ang mga gusto mangalipay,” siling niya. “Wala namon sila gintudluan nga magluib, ginabuligan lang namon sila nga indi gid madakpan.” Ginapabugal gid nila nga may mga 6.4 milyones sila ka miembro.

Natawo Para Magsaot?

“Ang mga tawo may ikasarang sa paghulag santu sa musika, pareho abi sang paghulaghulag sang tiil ukon pagsaot,” suno sa report nga ginsulat sang mga researcher halin sa mga unibersidad sa York, England, kag Jyväskylä, Finland. Natukiban sang mga researcher nga bisan antes pa makahambal ang mga lapsag, nagahulag ang ila lawas santu sa musika nga ila mabatian. Kon mahimo nila ini, puerte gid ang ila yuhum. Ginapakita sini nga ang ikasarang sang isa sa pagsaot wala niya natun-an kundi ara na nga daan.