Kon Paano Mangin Mas Makatarunganon

LUYAG sang aton Manunuga nga mangin malinong kag malipayon ang aton kabuhi. Gusto man niya nga makahatag kita sing kalipay sa iban. Gani, ginapangabay niya kita sa “paghimo sing matarung, kag . . . paghigugma sang kalolo.” (Miqueas 6:8) Paano naton ini mahimo? Kinahanglan naton pauswagon ang mga kinaiya nga makabulig sa aton nga malikawan ang pagkadimakatarunganon. Binagbinaga kon paano makabulig ang Biblia.

PAGLANDAS SA KAKAGOD. Ang pinakamaayo nga pangontra sa kakagod amo ang gugma. Indi lamang ini emosyonal ukon romantiko nga balatyagon kundi masinakripisyuhon nga gugma para sa iban. “Ang gugma . . . mainayuhon,” kag “wala nagapangita sang kaugalingon nga kaayuhan,” siling sang 1 Corinto 13:4, 5. Dugang pa, ini nga gugma wala lamang ginapakita sa pamilya kag mga abyan. “Kon ginahigugma ninyo ang mga nagahigugma sa inyo, ano ang inyo padya?” pamangkot ni Jesus. Nagsiling pa sia nga bisan gani ang mga indi diosnon nagahigugma sa mga nagahigugma sa ila.—Mateo 5:46.

PAGLANDAS SA DISKRIMINASYON. Ang Binuhatan 10:34, 35, nagsiling: “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.” Wala ginabase sang Dios ang kaluwasan sa rasa, tindog sa komunidad, ukon sekso sang isa. Sa iya panan-aw, “wala sing Judiyo ukon Griego, wala sing ulipon ukon hilway nga tawo, wala sing lalaki ukon babayi.” (Galacia 3:28) Kon ilugon naton ang Dios, malandas naton ang diskriminasyon. Talupangda ang halimbawa ni Dorothy nga taga-Estados Unidos.

Naugot si Dorothy sa diskriminasyon sa rasa amo nga nag-entra sia sa rebolusyon agod mapahaganhagan ang pag-antos sang itom nga mga tawo. Pero nakatambong sia sa Cristianong pagtilipon sang mga Saksi ni Jehova kag natandog gid sia sang gin-abiabi sia sing maayo sang puti kag itom nga mga Saksi. Sang ulihi, narealisar niya nga ang Dios lang ang makapabag-o sa tawo. Sang naeksperiensiahan niya ang matuod nga gugma sang puti nga mga Saksi—ang mga tawo nga siling niya sadto “desidido [sia] nga  patyon para sa iya kausa”—wala niya napunggan ang paghilibion.

PAGPAKITA SING PASUNAID SA IBAN. Ang pila sa mga sumulunod ni Jesus mga palahubog anay, manugkilkil, manuglibak, kag manugtamay antes nangin mga Cristiano. Pero paagi sa bulig sang Dios, nagbag-o sila kag nangin mahigugmaon kag maayo. (1 Corinto 5:11; 6:9-11; Galacia 5:22) Subong, minilyon ang naghimo sini nga mga pagbag-o paagi sa pagpakigsuod sa Dios. Ang isa ka halimbawa amo si Firuddin nga taga-Azerbaijan.

Nagdaku si Firuddin sa isa ka balay-alaypan kag pirme lang sia may kontra. Sang daku na sia, nangin instruktor sia sang martial arts. “Kabastos sa akon, kapintas kag kasingki,” siling niya. “Kon tigkalaon kag may nalimtan ang akon asawa nga si Zahra, bisan toothpick lang, ginakastigo ko sia. Kon nagalakat kami kag may magtulok sa iya nga lalaki, ginakastigo ko man ang nagtulok sa iya!”

Isa ka adlaw, natandog gid si Firuddin sang nahibaluan niya nga ginpangabay ni Jesus ang Dios nga patawaron ang mga soldado nga naglansang sa iya. (Lucas 23:34) ‘Ang Anak lang sang Dios ang makahimo sina,’ sa pensar niya. Pagkatapos sadto, nagtuon sia parte sa Dios. Sang gintanyagan sia sang mga Saksi ni Jehova sang libre nga pagtuon sa Biblia, ginbaton niya ini gilayon. Sang ulihi, nagbag-o ang iya pamatasan. Nangin malulo na sia kay Zahra, amo nga nagtuon man ini sa Biblia. Subong, nahiusa na sila sa matuod nga pagsimba.

Matuod, ang aton personal nga mga pagbag-o indi makasolbar sang inhustisya sa kalibutan. Pero ano abi kon katuyuan gali sang Dios nga magpaluntad sang bag-o kag matarong nga kalibutan? Posible gid ini bangod may gahom sia! Kag binagbinaga ini: Sa 2 Timoteo 3:1-4, makita naton nga gintagna na sang Biblia kon ano ang mangin batasan sang mga tawo sa aton panahon. Ina nga tagna natuman gid sing detalyado pareho sang iban pa nga tagna sa Biblia. Gani may basihan gid kita nga magsalig sa promisa sang Dios nga tapuson niya ang tanan nga inhustisya. Tumanon gid sang Dios ini nga katuyuan. Paano?

[Kahon/Retrato sa pahina 7]

ANG PAGPANGITA NI HEIDE SANG HUSTISYA

“Naugot ako sadto sa diskriminasyon sa iban nga rasa, inaway, kaimulon, kag iban pa nga inhustisya, kag gusto ko ini solusyonan,” hinumdom ni Heide nga taga-Estados Unidos. “Nag-obra ako sa civil rights movement kag nag-entra sa isa ka partido-pulitika, pero daw wala man gihapon sing epekto ang akon ginhimo.

“Sa banta ko mas daku nga pagbag-o ang kinahanglan kag daw mahatag ini sang hippie movement. Pero napaslawan man ini. Sa baylo nga bag-uhon ang sistema, natalupangdan ko nga madamo nga hippie ang mas interesado sa sex, droga, kag magansal nga musika. Tungod sini, nag-antos ako sing tuman nga depresyon. Sang ulihi, may nakilala ako nga isa ka Saksi ni Jehova. Ginpakita niya sa akon sa Biblia ang mga pagbag-o nga pagahimuon sang Dios. Halimbawa, ginpakita niya sa akon ang ginasiling sang Bugna 21:3, 4, nga pahiran sang Dios ang tanan nga luha kag dulaon niya ang paglalaw, paghibi, kag kasakit nga tuga sang inhustisya. ‘Matuman ayhan ini nga mga promisa?’ pamangkot ko sa akon kaugalingon.

“Nadula ang akon pangduhaduha sang nabasa ko ang ginasiling sang Kasulatan parte sa gahom kag gugma sang Dios kag sang nabatyagan ko ang gugma sang mga Saksi ni Jehova sa isa kag isa. Subong, nalangkag ako sa paghulat sa katumanan sang mga promisa sang Dios.”

[Retrato sa pahina 6]

Malandas naton ang diskriminasyon paagi sa pag-ilog sa gugma sang Dios

[Retrato sa pahina 6]

Si Firuddin kag ang iya asawa nga si Zahra